72
Yes Israel tighason Maaron to ipalot kinik toozi
Mbouŋ to Solomon
1 O Maaron, upaduduuŋ kinik tsiei, ve uule to itaghon ŋgar tsio duduuŋa.
Leso iyooz pa tamtamon tsio, ve igharaat pataŋani toozi le iduduuŋ.
2 Ve igabiiz poghania tamtamon tsio, ve igharaat saveeŋ toozi itaghon ŋgar duduuŋa.
Ve iyooz pa yes mbolaaŋa ve yes tau lezi ezazi mako na, ve iuul zi pa pataŋani toozi.
3 Nighe lepoogh poia ivot irau loloz tisov to nugh tane. Ve nugh mbua mbua tighita anooŋa to ŋgar duduuŋa.
4 Ugham kinik tsiei iyooz pa yes tau lezi ezazi mako na, ve iparav pazi ariaaŋ.
Ve yes tau mbolaaŋ igham zi na, i aat iuul zi.
Eemon yes tau titatan tamtamon ve tighurghur pataŋani pazi na, i aat itatan zi le tapirizi isov kat, o poia.
5 Maaron, tamtamon tsio pale tiroi payo ve titaghon ŋgar tsio taghon taghon gha ila, imin aaz ve kaiyo tau tigheen irau saawe.
6 Nighe kinik tsiei iuul tamtamon tileep poi, imin uman tau itap izi ila uum, ve ipabees taan, ve igham aniiŋ itum poi.
7 Saawe tau i iŋgin ghei, nighe ŋgar duduuŋa ve ŋgar luuma ivotvot imin tiina.
Leso tamtamon tileep poi ila ila le saawe isov, ve taghita kaiyo muul mako.
8 Kinik tsiei aat iŋgin nugh tiina kat. Te ziige ee pale imin ŋgat pani, ve ila ivool pa te ziige ite.
Ve yaa Euprates pale imin ŋgat pani, ve ila ila le irau taan ziige ta naol ne.
9 Yes tau tileep izi nugh ŋginaaŋa na, pale tilam ve tiput aghezi pani. Ve koiŋa pale titap tizi ila naagho ve tipel zi ila ŋgaupup. Pasaa, tirau gabua eta muul mako.
10 Ve yes kinik to Tarsis tomania yes kinik tau tileep irau sisi tisov na pale tilam ve tigham gabua popoia siriv pa kinik tsiei to tipakuru.
Yes kinik tau tiŋgin taan sirivu to Arabia ve Etiopia paam, pale tilam ve tigham gabua popoia pani. Leso titotoi tighe yes pale tileep ila i saamba.
11 Nighe kinik tisov tilam tiput aghezi pa kinik tsiei, ve tileep ila i saamba.
Nughmariŋ tibees pani, o poia
12 Pasaa, saawe tau yes mbolaaŋa tipoii pa uleeŋ, i ilooŋ taŋiiz toozi.
Ve yes tau tileep saghat ve lezi uleeŋa eta mako na, i iuluul zi pa pataŋani toozi.
13 I loolo isaghatin yes mbolaaŋa ve yes tau tapirizi imbool na,
ve ighamgham mulin zi pa pataŋani toozi. Leso tileep poi.
14 Isaav ighe tamtamon titatan zi ve tivaghamun zi, i iyozyooz pazi, ve ighamgham mulin zi ila koiazŋa tawe nimazi.
Pasaa, i loolo pazi kat. Tauvene irau imarar zi ve siŋ toozi imaliŋ sorok ne mako.
15 Maaron, upalot kinik tsiei, leso ileep malau izi taan.
Ve yes Arabia aat tigham le maet gol tau ŋgalaaŋa kat.
Ve saawe isov, tamtamon aat tighur kinik tsiei ila suŋuuŋ toozi, ve tighason Maaron to ipaloti ve ighur poia tooni izaa tooni.
16 Maaron, ugham aniiŋ katini ivot ila taan tsiei le irao uum tsiei ta loloz we.
Ve wit anooŋa katini ivot ve ayazi kalkalia ilala ilamlam, imin yes Lebanon toozi.
Ve tamtamon tauvene paam. Nugh tsiei tisov aat timasa timin naol,
imin kikiliiŋ tau isaas le itav taan.
17 Kinik tsiei eeza pale ighengheen tauvene taghon taghon gha ila.
Eeza tiina pale igheen irau saawe isov, imin aaz tau monmon ighazghaaz.
Pasaa, i pale imin eez pa nughmariŋ, leso poia to Maaron izaa toozi.
Nugh nugh pale tighita kinik tsiei ve tipaiti tighe poia to Maaron igheen tomani.
18 Tapait Yoova!
I Maaron to iit Israela!
I mon ta ighamgham uraat ŋgeretazi tintiina. Uraat tana, maata ite.
19 Tapait eeza pa tapiri ve poia tooni irau saawe!
Tamtamon tau tileep irau taan na, pale tighilaalo tighe i eeza tiina pa tapiri ve poia tooni. Onoon le onoon kat!
20 Suŋuuŋ to Yesi naatu David, tauta ilam imuul ta sene.