11
Lázaro cʉ̃ wẽrĩꞌque niꞌi
1 Jesú Jordã́ siaquijipʉ nirĩ cura Lázaro wãmetigʉ cʉ̃ ya macã Betaniapʉ dutitigʉ weecʉ niwĩ. Cʉ̃ maꞌmiosãnumia María, Marta na quẽꞌrã ti macãpʉta nicãrã niwã.
2 Co Maríata niwõ Jesure cʉ̃ dʉꞌpocãrĩpʉ ʉꞌmʉtise piopeo, co poari meꞌrã tuucoeꞌco.
3 Lázaro maꞌmiosãnumia cʉ̃ pũrõ nicã ĩꞌarã, ãpẽrã meꞌrã Jesure queti oꞌócãrã niwã:
—Wiogʉ, mʉꞌʉ meꞌrãcjʉ̃ ʉpʉtʉ waro nimi, ni oꞌócãrã niwã.
4 Jesú te quetire tʉꞌogʉ, niwĩ:
—Cʉ̃ dutitigʉ wẽrĩyapatidijasome. Cʉ̃ tojo wẽrĩse meꞌrã Õꞌacʉ̃ tutuasere ĩꞌanoꞌrõsaꞌa. Yʉꞌʉ Õꞌacʉ̃ macʉ̃ quẽꞌrãrẽ masã aꞌtiro nirãsama: “Cʉ̃ tutuagʉ nimi”, nirãsama, niwĩ.
5 Jesú narẽ maꞌimigʉ̃, maata waꞌatiwĩ.
6 Te quetire tʉꞌóca beꞌro pʉa nʉmʉ topʉre tojaqueꞌanemowĩ tja.
7 Beꞌro cʉ̃ ʉ̃sãrẽ niwĩ:
—Teꞌa Judeapʉ tja.
8 Ʉ̃sã cʉ̃rẽ niwʉ̃:
—Ʉ̃sãrẽ buꞌegʉ, sõꞌonícatero tocjãrã judío masã ʉ̃tãperi meꞌrã mʉꞌʉrẽ doquewẽjẽsĩꞌrĩmiwã. ¿Mʉꞌʉ topʉ waꞌasĩꞌrĩsari tja?
9 Jesú yʉꞌʉ pacʉ daꞌrase cũuꞌquere queoro peꞌogʉsaꞌa; tojo weerã yʉꞌʉre wẽjẽsome yujupʉ nígʉ̃, queose meꞌrã aꞌtiro werewĩ:
—Niꞌcã ʉmʉcore doce horari boꞌreyuꞌu. Marĩ ʉmʉcopʉ sijarã, bʉrʉqueꞌatisaꞌa. Aꞌti ʉmʉco boꞌreyucã, tojo weesaꞌa.
10 Naꞌitĩꞌarõpʉ sijarã pũrĩcã, na waꞌaro bajutise ye buꞌiri pʉꞌatuu, bʉrʉqueꞌasama. Na sĩꞌose marĩse ye buꞌiri tojo waꞌasama.
11 Beꞌro Jesú ʉ̃sãrẽ niwĩ:
—Marĩ meꞌrãcjʉ̃ Lázaro cãrĩa waꞌapʉ. Yʉꞌʉ cʉ̃rẽ wãꞌcõgʉ̃ waꞌagʉsaꞌa.
12 Ʉ̃sã cʉ̃rẽ niwʉ̃:
—Wiogʉ, cʉ̃ cãrĩcã, añu nisaꞌa. Cʉ̃ cã́rĩ́ca beꞌro soo, yʉꞌrʉgʉsami.
13 Jesú Lázaro cãrĩa waꞌapʉ nígʉ̃, wẽrĩa waꞌapʉ nisĩꞌrĩgʉ̃ weecʉ nimiwĩ. Ʉ̃sã peꞌe cãrĩse warore wãcũcãti.
14 Ʉ̃sã tʉꞌoticã, Jesú ʉ̃sãrẽ diacjʉ̃ werewĩ:
—Lázaro wẽrĩa waꞌapʉ.
