48
Maaron nugh tooni Zion
Mbouŋ to yes Kora
1-2 Yoova eeza tiina kat.
Tauvene iit tau taleep ila nugh tooni ne, aat tapait eeza izala le izala kat.
Nugh tooni, ene igheen izala loloz tooni patabuyaaŋ Zion.
Loloz tawe, ene paghuuna ve izala kat.
Tamtamon tisov to taan lolozi poia pa loloz Zion ve tipaiti.
Pasaa, ene Maaron tauu niia to lepoogh. Nugh to kinik tiina igheen ta sewe.
3 Tamtamon tiwatagh: Maaron iponpoon nugh tooni imin didiiŋ ariaaŋa.
I ilepleep ta sewe ve imin sigheu pazi.
Tauta tamtamon to nugh tawe tileep poia.
4-5 Kinik siriv tilup zi tighe tigham malmal pa Maaron nugh tooni.
Eemon saawe tau tilam tighita, yes tirur pani, ve tiroi, ve tighau tila.
6-7 Roiŋ tiina igham zi le tisaŋeeŋ imin zilivaa tau apozi iyavyav pa popaaŋ.
Ve yo uvaghamun zi le tisaghat kat, imin waaŋ tintiina to nugh Tarsis tau tighaughau tila, ve ragh izaa le irav mbirisai zi.
8 Yoova, i Maaron tsiei saksaki ve iŋgin gabua naol isov. Muuŋ, niloŋlooŋ uraat tooni tintiina varuzi mon.
Eemon aazne, nileep ila nugh tooni, ve i igham uraat tauvene ivot muul, le nighit katini pa taumai matamai.
Maaron ipapalot nugh tooni.
Tauvene nugh tawe pale iyooz ariaaŋ taghon taghon gha ila.
9 Maaron, yei nileep ila rumei tsio loolo, ve matamai iŋgalŋgal gabuam tau lolom isaghav tamtamon tsio ve uluul zi.
10 Maaron, varum ilaan irau taan ziige ta naol ne.
Tauta nughmariŋ tipapait ezam.
Yo utotoi tapirim, leso upalot ŋgar duduuŋa.
11 Gabizooŋ tsio, ene iduduuŋ mon.
Tauvene tamtamon tisov to nugh Zion, tomania nugh nugh to Yudea lolozi poia kat ve tintinizi.
12 Yam aburig ve alaghlaagh ila nugh Zion loolo.
Ala aghita didiiŋ ariaaŋa tau ilivut nugh na.
13 Anin ruum dabazi mamalaua tau yes zaaba tiyozyooz ila to tiyeel koiazŋa.
Ve matamim ila pa ruum ariaŋazi to zaaba tiyooŋ ila ve tigham malmal.
Leso yam aat asavia nugh tane pa paaghu tsiam tau pale tivot murei.
14 Pale asaav pazi tauvene: “Maaron toit tane, i ariaaŋa imin nugh Zion.
I ileep irau saawe.
Ve i pale imuuŋ pait, ve itotoi eez pait taghon taghon gha ila.”