7
Tighur Maaron mboom toni izala tamtoghon 144,000 ndamodi inim ghilalooŋ padi
1 Mbeb tonowen isob, ghoro naghita aŋela paaŋ tiyoon ila taan dige paaŋ. Eez iyoon ila pa rag, eez iyoon ila pa yavaar, ite iyoon ila pa kagu, ve ite paam iyoon ila pa daudau. Ve tikis yaghur paaŋ tonowen. Leso tiviviir taan, te, ma ai eta sob.
2-3 Ve naghita aŋela ite ineep pa ndag iza, ve iza. Ye ikis mbeb to mboom to Maaron mata yaryaara ineep ila, ve isaav aliŋa tiina ila pa aŋela paaŋ tonowen ighaze: “Awaghamun taan toman te ve ai rikia malep. Asaŋan ris, ve nighur Maaron toit mboom toni ila yes mbesooŋa toni ndamodi le isob o.” Ye isaav tovene pasa, Maaron igham aŋela paaŋ tonowen ledi tapiridi pa tiwaghamun taan ve te. Ezek 9:4+; Syg 9:4, 14:1, 22:4
4-8 Nanepneep, ve nalooŋ yes Israela piiz to Maaron mboom toni iza ndamodi inim ghilalooŋ padi. Yes irau ndiŋndiŋ ndiŋndiŋ (144,000).
Yes Israela tonenen, rumai todi eŋaeŋa ledi tamtoghon irau ndiŋndiŋ saaŋgul ve ru (12,000). Tovenen rumai to Yuda tamtoghon todi 12,000, to Ruben 12,000, to Gat 12,000, to Aser 12,000, to Naptali 12,000, to Manase 12,000, to Simeon 12,000, to Levi 12,000, to Isakar 12,000, to Zebulun 12,000, to Yosep 12,000, ve to Benyamin 12,000. Yes tonowen tisob tigham mboom to Maaron, tauto inim ghilalooŋ padi ighaze yes tinim le wa.
Ival tiina to ndug ndug tipait Maaron iza izi ndug sambam
9 Mbeb tonowen isob, ghoro naghita ival tiina kat tiyoon ila Sipsip to Maaron mata igharau Tama ina to ghamuuŋ pooz. Yes to ndug ndug. Ve tinidi, toman gabuadi, ve aliŋadi naol naol. Yes tindud di pa nonogiiŋa pisosooŋa, ve tikis napatolo raua ila nimadi. Yes ival le ival kat. Tamtoghon eta irau inin di maau. Syg 3:5, 5:9, 14:6
10 Ve timboboob aliŋadi tiina tighaze: “Tapakur Maaron toit to ineep ila ina to ghamuuŋ pooz ne toman Sipsip toni. Pasa, yesuru tigham mulin ghiit, tauto taneep pooi.”
11 Ve aŋela tisob tiyoon tiluvut Maaron ina to ghamuuŋ pooz toman ŋginiiŋa tamoot ee ve paaŋ (24) ve mbeb matadi yaryaara paaŋ. Ve matadi iŋarua Maaron ina to ghamuuŋ pooz, ve titap naghodi izi ila Maaron mata, ve tipaiti tighaze:
12 “Onoon kat. Iit tapait Maaron toit pa poia toni. Ye iza tiina kat, ve ŋgar toni tiina.
Lolood poia pani pasa, ye igham poian ghiit.
Ye ariaŋa, ve tapiri tiina kat.
Tovenen iit pale tapaiti tovene itaghoni taghoni gha ila! Onoon.” Syg 5:12+
13 Ghoro ŋginiiŋa tonowen, todi eez ighason ghou ighaze: “Sei masin to tindud di pa nonogiiŋa pisosooŋa we? Yes tilaagh vena to tinim?”
14 You napamuul aliŋa naghaze: “Tiina, yom uwatag di.”
Ghoro ye isaav payou muul ighaze: “Sawa to tighur pataŋani tiina pa Maaron tamtoghon toni, ndiran tonowen tiyoon ariaŋa, ve tilib pa tovaaŋ to ivot padi. Yes timen nonogiiŋa todi pa Sipsip to Maaron siŋ toni, tauto tiŋgalaaŋ ve tipisosooŋ kat. Is 1:18; Mk 13:19+; Hib 9:14; 1Yo 1:7
15 “Pughu tonene to ndiran tonowen tineep tigharau Maaron ina to ghamuuŋ pooz, ve timbesmbees pani ila rumai toni lolo, ve tipapaiti irau mboŋ ve ndag. Ŋgeu to ineep ila ina to ghamuuŋ pooz, pale ineep toman di, ve ighur di tineep ila samba ve ipoon di.
16 Tovenen yes irau pitool di, ma murun di muul maau. Ve ndag irau ighaaz katin di muul maau. Mbo 121:6; Is 49:10
17 Pasa, Sipsip to Maaron to ineep toman Maaron igharau ina to ghamuuŋ pooz, ye tau pale iŋgin di ve mata padi. Ve ye pale ighereb di tila pa ya to nepooŋ mataad yaryaara to bokbokia izaza. Ve Maaron tau pale imus matadi suru isob ighau, ve irau titaŋ muul maau.” Mbo 23:1+; Is 25:8; Yo 7:37+, 10:11+; Syg 21:4