15 Marĩ topʉ niticã, añuꞌu. Yʉꞌʉ eꞌcatiꞌi; añu nirõsaꞌa mʉsãrẽ. Totá mʉsã nemorõ ẽjõpeorãsaꞌa. Teꞌa marĩ cʉ̃rẽ ĩꞌarã, niwĩ.
16 Tomás “Sʉꞌrʉaꞌcʉ” na ninoꞌgʉ̃ ʉ̃sãrẽ niwĩ:
—Marĩ quẽꞌrã teꞌa. Jesure na wẽjẽcã, cʉ̃ meꞌrãta wẽrĩrã waꞌarã, niwĩ.
Jesú wẽrĩꞌcãrãrẽ masõ, catise oꞌose niꞌi
17 Jesú Lázaro ya macãpʉ etagʉ, cʉ̃rẽ ʉ̃tã tutipʉ sĩosõrõcũuꞌquere tʉꞌowĩ. Cʉ̃rẽ tojo wééca beꞌro baꞌparitise nʉmʉrĩ yʉꞌrʉcaro niwʉ̃.
18 Lázaro ya macã Betania Jerusalẽ́ pʉꞌtoacã niwʉ̃. Pʉa kilómetro, ape kilómetro deco yoaro niwʉ̃.
19 Tojo weerã Jerusalẽ́cjãrã pãjãrã Marta, Maríare ĩꞌawãcũtutuato nírã na tiropʉ waꞌacãrã niwã.
20 Marta Jesú etasere tʉꞌogo, cʉ̃rẽ põtẽrĩgõ ejawõ. María peꞌe wiꞌipʉ tojaco niwõ.
21 Marta Jesú tiro etago, cʉ̃rẽ niwõ:
—Wiogʉ, mʉꞌʉ aꞌtopʉ nicã, yʉꞌʉ acabiji wẽrĩtiboapĩ.
22 Yʉꞌʉ masĩꞌi, Õꞌacʉ̃ nipeꞌtise mʉꞌʉ sẽrĩsere oꞌosami, niwõ.
23 Jesú core niwĩ:
—Mʉꞌʉ acabiji masãgʉ̃sami.
24 Co cʉ̃rẽ niwõ:
—Yʉꞌʉ masĩꞌi, aꞌti ʉmʉco peꞌticã, nipeꞌtirã wẽrĩꞌcãrã masãrĩ curapʉ masãgʉ̃sami.
25 Jesú core niwĩ:
—Yʉꞌʉ wẽrĩꞌcãrãrẽ masõ, catise oꞌogʉ niꞌi. Yʉꞌʉre ẽjõpeogʉ wẽrĩꞌcʉpʉ nimigʉ̃, catigʉsami tja.
26 Niꞌcãrõacãrẽ catirã yʉꞌʉre ẽjõpeorã wẽrĩrã, wẽrĩdojasome. ¿Mʉꞌʉ aꞌtere ẽjõpeoti?
27 Co cʉ̃rẽ niwõ:
—Wiogʉ, mʉꞌʉrẽ ẽjõpeoꞌo. Mʉꞌʉ Õꞌacʉ̃ beseꞌcʉ Cristo, Õꞌacʉ̃ macʉ̃ niꞌi. Mʉꞌʉ “Niꞌcʉ̃ masʉ̃ aꞌtiacjʉ niapʉ” níꞌcʉ niꞌi, niwõ.
Lázaro masãpe pʉꞌto Jesú cʉ̃ utiꞌque niꞌi
28 Marta Jesú meꞌrã ucṹca beꞌro co acabijo Maríare pijigo waꞌawõ. Core ãpẽrã tʉꞌotiropʉ aꞌtiro nico niwõ:
—Marĩrẽ buꞌegʉ etatojami. Mʉꞌʉrẽ pijidutiami.
29 Co tojo nicã tʉꞌogo, cʉ̃ tiropʉ maata aꞌtico niwõ.
30 Jesú Martare põtẽrĩꞌcaropʉta niwĩ. Macãpʉre piꞌatiwĩ yujupʉ.
31 María co ya wiꞌipʉre sojaro meꞌrã wijaatico niwõ. Tojo weecã ĩꞌarã, judío masã topʉ sijarã ejaꞌcãrã core sirutucãrã niwã. “Co acabiji masãpepʉ utigo waꞌago weesamo”, ni wãcũcãrã nimiwã.
