9
Jesú caperi ĩꞌatigʉ bajuaꞌcʉre yʉꞌrʉoꞌque niꞌi
1 Jesú cʉ̃ yʉꞌrʉaro niꞌcʉ̃ ʉmʉ caperi ĩꞌatigʉre ĩꞌawĩ. Cʉ̃ wĩꞌmagʉ̃pʉta caperi ĩꞌatigʉ bajuacʉ niwĩ.
2 Cʉ̃rẽ ĩꞌarã, ʉ̃sã Jesure sẽrĩtiñaꞌwʉ̃:
—Ʉ̃sãrẽ buꞌegʉ, ¿deꞌro weegʉ ãꞌrĩ caperi ĩꞌatigʉ bajuapari? ¿Noa ye buꞌiri nipari? ¿Cʉ̃ pacʉsʉmʉa ye buꞌiri o cʉ̃ ye buꞌiri?
3 Jesú ʉ̃sãrẽ niwĩ:
—Cʉ̃ ñaꞌarõ weeꞌque ye buꞌiri niweꞌe. Cʉ̃ pacʉsʉmʉa quẽꞌrã buꞌiri mooma. Cʉ̃ meꞌrã Õꞌacʉ̃ añurõ weesere ĩꞌosĩꞌrĩgʉ̃, cʉ̃rẽ tojo bajugʉ bajuacã weecʉ niwĩ.
4 Niꞌcãrõacã Õꞌacʉ̃ yʉꞌʉre oꞌóꞌcʉ cũuꞌquere weeroʉaꞌa nirĩtero niꞌi. Ñamipʉ marĩ daꞌramasĩtiro weronojõ beꞌropʉ cʉ̃ cũuꞌquere weeta basiotisaꞌa.
5 Yʉꞌʉ aꞌti ʉmʉcopʉ nirĩ cura masãrẽ sĩꞌose weronojõ niꞌi. Yʉꞌʉ narẽ Õꞌacʉ̃ yere masĩcã weeꞌe, niwĩ.
6 Jesú tojo níca beꞌro nucũcãpʉ ʉꞌsecore eꞌocũuwĩ. Beꞌro tere diꞌta morẽsuꞌuro ṍrẽ́mii, caperipʉ tuuwaꞌrewĩ.
7 Beꞌro cʉ̃rẽ niwĩ:
—Siloé wãmetiro na yééca ditarapʉ mʉꞌʉ caperire tuucoegʉ waꞌaya, niwĩ. Siloé “oꞌóꞌcʉ” nisĩꞌrĩrõ weesaꞌa.
Beꞌro cʉ̃ topʉ waꞌa, cʉ̃ caperire tuucoecʉ niwĩ. Cʉ̃ majãmitojatigʉ, añurõ ĩꞌacʉ niwĩ.
8 Cʉ̃ ya wiꞌi pʉꞌtocjãrã, todʉporo cʉ̃ caperi ĩꞌatigʉ nicã ĩꞌaꞌcãrã aꞌtiro nicãrã niwã:
—¿Ãꞌrĩ todʉporopʉ niyeru sẽrĩdujiꞌcʉta nimiba?
9 Niꞌcãrẽrã “Cʉ̃́ta nimi”, nicãrã niwã.
Ãpẽrã peꞌe “Nitimi. Apĩ cʉ̃ weronojõ bajugʉ nimi”, nicãrã niwã.
Cʉ̃ peꞌe “Yʉꞌʉta niꞌi”, nicʉ niwĩ.
10 Na cʉ̃rẽ sẽrĩtiñaꞌcãrã niwã:
—¿Deꞌro weegʉ mʉꞌʉ niꞌcãrõacãrẽ añurõ ĩꞌati?
11 Narẽ yʉꞌticʉ niwĩ:
—Sõꞌonícʉ Jesú wãmetigʉ diꞌta acotise meꞌrã yʉꞌʉ caperire tuuwaꞌre, Siloé ditarapʉ yʉꞌʉre coedutiami. Topʉ waꞌa, yʉꞌʉ coéca beꞌro ĩꞌanʉꞌcãpʉ.
12 Cʉ̃rẽ ninemocãrã niwã tja:
—¿Noꞌopʉ niati cʉ̃?
—Masĩtisaꞌa. Noꞌopʉ nígʉ̃ nisami, nicʉ niwĩ.
Fariseo masã caperi ĩꞌatigʉ yʉꞌrʉonoꞌcʉre sẽrĩtiñaꞌque niꞌi
13 Beꞌro caperi bajunoꞌtiꞌcʉre fariseo masã tiropʉ miacãrã niwã.
14 Jesú cʉ̃rẽ yʉꞌrʉoca nʉmʉ sauru nicaro niwʉ̃.
15 Jesú caperi ĩꞌacã weeꞌcʉre fariseo masã sẽrĩtiñaꞌcãrã niwã:
—¿Deꞌro weegʉ mʉꞌʉ añurõ ĩꞌati?
