5
Lalang ni tova xa pipin tengan ti ivuli sepinien usil holesok xil xa ti imei
1 Melele xa napus holesok xil ak bus, napus ngan xa dotan de von xeihen nen di nggur xat uvei tei de hen metu xa sepinien di rin xalu vus. Labulun xati e labil xati ni siil lu e he sav (7).
2 Di, napus vat tei na masxaxa xil xa mikei be nesao del rae tei xa nggeih bit, “?!Visi tova iaxa pipin tengan vavul papas siil xil ak e vavuli sepinien xa de uvei teni!?”
3 E latakamet ti moletin tova e ut nesao mu e ut etan mu pe huitan xa vapin tengan vavul papas siil xil e vavuli sepinien xa de uvei ak.
4 Misak ni, namuis nggeih vengan xa lasakras lakamet moletin tova xa vapin tengan valang rat uvei e vavuli sepinien xa da en.
5 Di, tei e elda xil bemei e biteni minou bit, “Onamuis ti. Pusi ti mu. Ngan xa lakesi ni laeon te vatimol na Sudah di bemei. Xi be havneli tei na suv toto Deved e momal tengan vahur lelaxatien nan. E, e vaeen te neketen, xi tehu len xeihen na Temat tuei. Xi kestang pipin tengan vavul papas siil xil, valang rat uvei ak, e vavuli sepinien xa di en.”
6 Di, napus ngan xa temaen xoteh meulien nan texoni sulut sipsip te sanien eo tei. Xi misomal dat sangas ni von xeihen, e hilaep te elda xil e neta hat (4) xa lameul ladi. Napusi nggoni mun xa latehu vini ngamu, di, mea rilomun e meul tang da. Hon te xeihen nan be lu e he sav (7) e meten mun be lu e he sav (7). Meten lu e he sav xa xiak labe Ninin lu e he sav (7) na Hi xa misil xil ba lakapis xol rute xil vus te ut etan.
7 Ngan xa nggoni sulut sipsip ba be visal ngan xa dotan de von xeihen e nggur uvei ak ra hen matu.
8 E melele xa ngguri, neta hat (4) xa lameul ladi del elda hanutap tei e hat mun (24) lamot labe tan mini. Xil kekes langgur xat harp tengan lipilei ni sisien xil mi Hi, e pesin hos tei xa lapol ni ni gol. E pesin xil ak, di ladin vokon hos xil en xa be sisen xil na moletin xil na Hi.
9 E melele xa lapol ni mak, di lakikei ni sisien hu tei labit,
“Xouk opin tengan ovur uvei ak,
e ovul papas siil xil teni.
Opin vengan xa latehu vinuk, e rem texal rat moletin xil mei labe na Hi.
Reitin, otexal rat moletin xil ra vatimol xil ngasen e ra sepinien xil vus,
ra kantri xil ngasen e ra tatit moletin savsav xil mun.
10 Otepol ni xil mei labe vanut moletin xil
xa di lamerere ni Hi nggoni suv toto te meulien nae.
Xouk otesak ni xil mei lapol mini nggoni pris nan xil
e mei lilaxat ut ngasen e ut etan.”
11 Melele xa di naketeh mikapis, nalong rae masxaxa xil xa labe holu xa labe holu pupu, moletin misakras vavuli sen xil. Xil lasoh xorelis von xeihen xa mahulong na Hi del neta hat (4) xa lameul e elda xil mun.
12 E masxaxa xil ak lakikei nggeih be nesao labit,
“Di mapet rat his ngan xa latehu vini,
ngan xa temat texoni sulut sipsip te sanien eo tei, e di, mea rilomun ra maten.
Xi pipin tengan ihur xeihen, metisouen, lelaxatien, e ipolu ni holesok xil,
e tengan ihur merereen, hosien, e his xa ihe eilep mak mu.”
13 Di, nalong rae holesok xil vus xa lameul ladi di lakikei: ngan xil xa ladi ut nesao e ngan xil xa ladi e ut etan; ngan xil xa ladi pe huitan e ngan xil mun xa ladi e huinep te tas. Reitin, nalong xil vus di lakikei labit,
“!Mapet rat ngan xa dotan de von xeihen xa mahulong
e ngan mun xa nggoni sulut sipsip te sanien eo!
!Xalu vus lupin tengan mamerere ni xalu e masa memesien mi xalu
e minehinen te xeihen nalu iti vehakut xa vehakut tang!”
14 Melele xa lasepin mak, neta hat (4) xa lameul ladi labit, “!Reitin li!” E elda xil vus lamot labe tan mi xalu e lapet rat hisealu.