32 Co peꞌe Jesú tiro etago, cʉ̃ ye dʉꞌpocãrĩ tiropʉ paamuꞌrĩqueꞌawõ. Cʉ̃rẽ niwõ:
—Wiogʉ, mʉꞌʉ aꞌtopʉ nicã, yʉꞌʉ acabiji wẽrĩtiboapĩ.
33 Jesú co uticã ĩꞌagʉ̃, core sirutuꞌcãrã uticã ĩꞌagʉ̃, ʉpʉtʉ bʉjaweti, pajañaꞌwĩ.
34 Narẽ sẽrĩtiñaꞌwĩ:
—¿Noꞌopʉ cʉ̃rẽ sĩosõrõcũurĩ? niwĩ.
Na cʉ̃rẽ “Teꞌa ĩꞌarã”, niwã.
35 Topʉ waꞌagʉ, Jesú quẽꞌrã utiwĩ.
36 Cʉ̃ uticã ĩꞌarã, niꞌcãrẽrã judío masã niwã:
—Ĩꞌaña. ¿Ʉpʉtʉta cʉ̃rẽ maꞌipari? niwã.
37 Ãpẽrã aꞌtiro niwã:
—¿Ãꞌrĩ caperi ĩꞌatigʉre yʉꞌrʉoꞌcʉ Lázarore wẽrĩcã weetibopari? niwã.
Jesú Lázarore wẽrĩꞌcʉpʉre masõꞌque niꞌi
38 Jesú pũrõ bʉjawetise meꞌrã Lázaro masãpepʉ waꞌawĩ. Ti masãpe ʉ̃tã tuti niwʉ̃. Ti tuti sope pʉꞌto ʉ̃tãgãjo meꞌrã cãꞌmotaꞌanoꞌwʉ̃.
39 Jesú narẽ niwĩ:
—Tuupãoña.
Marta cʉ̃rẽ niwõ:
—Wiogʉ, ʉ̃rĩ nisami. Cʉ̃ wẽ́rĩ́ca beꞌro baꞌparitise nʉmʉrĩ yʉꞌrʉꞌʉ.
40 Jesú core niwĩ:
—Mʉꞌʉrẽ weremiapʉ. “Yʉꞌʉre ẽjõpeogo, Õꞌacʉ̃ tutuasere ĩꞌagõsaꞌa”, nimiapʉ, niwĩ.
41 Beꞌro na ti tutire pãowã. Jesú ʉꞌmʉsepʉ ĩꞌamorõ, Õꞌacʉ̃rẽ niwĩ:
—Pacʉ, yʉꞌʉ sẽrĩꞌquere mʉꞌʉ tʉꞌotojapʉ. Añuꞌu.
42 Yʉꞌʉ masĩꞌi, mʉꞌʉ yʉꞌʉre tʉꞌonuꞌcũcãꞌa. Ãꞌrã aꞌtopʉ nuꞌcũrã ye buꞌiri sẽrĩꞌi. Mʉꞌʉ yʉꞌʉre oꞌóꞌquere masĩato nígʉ̃, tojo weeꞌe.
43 Cʉ̃ tojo níca beꞌro pũrõ caricũwĩ:
—Lázaro, wijaatia, niwĩ.
44 Tojo nicãta, cʉ̃ wijaatiwĩ. Cʉ̃ ye omocãrĩ, cʉ̃ ye dʉꞌpocãrĩrẽ suꞌti meꞌrã dʉꞌrenoꞌcʉ niwĩ. Cʉ̃ diapoa quẽꞌrã suꞌti casero meꞌrã omanoꞌcaro niwʉ̃. Tojo weegʉ Jesú narẽ niwĩ:
—Cʉ̃rẽ pãa, duꞌuoꞌoya.
Judío masã wiorã Jesure wẽjẽsĩꞌrĩꞌque niꞌi
(Mt 26.1-5; Mr 14.1-2; Lc 22.1-2)
45 Pãjãrã judío masã María meꞌrã baꞌpatiwãꞌcãtiꞌcãrã cʉ̃ tojo weesere ĩꞌarã, Jesure ẽjõpeowã.
46 Ãpẽrã peꞌe ẽjõpeoronojõ nírã, cʉ̃ tojo weeꞌquere fariseo masãpʉre weresãrã waꞌawã.
