Sepinien xa diamu te
1 Tesalonaeka
?Visi iaxa tetis uvei ak?
Pol xa tehe eloheoh tei na Iesu Kristo tetis uvei ak sangas ni huram hanutap lu e tei e le tei mun AD (huram 51 tetutou ni poten na Iesu). Tetisi e melele xa teta tamu e taon te hal Korin e kakaoen xa be valu nen tengan ha vahithiten longeongen hos usil Iesu Kristo mi moletin xil.
?Visi iaxa tevuli uvei ak tetiamu?
Pol tetis uvei ak teha mi Kristin xil xa lateti e taon te hal Tesalonaeka. E kakaoen xa tehe valu nen, Pol teha tehe taon te hal Pilipae e tehithiten longeongen hos usil Iesu Kristo mi moletin xil. E rut moletin xil latepol texeih mini e latelingi e nim te xeih. Melele xa teta e nim te xeih ak, lul telil. E melele xa latemaen ni ba ven temase, latesikoe xole tengan namei ti mun e hal Pilipae. Ma, Pol xal Saelas lutehe taon te hal Tesalonaeka. E rute ak, rut Siu xil mei latehe elu mi Pol. Ma latehiles nenemien na moletin xil tengan lihol rat Pol ihe reling taon nae te hal Tesalonaeka.
Melele xa Pol tetuxoh taon te hal Korin, teta tetel Kristin xil e rute ak aveti tehe tol e le sav (18). E melele xa tepol e rute ak, Pol telonge xa neketen na Kristin hu xil te hal Tesalonaeka di mot. Misak ni, tetis uvei ak teha mi xil tengan vapet rat nenemien nae e vasuv xat neketen nae.
?Pol tetis uvei ak veneh?
Pol ien tehei tengan vamal ni nenemien nae xa momal tengan Kristin xil ti lihisu ni melele te xeih xil - Kristin xil te hal Tesalonaeka latehisu ni melele te xeih xil e he mol‑Tesalonaeka sav xil. E Pol tehiteni mi xil xa momal xa Kristin xil lihisu ni melele te xeih xil ve neketen nae.
Pol ien tehei tengan vamal ni nenemien nae usil polien nan - Rut Kristin xil te hal Tesalonaeka lateseputut ni Pol latehit di miluvos moletin xil tengan ikila ileh holesok nae xil ra xil. E Pol tehiteni mi xil xa di tesa pispisien nan xil mi xil texoni sanien tang e tenasis xil ti ve mani mu ve neta ngan mun.
Pol ien tehei tengan vamal ni nenemien nae usil mea rilomunen na Kristin xil e itep iaxa Iesu imei rilomun en - Kristin xil te hal Tesalonaeka latenemi latehit Iesu imei rilomun itemanon. Ma melele xa rute xil latelel, latenexo. Ma Pol tepet rat nenemien nae tehit be reitin xa Iesu imei rilomun, e melele xa imei, ngan xil xa latelel ngamu limea rilomun ra maten vatei takes itel ngan xil xa lameul tamu, e limei vituei lihe ut nesao. Misak ni, Pol tesel xat xil tengan livue xat meulien nae ven.
Nenemien tei xa eilep te uvei ak de 1 Tesalonaeka 3:12-13
Matsis tengan Suv Iesu isak ni eheien xa di mupisen ni mi xamim mun mei imatu e ihe eilep mak mu ixoni hisit sexien xa eheien nametel di pupu e xamim. E matsis mun tengan isak ni nenemien namim mei ixeih tengan muhe eo e mumese pe met Hi Tamer melele xa Iesu, Suv nar, imei rilomun en itel moletin nan xil.
Nenemien teimun xa eilep te uvei ak de 1 Tesalonaeka 4:14
Xir rakila xa Iesu temat e temea rilomun ra maten. Misak ni, rake reitin mun xa melele xa Iesu imei rilomun en, Hi isak ni ngan xil xa latelel ngamu xa lateling nenesien nae en tengan livituei itel Iesu e ileh xil lihe ut nesao.