Cʉ̃ narẽ yʉꞌticʉ niwĩ:
—Niꞌcʉ̃ yʉꞌʉ caperire diꞌta acotise meꞌrã tuuwaꞌreami. Yʉꞌʉ coéca beꞌro añurõ ĩꞌanʉꞌcãpʉ.
16 Niꞌcãrẽrã cʉ̃rẽ aꞌtiro nicãrã niwã:
—Marĩrẽ soodutíca nʉmʉrẽ aꞌtiro weegʉnojõ Õꞌacʉ̃ oꞌóꞌcʉ nitimi. Cʉ̃ marĩrẽ soodutíca nʉmʉrẽ ẽjõpeotisami.
Ãpẽrã peꞌe aꞌtiro nicãrã niwã:
—Cʉ̃ ñaꞌarõ weegʉnojõ nígʉ̃ pũrĩcã, aꞌte añusere weeĩꞌomasĩtiboapĩ, nicãrã niwã. Na mejẽcã diaꞌcʉ̃ wãcũcãrã niwã.
17 Beꞌro na caperi bajunoꞌtiꞌcʉre sẽrĩtiñaꞌcãrã niwã:
—Mʉꞌʉ waro ¿deꞌro niti mʉꞌʉrẽ ĩꞌacã weeꞌcʉre?
Cʉ̃ yʉꞌticʉ niwĩ:
—Yʉꞌʉa, Õꞌacʉ̃ ye queti weremʉꞌtãrĩ masʉ̃ nimi, niꞌi.
18 Judío masã wiorã todʉporopʉ cʉ̃ caperi ĩꞌatiꞌquere ẽjõpeosĩꞌrĩticãrã niwã.
19 Tojo weerã cʉ̃ pacʉsʉmʉarẽ pijio, sẽrĩtiñaꞌcãrã niwã:
—¿Ãꞌrĩ mʉsã macʉ̃ niti? ¿Cʉ̃ wĩꞌmagʉ̃pʉta caperi ĩꞌatigʉ bajuari? ¿Deꞌro weegʉ cʉ̃ niꞌcãrõacãrẽ ĩꞌati?
20 Cʉ̃ pacʉsʉmʉa narẽ yʉꞌticãrã niwã:
—Ʉ̃ʉ, ʉ̃sã macʉ̃ta nimi. Cʉ̃ caperi ĩꞌatigʉ bajuawĩ. Aꞌte diaꞌcʉ̃rẽ ʉ̃sã masĩꞌi.
21 Cʉ̃ niꞌcãrõacã ĩꞌasema masĩtisaꞌa. Cʉ̃rẽ ĩꞌacã weeꞌcʉ quẽꞌrãrẽ masĩtisaꞌa. Cʉ̃ basu yʉꞌtimasĩmi. Cʉ̃ wĩꞌmagʉ̃ mejẽta nimi. Cʉ̃rẽ sẽrĩtiñaꞌña, nicãrã niwã.
22 Cʉ̃ pacʉsʉmʉa uirã, tojo nicãrã niwã. Judío masã wiorã todʉporopʉ aꞌtiro nicãrã niwã: “Noꞌo Jesure ‘Õꞌacʉ̃ cʉ̃ oꞌóꞌcʉ nimi’ nigʉ̃nojõrẽ Õꞌacʉ̃ wiꞌipʉta cõꞌawĩrõnoꞌrõsaꞌa. Cʉ̃ marĩ meꞌrã nisetinemosome”, nicãrã niwã.
23 Tojo weerã marĩrẽ cõꞌarĩ ni uirã, “Cʉ̃ wĩꞌmagʉ̃ mejẽta nimi. Cʉ̃rẽ sẽrĩtiñaꞌña”, nicãrã niwã.
24 Judío masã wiorã caperi bajunoꞌtiꞌcʉre apaturi pijicãrã niwã tja. Cʉ̃rẽ “Õꞌacʉ̃ tʉꞌoropʉre diacjʉ̃ ucũña. Ʉ̃sã masĩꞌi, mʉꞌʉrẽ yʉꞌrʉoꞌcʉ ñaꞌagʉ̃ nimi”, nicãrã niwã.
25 Cʉ̃ narẽ nicʉ niwĩ:
—Cʉ̃ ñaꞌagʉ̃ o añugʉ̃ nígʉ̃ nisami; cʉ̃rẽ yʉꞌʉ masĩtisaꞌa. Aꞌte diaꞌcʉ̃rẽ masĩꞌi. Todʉporopʉre yʉꞌʉ caperi bajunoꞌtiꞌcʉre yʉꞌrʉoami. Niꞌcãrõacãrẽ ĩꞌaꞌa.
