38
Suŋuuŋ to tamtamon tau moroghooŋ tiina ighamu
Mbouŋ to David
Saawe tau tamtamon tigham watooŋrau ve tighason Maaron to maata iŋgal zi, timbou mbouŋ tane
1 O Yoova, uyaon ghau toman atem yavyav sov.
Ve isaav ighe upaduduuŋ ghau, na uŋgal matag sov.
2 Yo uvanegh ghau pa paneegh tsio natŋa,
ve nimam itatan katin ghau.
3 Atem yavyav payau kat. Tauta tinig isov isaghat wa. Anoŋag sirivu eta igheen poi mako.
Sosor tsiau, tauta tuag isov iyavyav gha nasaghat.
4 Pataŋani to sosor tsiau itatan ghau kat imin dibom tintiina tipolpol izala pavog.
Tauta igham pataŋani tiina payau le irau nabaado mako.
5 Yau nagham ŋgar imin yes borauŋa ve nazoor aliŋam.
Tauta aazne, mbotmboot toman nanagh tau vaazi saghati ne igham ghau.
6 Yavyavuuŋ tiina igham ghau, ve natudtud ve nayakyak.
Tauvene mboŋoozo ila le rabrab izi, lolog ipataŋan ve nataŋtaŋ.
7 Tinig ituntun kat, ve anoŋag isov isaghat wa.
Anoŋag sirivu eta igheen poi mako.
8 Moroghooŋ tane iŋgoor katin ghau le tapirig isov kat.
Tauvene lolog ipataŋan ve nayakyak.
9 Yoova, yo uwatagh: Yau naghe yo uul ghau leso tinig poia.
Yau lolog ipataŋan ve nataŋtaŋ. Gabua tane iyooŋ payo mako.
10 Aazne, ateg ipaparav ve tapirig imbool.
Tauvene naghog poia muul mako.
11 Zetagŋa ve yes tau ruum toozi igharau ghau ne, tighita moroghooŋ tsiau tane, le tileep soghan payau. Tigharau ghau muul mako.
Ve ziiri waaro tsiau tauvene paam. Tilam tigig ghau rigta mako.
12 Koiagŋa tau tizuari zi pa ravuuŋ ghau namaat na, tighur liis katini payau.
Mboŋoozo ila le ravrav izi, yes tisavsaav pa eez to tivaghamun ghau,
Lolozi ighurghur pa eez yoŋgaaŋa to tikari ghau.
13 Eemon matag ila pa saveeŋ toozi tawe mako.
Yau naneneeŋ mon imin tamtamon tau aavo ve taliiŋa ivool, ve irau isavsaav mako, ve iloŋlooŋ saveeŋ mako.
14 Onoon kat, yau namin tamtamon tau taliiŋa ivool ve iloŋlooŋ saveeŋ mako,
ve irau iyol saveeŋ eta mako.
15 O Yoova, Maaron tsiau, yau naghur matag payo ve nasaŋan ghom.
Yau nanumeer ghom naghe yo pale ulooŋ suŋuuŋ tsiau tane ve uul ghau.
16 Maaron, upul pataŋani tane iliiv ghau sov. Pa ighe natap, ene pale koiagŋa tintinizi, ve tipakur tauzi tighe tiliiv ghau.
17 Ughita. Yavyavuuŋ tane ipul ghau rigta mako.
Moroghooŋ tane irav matin tapirig le naghe natap.
18 Onoon, yau nazoor aliŋam. Tauta aazne, lolog ipataŋan ve navotia sosor tsiau payo.
19 Koiagŋa, yes eval kat, ve tapirizi tiina.
Ŋgar tau tigham payau ne, iduduuŋ mako. Pasaa, yau nagham sosor eta pazi mako. Yes tighur koi payau sorok.
20 Ŋgar popoia tau muuŋ yau naghamgham pazi na, aazne tiyoli pa ŋgar saghati.
Yes tighurghur koi payau pasaa, yau nazuari ghau pa ŋgar poia mon.
21 O Yoova, ughur murim payau sov.
Maaron tsiau, uleep soghan payau sov.
22 Yoova, yo ta Uleeŋa tsiau.
Ulam rekia, ve uul ghau!