?Naha iaxa di e uvei ak?
1. Pol di memes Hi ve neketen na Kristin xil te hal Tesalonaeka. (1:1-10)
2. Pol bit usil polien nan del xil e midep iaxa di misis ve xil vehakut. (2:1–3:13)
3. Pol misel xat xil usil hisit sexien xil xa Hi besi xi ven. (4:1-12)
4. Pol bit kil mei rilomunen na Iesu mi xil. (4:13–5:11)
5. Sepinien kor. (5:12-28)
1
Sepkilaen na Pol usil uvei ak
1 Inou, Pol, del Saelas e Timoti, matdis uvei ak bat mi xamim, moletin xil na Hi Tata e Suv Iesu Kristo xa mudi e sias te hal Tesalonaeka. Di matsis tengan eheien hos e tomat na Hi iti e meulien namim.
Pol memes Hi ve meulien hos e neketen na Kristin xil e hal Tesalonaeka
2 Xametel di matomes Hi vehakut ve xamim vus, e vehakut di matonem usil xamim e sisen nametel.
3 Melele xa matsis mi Hi Tamer ve rin namim, matonem xat neta xatel ak: midep iaxa neketen namim e Iesu Kristo di misak ni xamim mupol nggeih mi Hi, midep iaxa eheien namim mi xalu di misak ni xamim di mupol nggeih tengan mudutou ni mosav xil, e midep iaxa nenesien namim e mei rilomunen na Suv Iesu Kristo di misak ni xamim musokil e melele xa di mubisu ni melele te xeih xil.
4 Tuxoli e hinoxoli nametel xil, matkila xa Hi ien bei xamim e tehosei xamim ngamu mube nan.
5 Matkila xa Hi tehosei xamim vengan melele xa mattehur longeongen hos tehat visal xamim, longeongen hos ak tenamei ti vatel sepinien kestang. E temei tetel xat xeihen e tetel polien xil na Ninin Eo mun, e mukil kuh reitinen teni e melele xa mattesepin mi xamim. Mutepus kil sexien xil te meulien nametel melele xa matteti visal xamim tengan mattutou ni xamim.
6 E xamim mutehusil sexien nametel e sexien na Suv Iesu. E tave ti neta xa mutehisu ni longpangasien ven, mutehesi xamim tengan muvur xat sepinien na Hi xa Ninin Eo tesa ni mi xamim.
7 Nggo sexien ak, xamim mei mutehe simeleleen tei mi Kristin xil vus xa ladi e provins xalu te hal Masedonia e Akea tengan lakila lavusil sexien namim xil.
8 Mutehithiten sepinien usil Suv Iesu mi mosav xil xa latehuri teha tetuxoh provins xalu ak, e teha tehe ut savsav xil mun. Reitin, longeongen usil neketen namim e Hi tesel teha texoni rae ameru tei xa mosav xil xa ladi sotin di lalonge. Misak ni, neta tovuol mun xa xametel matkila mathiteni usil neketen namim e Hi vengan xa moletin xil vus lakila ngamu.
9 Reitin, moletin xil vus xa ladi sotin ra xamim e rute xil ak di labit usili xa tetep iaxa mutehur pilei xametel melele xa mattehat matteti mi xamim. Di lasep usili xa tetep iaxa mutehiles ra nanao xil e mei mumot mi Hi e mupol mini, ngan xa meul e be reitin.
10 Di lasep usili xa tetep iaxa muteling neketen namim e Natneli xa Hi tesak ni temea rilomun ra maten. E lakila xa taxeak, di mudatil melele xa Iesu imei rilomun ixo ut nesao. Be xi iaxa isikoe xol xir ra pangasien xil xa di bemei ve ekaten te xeih na Hi ba xat tesaen xil.