JOON
Ih Takkhoh Raang Arah Le
Ephangjatjih
Joon ih takkhoh maat arah le, jaatnyi jengkhaap raangtaan ih raangta: Rangte nyia Hesah Jisu Kristo damdoh mamah ih roongtong theng ah erah wette loong suh tenchaan kot suh eno neng rang roomsoom ki nyootte loong dowa pui suh ban huk baat suh raangta, mongrep adoh mok woot woi tong ibah rangdah mina ang ih, erah raangtaan ih Rangte Sah Jisu ah timtok doh uh mina sah tajen ang thengta. Eki nyootte loong ih elang ih ah tumbaat rumta ah langla, khopui ah mongrep roidong raangtaan ih amah sah uh lathun thang ih tong ih doba pui ah; neng loong ih amah nep ih nyoot rumta, khopiipang abah ese reeraang nawa nyia mih minchan raangtaan ih choh ah ngeh ih tah angka.
Arah nyootsoot ha ah daante rah ih phanjangjang phan baat ha Jisu Kristo ah mina amiimi angta, heh ih amah uh wakbaat eta, Marah ih Jisu nyia Rangte suh tuungmaang ha erah loong ih neng jaachi nah uh minchan mui jaatjaat etheng.
Hemong Dowa Jatjih
Ephangjatjih (1:1-4)
Weephaak nyia laamang (1:5—2:29)
Rangte suh asah nyia Hakhoh juungbaan suh asah loong (3:1-24)
Emoong nyia amiisak(4:1-6)
Minchan mootkaat (4:7-21)
Ejen etheng tuungmaang (5:1-21)
1
Roidong jengkhaap
1 Roidong jengkhaap tiit sen suh raang kohi ah rangphang diidook eje angta. Erah seng ih echaat eti, eno seng mik ih nep tup eti; amiimiisak seng ih tup eti, eno erah seng lak ih nep thaak taajoot choi.
2 Arah roidong ah mik etup theng ang thoidi, seng ih etup eti; erah raangtaan ih erah tiit ah baat hi, marah Hewah damdi angta lathoon roidong tiit nyia marah seng suh dong jatthuk hali erah ah.
3 Marah kap tupti nyia marah kap chaatti erah tiit ah sen loong suh dong ja baat hi, erah doba seng loong damdoh heh Wah nyia heh Sah Jisu Kristo damdi rangsoom lom tongli adoh jen roongtong han.
4 Arah seng ten boot thoon roon suh raanghi.
Rangte ah weephaak
5 Belam heh Sah jinnah wa chaatti tiitkhaap ah baat hi ah langla amah: Rangte ah weephaak, eno heh jiinni laamang tah jaatjaat jeeka.
6 Erah ang abah heh damdi roongtongli liihi, eno rangnak nah moktong ibah, sengre sengraang nyia sengjeng sengkong ni eleek angli.
7 Enoothong heh weephaak ni tongla likhiik seng uh weephaak nah tong ibah—seng loong ah rangsoom roongtong eli, eno heh Sah Jisu sih rah ih seng rangdah ah sa haat ehali.
8 Seng loong ih seng rangdah tajeeka mokli ibah, seng teeteewah mokwaanhi, amiisak ah seng taang ni tajeeka.
9 Enoothong seng ih Rangte suh seng rangdah ah biin anaan he mok baat ibah, heh kakham ah tah beehaat ka ang ah eno marah epun ah erah re ah: heh ih biin anaan ehe eno timthan ethih reeraang dowa seng loong ah saasiit ehe.
10 Seng rangdah tah dake mok li ibah, Rangte ah eleek ngeh li hi, eno heh jengkhaap ah seng taang ni tajeeka ang ah.