7
Mbouŋ to ŋeer tau koiŋa tiŋgal saveeŋ pani
Mbouŋ to David
Ŋeer ee, eeza Kus. Puughu tooni ivot ila to Benyamin. I iŋgal saveeŋ sorok pa David, ve David imbou mbouŋ tane
1 Yoova, yo Maaron tsiau. Yau nayooŋ ilat tsio.
Zeran sasaghati tigham taghon ghau tighe tivaghamun ghau. Uul ghau ve ugham mulin ghau ila nimazi.
2 Ighe mako, yes pale tirav ghau, ve tivaghamun ghau imin laion iraŋgat tamtamon, le ŋgiira ŋgiira.
Pasaa, leg etag eta to igham mulin ghau ne mako.
3 O Yoova, Maaron tsiau, zeran tau tighe tigham saghatin ghau, yau nagham sosor eta pazi mako.
4 Tamtamon tau yeŋa nimbu saveeŋ to nivalupu ghei nimin eemon na, yau nagham ŋgar saghati eta pazi mako.
Ve yes tau tighur koi payau sorok na, yau naum gabua toozi eta mako.
5 Isaav ighe yau nagham sosor tauvene, ene poia pa koiagŋa tigham taghon ghau ve tikis ghau,
ve tivaghaaz ghau ila taan ve nagheen ila ŋgaupup.
6 Yoova, uburig toman atem yavyav, ve ureu koiagŋa. Pa atezi yavyav kat payau.
Maaron tsiau, uburig rekia mon ve uul ghau. Ughur atuya iŋarui koiagŋa pa ŋgar tau yes tighamu na.
7 Uyau tamtamon tisov tilam tilup zi ila yo naghom.
Uleep ila niam to ghamuuŋ pooz izi nugh sambam, ve ugham pooz pazi.
8 Yoova, yo ugabiiz tamtamon to nugh nugh, ve ughur atuya pazi.
Ugabiiz ghau ve upaghazoŋai ghau ila tamtamon matazi, leso tiwatagh tighe yau ŋeer duduŋag, ve gabuag tomania ŋgar tsiau isov, ene poia mon.
9 Maaron, ŋgar tau yo ughamghamu na, ene iduduuŋ mon. Ve yo uwatagh katin tamtamon lolozi ve ŋgar toozi.
Zeran sasaghati tau tighamgham malmal na, upasov ŋgar toozi saghati tawe.
Ve upalot zeran duduŋazi, leso tiyooz ariaaŋ.
10 Maaron, yo mon ta umin sigheu payau.
Yes tau ŋgar duduuŋa igheen ariaaŋ ila lolozi na, yo ugham mulin zi pa pataŋani toozi.
11 Maaron, gabizooŋ tsio, ene iduduuŋ mon.
Saawe isov, yo utotoi aatyavyav tsio pa zeran sasaghati.
12 Tamtamon tau ighe titoor ŋgar toozi mako,
ene pale Maaron ipot mbuzaagh ve iyool paneegh tooni to ighur atuya pazi.
13 I igharaat zaab tooni pataghaaŋ to irav zi.
Ve igharaat paneegh tooni natŋa toman yav, leso ivanegh zi.
14 Zeran sasaghati timin livaa tau aapo ve ighe ipoop. Pasaa, lolozi ivon pa ŋgar sasaghati naol tau tighe tigham pa tamtamon.
Ve murei, mako anooŋa to ŋgar tau igheen ila lolozi na ivot ighazooŋ. Ene karom naol to tivaghamunia tamtamon.
15 Ŋeer tau ighe itai puura pa tamtamon eta,
ene pale tauu itap izila puura tana.
16 Ŋgar saghati tau i ighe igham pa tamtamon, ene pale imuul pa tauu.
Ve malmal tau i ighe igham pazi, ene pale ivaghamunia i tauu.
17 Yau lolog poia pa Yoova, ve napakuru pa ŋgar tooni duduuŋa.
Yau nambou mbouŋ to napait i eeza.
Pa Yoova, i Maaron tiina kat tau iliiv zimaronŋa tisov.