26 Cʉ̃rẽ sẽrĩtiñaꞌnemocãrã niwã tja:
—¿Noa mʉꞌʉrẽ tojo weeati? ¿Deꞌro wee mʉꞌʉrẽ ĩꞌacã weeati?
27 Cʉ̃ narẽ yʉꞌticʉ niwĩ:
—Mʉsãrẽ weretojapʉ. Yʉꞌʉre ẽjõpeoweꞌe. ¿Deꞌro weerã mʉsã sẽrĩtiñaꞌnemoti tja? ¿Cʉ̃rẽ sirutusĩꞌrĩti?
28 Cʉ̃ tojo yʉꞌticã tʉꞌorã, cʉ̃rẽ tuꞌticãrã niwã:
—Mʉꞌʉ cʉ̃rẽ sirutuya. Ʉ̃sã pũrĩcã Moisé dutisere siruturãti.
29 Ʉ̃sã masĩꞌi, Õꞌacʉ̃ Moisére ucũcʉ niwĩ. Cʉ̃ peꞌema “Tocjʉ̃pʉ nimi”, niña marĩꞌi.
30 Cʉ̃ narẽ nicʉ niwĩ:
—Aꞌyóne. ¿Mʉsã yʉꞌʉre caperi ĩꞌacã weeꞌcʉre masĩweti?
31 Marĩ añurõ masĩꞌi, Õꞌacʉ̃ ñaꞌarãrẽ na sẽrĩsere yʉꞌtitisami. Cʉ̃rẽ ẽjõpeorã, cʉ̃ ʉaro weerã́ diaꞌcʉ̃rẽ yʉꞌtisami.
32 Ne niꞌcãti “Niꞌcʉ̃ wĩꞌmagʉ̃pʉta caperi ĩꞌatigʉ bajuaꞌcʉre ĩꞌacã weeapʉ” nicã tʉꞌonoꞌña marĩꞌi.
33 Cʉ̃ Õꞌacʉ̃ oꞌótiꞌcʉ nígʉ̃, yʉꞌʉre caperi ĩꞌacã weetiboapĩ.
34 Na cʉ̃rẽ nicãrã niwã:
—¿Mʉꞌʉ ne waropʉta ñaꞌagʉ̃ bajuaꞌcʉ mijĩ ʉ̃sãrẽ weresĩꞌrĩti? Cʉ̃ na meꞌrã nisetimiꞌcʉre na meꞌrã ninemodutiticãrã niwã.
Jesú masãrẽ “Caperi bajunoꞌtirã weronojõ nima” nise niꞌi
35 Jesú caperi bajunoꞌtiꞌcʉre na cõꞌawĩrõꞌquere tʉꞌowĩ. Tojo weegʉ cʉ̃rẽ bocaejagʉ, niwĩ:
—¿Mʉꞌʉ Õꞌacʉ̃ macʉ̃ masʉ̃ weronojõ upʉtigʉre ẽjõpeoti?
36 Cʉ̃ Jesure yʉꞌtiwĩ:
—Wiogʉ, ¿noanojõ niti cʉ̃? Yʉꞌʉ cʉ̃rẽ ẽjõpeosĩꞌrĩsaꞌa. Wereya.
37 Jesú cʉ̃rẽ niwĩ:
—Mʉꞌʉ ĩꞌatojaꞌa. Yʉꞌʉ mʉꞌʉ meꞌrã ucũgʉ̃ta niꞌi.
38 Cʉ̃ tojo nicã tʉꞌogʉ, Jesú tiro ejaqueꞌa, cʉ̃rẽ niwĩ:
—Wiogʉ, mʉꞌʉrẽ ẽjõpeoꞌo.
39 Beꞌro Jesú niwĩ:
—Yʉꞌʉ aꞌti turipʉre queoro besegʉ aꞌtiwʉ. Masã na ñaꞌarõ weesere masĩtima. Õꞌacʉ̃ masãrẽ yʉꞌrʉomi nise quẽꞌrãrẽ masĩtima. Tojo weerã caperi bajunoꞌtirã weronojõ nima. Aꞌtere masĩdutigʉ, ẽjõpeocã ʉagʉ aꞌtiwʉ. Ãpẽrã “Õꞌacʉ̃ ye quetire masĩꞌi”, ni wãcũsama. Náta caperi ĩꞌatirã weronojõ dojosama, niwĩ Jesú.
40 Tojo nicã tʉꞌorã, niꞌcãrẽrã fariseo masã cʉ̃ tiropʉ nirã́ aꞌtiro niwã:
—¿Ʉ̃sã quẽꞌrã caperi bajunoꞌtirã weronojõta niti?
41 Jesú narẽ yʉꞌtiwĩ:
—Caperi bajunoꞌtirã weronojõ nírã pũrĩcã, mʉsã buꞌiri moobosaꞌa. Mʉsã “Caperi bajunoꞌo”, nimiba. Tojo weerã buꞌiritirã niꞌi, niwĩ Jesú.