55
Suŋuuŋ to tamtamon tau iitete ighur koi pani
Mbouŋ to David
Ŋeer tau imuuŋ pa mbouŋ na, aat isaav pa tamtamon to tirav gita ve timbou mbouŋ tane
1 O Maaron, ughur taliŋam pa suŋuuŋ tsiau.
Yau nataŋ rarai ghom: Lolom isaghatin ghau ve uul ghau. Uŋgooz naghom payau sov.
2 Ulooŋ suŋuuŋ tsiau tane, ve uul ghau.
Pa pataŋani naol igham ghau le isooŋ ghau kat.
Tauta lolog bubu ve tapirig isov.
3 Koiagŋa aliŋazi izazaa, ve tigham saveeŋ paroiŋ payau.
Zeran sasaghati tawe tigham pataŋani tiina payau tighe titatan ghau.
Atezi yavyav payau, ve tighur koi payau kat.
4 Paita namaat tane. Tauvene ateg ipaparav, ve naroi kat.
5 Roiŋ tiina igham ghau le tinig irur, ve punitag izi.
6 Tauvene napasawal naghe: “Oyai, leg bageg imin mbuun, o poi!
Leso naroov naghau nala nugh malau, ve namariau.
7 Pale nala nala le nala nugh ŋginaaŋa ta malau geeg we, ve nail niag poia eta to naleep pani.
8 Onoon kat, imin ta leg bageg imin man, kanaŋ rekia mon naghau nala ve nail niag eta to yoŋgaaŋ.
Leso naleep ta sewe, ve nasaŋan le pataŋani tane isov. Pasaa, ene imin naleep ila uman ve yaghur tiina loolo.”
9 Tiina tsiau, ukau zeran sasaghati tawe saveeŋ toozi, leso ighur anooŋa sov. Ve upasov zi gha tilalez.
Pa yau naghita ŋgar to ghamuuŋ malmal ve zoraaŋ saveeŋ ivon kat ila nugh tiina tane loolo.
10 Mboŋ ve mataaz, ŋgar tauvene ivotvot ila nugh loolo.
Nugh tane ivon kat pa ŋgar sasaghati naol ve pataŋani.
11 Onoon kat, tamtamon tivaghamunia lepoogh to nugh le isaghat kat.
Tamtamon to nugh tane, isaav ighe tilup zi izi maaran to tigharaat saveeŋ, ma tiraukol, ene monmon titatan zetazŋa ve titombaan zi, leso tium gabua toozi. Ŋgar toozi tawe, tipulpuli mako.
12 Imin ta koiag eta ivelegh ghau, kanaŋ poia. Pataŋani tauvene, yau irau nabaado.
Ve imin ta tamtamon ite paam tau ighur koi payau na, maata tatanin ghau, kanaŋ poia.
Pasaa, tamtamon tauvene, yau irau nayooŋ pani.
13 Eemon mako. Ena yo ta muuŋ, naghit ghom naghe ituru ŋgar toit eemon.
Ve naghe pa yo ŋeer tsiau, ve etag duduuŋ.
14 Ve tinig irav ilat tsio, ve naghita ituru lupuuŋ toit poia.
Ve muuŋ, itiŋa eval tiina taluplup ghiit pa suŋuuŋ ila Maaron rumei tooni loolo.
Eemon aazne, yo uzi gha umin koiag.
15 Maaron, koiagŋa lolozi ve ruum toozi, ene ivon pa ŋgar sasaghati naol.
Upateeŋ zi pa mateegh, o poia.
Naghe tileep matazi yaryaare ve tizila nugh to mateegha.
16 Tauvene yau aat napoi Maaron to iuul ghau.
Yau nawatagh: Yoova pale igham mulin ghau pa pataŋani tsiau.
17 Saawe isov, yau nataŋ raraini pa mboŋoozo, zegmatuugh, ve ravrav, ve navotia pataŋani tsiau pani.
Ve i pale ilooŋ aliŋag, ve iuul ghau.
18 Onoon, koiagŋa katini tilup zi tighe tigham malmal payau, ve titatan ghau.
Eemon Maaron pale ipas ghau ila nimazi, ve naleep poi.
19 I pale ilooŋ suŋuuŋ tsiau, ve itatan zi.
Pasaa, muuŋ geeg ve ilam, i ilepleep ila niia to ghamuuŋ pooz.
Ve itortoor ŋgar tooni mako.
Tauvene yes tau tiroi pani mako, ve ŋgar toozi iyaryaaŋ tighe tizoor i aliiŋa na, i pale itatan zi.
20 Etag tau muuŋ yeiru niluplup ghei na, ighita saveeŋ mbuaaŋ tooni imin kaut sorok.
Tauta ireu saveeŋ tooni, ve igham malmal pa zeetŋa tau muuŋ yesŋa lupuuŋ toozi eemon na.
21 Saveeŋ tooni, ene poia ve ŋgoreeŋa kat.
Eemon ila loolo, i ighe igham malmal.
Talooŋ saveeŋ tooni tawe, ve taghe pa i ighe igham loloon poia.
Eemon mako. Saveeŋ tau ivot ila aavo na, iŋgal tamtamon imin mbuzaagh.
22 Saa gabua ma pataŋani tau ighe ivot payo na, ughur zi tila Yoova niima.
I pale ipariaaŋ ghom, ve ikis ghom uleep poi.
Pasaa, i maata iŋgalŋgal zeran duduŋazi.
Irau ipul zi titap pa tovaaŋ eta ne mako.
23 Eemon zeran karomŋa, ve yes tau tiliŋliŋ siŋ pa tamtamon na,
Maaron, yo pale urav motin saawe toozi tuuku,
ve usik zi tizila nugh to mateegha.
Ve yau, o nanumeer ghom naghe pale uul ghau.