18
David ipait Maaron eeza
Mbouŋ to David, besooŋa to Yoova. Saawe tau Yoova igham mulin David ila Saul ve koiŋa tisov nimazi, i imbou mbouŋ tane pa Yoova.
(2Sam 22:1-51)
1 O Yoova, yau lolog igheen tsio kat, ve naghamgham tapirig ilat tsio.
2 Yoova iponpoon ghau pa koiagŋa imin maetaaz tau izala kat. Ve i imin ruum ariaaŋa pa nayooŋ ila loolo. Saawe isov, i ighamgham mulin ghau pa pataŋani tsiau.
Maaron tsiau iponpoon ghau pa zaab imin maet tintiina, ve yau nayoŋyooŋ ila tooni.
I imin sigheu payau, ve i Uleeŋa tsiau ariaaŋa.
I imin didiiŋ ariaaŋa tau ilivut ghau.
3 Iit aat tapait Yoova eeza!
Yau napoii pa uleeŋ, ve i igham mulin ghau ila koiagŋa nimazi.
4 Liis to mateegh, rigmon kanaŋ iliis ghau.
Pataŋani naol titatan ghau imin dibom tintiina tipol izala pavog.
5 Ve ravraav ariaaŋa to mateegh ikaukau ghau, ve rigmon kanaŋ igherev ghau nazila mateegha niazi.
Tauvene liis to mateegh, naghita igheen ila naghog.
6 Saawe tau naleep ila pataŋani tawe loolo, yau napoi Yoova pa uleeŋ.
Nataŋ rarai Maaron tsiau naghe ilam iuul ghau.
Taŋiiz tsiau iŋaruini, ve ighur taliiŋa pani.
I ileep ila rumei tooni loolo, ve ilooŋ aliŋag.
7 Tauvene igham yogyoog itok taan le taan katkatia,
ve loloz tisov pughuzi irur paam.
Pasaa, i aate yavyav kat.
8 Mbuas ivot pa uuzu puura,
ve yav yaama tomania ŋgilaaŋi ivot pa aavo, ve ighan suvinia gabua.
9 Ra sambam saamba ikaak,
ve i iyooz izala taitai gabgabuai, ve izilam.
10 I ileep izala aŋela tooni ariaaŋa nduume, ve iroov ilam.
Yaghur ibaado, ve ikaleel gha ilam.
11 I ipoon tauu pa ndoroom, leso imin le niia to yoŋgaaŋ.
Taitai gabgabuai ikauu, ve iŋgooz tauu ila loolo.
12 I ileep ta sewe toman mbonari tiina, ve igham nugh ighani milmilia.
Tauta lalaav iŋgalŋgal izi, ve ais paatu paatu tomania yav ŋgilaaŋi titaptap tizi pa taan.
13 Yoova ileep izi sambam, ve isaav toman aliiŋa tiina kat, imin lalaav luutu.
Maaron Tiina Tau Iliiv Zimaronŋa Tisov na aliiŋa ivot. Ve yav ŋgilaaŋi tomania ais paatu titaptap tizi.
14 I igham lalaav iŋgal koiŋa imin paneegh natŋa tooni.
Tauta roiŋ tiina igham zi, ve tighawaar mbiriis.
15 Yoova, saawe tau yo utotoi aatyavyav tsio pazi,
yaghur tiina ivot pa uzum, ve ivuvuur te ila soghan, le sausau ivot ighazooŋ.
Ve taan puughu tau igheen izila siiŋa kat na ivot peria. Gabua eta ipoona muul mako.
16 Ra Yoova ileep saaŋa, ve izuzuun niima izilam ikis ghau,
ve indai ghau nazaa pa mazavan belbeluuŋa loolo.
17 Koiagŋa tapirizi tiina, ve yau narau zi mako.
Yes tighur koi payau kat. Eemon Yoova iuul ghau, ve ipas ghau ila nimazi.
18 Saawe tau naleep ila pataŋani loolo, yes tipaburigin malmal payau.
Eemon Yoova ipoon ghau ve ipalot ghau.
19 I ipas ghau navot pa pataŋani tsiau, ve ighur ghau nala naleep izi nugh poia.
Pasaa, i loolo payau kat. Tauta igham mulin ghau ve naleep poi.
20 Yau nataghon ŋgar tau iduduuŋ ila Yoova maata. Tauta i loolo payau ve igham poghani ghau.
Nimag igham sosor eta mako. Tauta i igham leg atuya poia.
21 Pasaa, saawe isov, yau nataghon eez to Yoova.
Irau nagham ŋgar saghati ve naghur murig pa Maaron tsiau ne mako.
22 Pasaa, matag kisin tutuuŋ tooni tisov.
Tutuuŋ tooni tau tigheen pataghaaŋ na, naghur murig pazi mako.
23 Tauta leg sosor eta ila i maata mako.
Yau naŋgin taug poi, tauta nagham gabua eta isosor mako.
24 Yau naghamgham ŋgar duduuŋa ve ŋgar ŋgalaaŋa mon ila Yoova maata.
Tauta i loolo payau ve igham leg atuya poia.
25 Yoova, isaav ighe tamtamon eta loolo isaghav ghom ariaaŋ ve itaghon eez tsio, yo pale lolom isaghavu paam ve uule irau saawe.