47 Tojo weerã fariseo masã, tojo nicã paꞌia wiorã nerẽcãrã niwã. Na paꞌia wiogʉ cʉ̃ meꞌrãcjãrã nirõpʉ nerẽcãrã niwã. Aꞌtiro nicãrã niwã:
—¿Deꞌro weerãsari marĩ? Jesú peje añuse weeĩꞌogʉ̃ weemi.
48 Marĩ cʉ̃rẽ cãꞌmotaꞌaticã, nipeꞌtirã cʉ̃rẽ ẽjõpeorãsama. Romano masã wiorã aꞌtirãsama. Aꞌti, marĩ wiorã nise, Õꞌacʉ̃ wiꞌi quẽꞌrãrẽ cõꞌarãsama.
49 Niꞌcʉ̃ na meꞌrãcjʉ̃ Caifá wãmetigʉ ti cʉ̃ꞌmarẽ paꞌia wiogʉ nicʉ niwĩ. Cʉ̃ narẽ nicʉ niwĩ:
—Mʉsã ne tʉꞌomasĩweꞌe.
50 Nipeꞌtirã masã marĩ ya diꞌtacjãrã wẽrĩcã, ñaꞌa nibosaꞌa. Aꞌtiro weecã, añusaꞌa. Niꞌcʉ̃ nipeꞌtirã ye buꞌiri wẽrĩbosacã, marĩrẽ añurõsaꞌa, niwĩ.
51 Caifá cʉ̃ basu wãcũse meꞌrã tojo niticʉ niwĩ. Ti cʉ̃ꞌma cʉ̃ paꞌia wiogʉ nicã, Õꞌacʉ̃ cʉ̃rẽ tojo wãcũse oꞌocʉ niwĩ. Tojo nígʉ̃, Judea diꞌtacjãrãrẽ Jesú wẽrĩbosagʉsami nígʉ̃, tojo nicʉ niwĩ.
52 Jesú ti diꞌtacjãrã diaꞌcʉ̃rẽ wẽrĩbosaticʉ niwĩ. Nipeꞌtirã Õꞌacʉ̃ põꞌrã cʉ̃rẽ ẽjõpeoajãrẽ noꞌo apeye diꞌtapʉ nirã́ quẽꞌrãrẽ wẽrĩbosacʉ niwĩ. Niꞌcã curua weesĩꞌrĩgʉ̃ tojo weecʉ niwĩ.
53 Ti nʉmʉta na nerẽ ucṹca nʉmʉ meꞌrã na Jesure wẽjẽatjere wãcũyucãrã niwã.
54 Na wẽjẽsĩꞌrĩse ye buꞌiri Jesú judío masã ĩꞌorõpʉ sijatiwĩ. Judeapʉ níꞌcʉ wijawãꞌcãwĩ. Niꞌcã macã Efraĩ́ wãmetiri macã yucʉ marĩrõ pʉꞌto nirĩ macãpʉ waꞌawĩ. Ti macãpʉ ʉ̃sã tojawʉ.
55 Titare Pascua judío masã bosenʉmʉ waꞌatjo cãꞌrõacã dʉꞌsawʉ. Pãjãrã masã Jerusalẽ́pʉ waꞌacãrã niwã. Na ti bosenʉmʉ dʉporo na ñaꞌarõ weeꞌquere coeyurã waꞌacãrã niwã.
56 Jesure ĩꞌasĩꞌrĩrã aꞌmacusiacãrã niwã. Õꞌacʉ̃ wiꞌipʉ nírã, aꞌmerĩ sẽrĩtiñaꞌcãrã niwã:
—Mʉsã tʉꞌoñaꞌcã, ¿apetero weegʉ cʉ̃ aꞌtigʉsari?
57 Fariseo masã, paꞌia wiorã masãrẽ aꞌtiro duticãrã niwã:
—Mʉsã Jesú topʉ niapʉ nisere masĩrã, ʉ̃sãrẽ wereya. Na werecã, buꞌiri daꞌreri wiꞌipʉ Jesure miarãti nírã, tojo nicãrã niwã.