9
Maaron iuluul tamtamon tau tileep toman pataŋani
Mbouŋ to David.
Paesiiŋ ila pa ŋeer tau imuŋmuuŋ pa mbouŋ na tauvene: Mbouŋ tane aliiŋa ‘Almut Laben’ (o ‘Mateegh to naatu.’)
1 O Yoova, yau napait ghom pa poia tsio toman lolog isov.
Ve naghe navotia uraat ŋgeretazi tau yo ughamgham zi na. Uraat tana, maata ite. Tamtamon tighita le ŋgar toozi imbool.
2 Yau lolog poia kat ve tintinig payo.
Yo Maaron tiina tau uliiv zimaronŋa tisov.
Tauvene yau aat nambou ve napait yo ezam.
3 Saawe tau koiagŋa tighit katin tapirim, yes titoor zi ve tighe tighau.
Eemon titaptap tizi le tisov timataar.
4 Yo uleep ila niam to ghamuuŋ pooz, ve ugagabiiz tamtamon. Ve gabizooŋ tsio, ene iduduuŋ mon.
Yo ughit ghau ughe ŋgar tsiau ene iduduuŋ. Tauta uul ghau pa saveeŋ tsiau.
5 Yo uyaon nugh nugh tau tiwatagh ghom mako na, ve ureu tamtamon sasaghatizi gha tilalez.
Yo umus ezazi ilale wa.
Irau tamtamon matazi iŋgal zi muul ne mako.
6 Koiagŋa tisaghat wa. Pale tileep tauvene taghon taghon gha ila.
Ve nugh toozi paam, yo ureu mbirisai zi le tisov tilalez.
Tauvene tamtamon pale lolozi iveghai zi kat.
7 Yoova ileep ila niia to ghamuuŋ pooz ve iŋginŋgin gabua irau saawe.
I igharaat niia tawe ve isasaŋan pa gabizooŋ tamtamon.
8 I igagabiiz tamtamon tisov to taan, ve ighagharaat pataŋani toozi itaghon ŋgar duduuŋa.
Ve igham pooz pa nughmariŋ itaghon ŋgar raraate mon.
9 Yoova imin ruum ariaaŋa to ipoon yes tau koiazŋa tighur pataŋani pazi na.
Ighe pataŋani ivot, mako i imin lezi nugh to yoŋgaaŋ.
10 Yoova, yes tau tiwatagh katin ghom na, tinumeer ghom.
Pasaa, zeran tau tizuari zi payo, yo irau ughur murim pazi mako.
11 Ambou mbouŋ to apakur Yoova.
I ileep izi nugh Zion, ve ighamgham pooz.
Uraat tintiina tau i ighamgham zi na, avotia varuzi le irau nughmariŋ.
12 Yes tau tiliŋ siŋ pa tamtamon na, Yoova irau ighurghur zi mako. Pale iyat ŋgar toozi tawe.
Ve tamtamon tau tinumeera ve tibadbaad pataŋani na, i irau loolo iveghai taŋiiz toozi mako. I pale iuul zi.
13 O Yoova, ughita pataŋani tau koiagŋa tigham payau ne!
Yes tivaghamun ghau kat le naghe namaat.
Lolom isaghatin ghau, ve upas ghau navot pa pataŋani tane.
14 Leso nayooz ila ataman to nugh Zion, ve nasavia uraat tintiina tisov tau yo ughamgham zi payau. Ve napait ghom toman tintinig. Pasaa, yo ta ugham mulin ghau.
15 Nugh nugh tau tiwatagh ghom mako na, titai puura leso tikis tamtamon. Eemon tauzi titap tizila.
Puugh tau tiraaro pa saghavuuŋ tamtamon na, ene tauzi tighoon ila.
16 Yoova igabiiz tamtamon ve ighur atuya pazi itaghon ŋgar duduuŋa. Leso itotoi tauu pa tamtamon ve tiwataghi.
Liis tau zeran sasaghati tighuru na, iliis tauzi.
17 Zeran sasaghati ve nugh nugh tau tighur murizi pa Maaron,
yes pale tisov timaat gha tizila mateegha niazi.
18 Eemon yes mbolaaŋa tau tirau gabua eta mako na, Maaron irau loolo iveegh pazi ne mako.
Ve yes tau tibadbaad pataŋani ve tighurghur matazi pa uleeŋ to Maaron na, i irau ipul zi tileep saghat le alok ne mako. I pale iuul zi.
19 Yoova, ughita. Tamtamon sorok to taan tigham aghezi payo. Upul zi tigham taliiŋzizi sov. Utatan zi.
Upayooz yes nugh nugh ila yo naghom,
ugabiiz zi, ve ughur atuya pazi.
20 O Yoova, ugham ŋgar eta pazi.
Leso tiroi payo, ve tiwatagh tighe yes tamtamon sorok to taan mon.
Tapirizi irau ghom mako.