Tamtamon tau ighe le sosor eta mako ve ŋgar tooni isov popoia mon, ene pale yo upamuul ŋgar poia pani paam.
26 Ve isaav ighe ŋeer eta ighamgham ŋgar ŋgalaaŋa mon, ene pale yo paam ugham ŋgar ŋgalaaŋa pani.
Eemon yes tau lezi ŋgar tiina pa ghamuuŋ karom ve ŋgar saghati, na yo lem eez naol to uyat ŋgar toozi tawe.
27 Tamtamon tau titatan tauzi na, yo ughamgham mulin zi pa pataŋani toozi.
Eemon yes tau tipapait tauzi ve tivelegh ghom na, yo utatan zi tizi timin kaut sorok.
28 Yoova, Maaron tsiau, yo ugham ghazooŋa tsio isul ghau,
ve uziir ndoroom ighau payau, leso naleep poi.
29 Yo upapalot ghau. Tauta yau irau naparav tomania koiagŋa le naliiv zi.
Maaron tsiau ilepleep tomani ghau. Tauvene yau irau nayaat maloŋon didiiŋ ariaaŋa tau ilivut koiagŋa nugh toozi, ve naloŋ nala.
30 Maaron eez tooni, ene poia le poia kat.
Ve saveeŋ tooni, ene onoon mon. Irau taghur ila kat.
Tamtamon tisov tau tiyooŋ ila tooni na, i imin sigheu pazi.
31 Yoova mon ta Maaron tauu. Ite paam mako.
I mon ta iponpoon ghiit imin maet tiina.
32 I ipapalot ghau pa tauu tapiri, tauta nayooz tuŋia.
Ve i iŋginŋgin ghau pa laghooŋ tsiau, ve itotoi eez payau.
33 I igham agheg tuŋia ila taan, ve nalaan ariaaŋ imin mekmek sagsag.
Tauvene saawe tau nalaagh ila nugh sapsapu, irau agheg pusukia ve natap mako.
34 I itotoi ŋgar to ghamuuŋ malmal payau, ve ipalot nimag.
Tauta yau irau nadaad paneegh ariaaŋa tau tigharaata pa mbaras.
35 Yoova, yo umin sigheu payau, ve ugham mulin ghau ila koiagŋa nimazi.
Ve nimam tapir, tauta ipapalot ghau.
Yo uluul ghau, tauta ezag imin tiina.
36 Yo ugharaat poghania agheg niia.
Tauta agheg pusukia mako, ve nayooz tuŋia pa ghamuuŋ malmal.
37 Yau nalaan taghon koiagŋa nala le nazaa toozi.
Ve naravuur zi le tisov kat. Eta ileep muul mako.
38 Yau narav zi le tisov titaptap tizi agheg puughu.
Eta irau iburig muul to igham malmal payau ne mako.
39 Pasaa, yo upapalot ghau pa taum tapirim. Tauta nayooz ariaaŋ pa malmal.
Yo ughur koiagŋa tila nimag ve naliiv zi.
40 Yo ugham zi titoor zi, ve tighau tila.
Yes tau tighur koi payau ne, yau napasov zi le tisov kat.
41 Yes tipoi pa uleeŋ. Eemon eta iuul zi mako.
Taŋiiz toozi iŋarui Yoova paam. Eemon i ilooŋ zi mako.
42 Yau narav mbirisai zi, le timin ŋgaupup tau yaghur ivuvuura gha ilale.
Ve navaghaaz zi imin tiiŋ tau igheen ila eeze.
43 Saawe tau tamtamon tiburig ve tizoor aliŋag, yo uvool tsiau, ve ugham mulin ghau ila nimazi.
Ve ughur ghau namin daaba pa nugh nugh.
Tamtamon to taan siriv tau yau nawatagh zi mako na, aazne tileep ila sambag ve tibesbees payau.
44 Ighe tilooŋ aliŋag, ene rekia mon ve titaghoni.
Nugh nugh tilam ve tiput aghezi payau toman roiŋ tiina.
45 Pasaa, tighilaal tighe tirau gabua eta mako.
Tauvene roiŋ tiina igham zi, ve tipul ruum toozi ariaŋazi tau tiyoŋyooŋ ila lolozi na, ve tilam tsiau.
46 Onoon kat, Yoova ilepleep!
I iponpoon ghau imin maet tiina.
I Uleeŋa tsiau. Tauvene yau napakuru ve napait eeza.
47 I ivool tsiau, ve iyat ŋgar sasaghati tau koiagŋa tigham payau na.
Ve ighur nughmariŋ tileep ila yau sambag.
48 I ipas ghau ila koiagŋa nimazi, ve iuul ghau le naliiv zi.
I igham mulin ghau ila yes tau tiliŋliŋ siŋ pa tamtamon na nimazi.
49 Tauvene Yoova, yau aat nayoor ezam ila tamtamon to nugh nugh sosozi, ve nambou to napait ghom.
50 Yoova iuluul yes tau i ighur zi timin kinik. Tauta tilivliiv malmal tintiina.
I tauu ighur David to igham pooz.
Tauvene loolo isaghavu, ve pale ighur poia tooni izazaa to David tomania paaghu tooni taghon taghon gha ila.