JEEMS
Ih Raang Arah Le
Ephangjatjih
Jeems ih raangha le ah langla “mongrep thoontang ni saapta la Rangte mina loong suh” amiimiidi reeraang pakna renbaat arah lomraang ha. Arah raangte warah ih amiimiidi renbaat adi Kristaan dang ajang nyia reeraang doh mongtham ese nyia lamsui tiit baat adi hejaat hejaat jenglam ih baat arah raangha. Kristaan mina ih changthih changteng, phate joonnaam, ese reeraang, lalang lajang tiit dande, tuumaang nyia mootkaat, paatjaajih jengkhaap, mongtham ese, rookmui jengmui, khuupook nyia toongtang tiit, mih dande tiit, engaam tiit, enaan tiit, nyia rangsoom tiit raangha.
Arah le adi reeraang pakna ah tuumaang damdoh angtheng nyia Kristaan thooroom doh emah jangse reeraang theng ngeh ih raangha.
Hemong Dowa Jatjih
Ephangjatjih (1:1)
Tuumaang nyia mongtham ese (1:2-8)
Changthih changteng (1:9-11)
Phate joonnaam (1:12-18)
Echaat nyia reeraang (1:19-27)
Dandeemui thoidi choophaan (2:1-13)
Tuumaang mootkaat (2:14-26)
Kristaan nyia tuihih (3:1-18)
Kristaan nyia Mongrep (4:1—5:6)
Hejaat hejaat renbaat (5:7-20)
1
1 Rangte nyia Teesu Jisu Kristo laksuh, Jeems taangnawa:
Mongrep noongrep ni Rangte mina loong tiisoontla loong suh jengseera.
Tuumaang nyia mongtham
2 Joon awaan loong, sen taangnah jaatrep phate joonnaam thok haadoh khangraangse ngeh ih li an,
3 tiimnge liidi erah likhiik phate joonnaam ah sen tuumaang nawa ih jen tanno juuba, jirep adoh jen naan eh an.
4 Sen ih jat etheng, jen naan ih tanno roidong doh jirep ah jen an, eno juuba tiim lampo nah uh sen epun nyia lasoot lasaam ang an.
5 Enoothong sengdung dowa o ang an bah uh mongtham ese laje kanbah, sen ih Rangte rangsoom an heh ih kot ehan; tiimnge liidi Rangte ih loongtang suh larat lapat thang ih minchan ih chokoha.
6 Enoothong mabah rangsoom an, tenchi lah angthang ih hanpi an. O tenchi angla erabah juusih ni pong ih juutak saapmot ah likhiik .
7 Sen loong emah mok ang anbah, nyia tiim re an bah uh sen thung nah lajen phanthun kanbah,
8 Teesu taangnawa echoh eh ih ngeh ih nakmok thun an.
Changthih nyia changteng
9 Changthih Kristaan loong ah Rangte ih toonjoh adoh tenroon ang theng,
10 adoleh changteng Kristaan loong ah Rangte ih datthiin ih adoh tenroon ang theng. Tiimnge liidi changteng ah woma ni popong kah mutdat ah likhiik ih mah ah.
11 Rangsa ah khaamloolo ih dong tahaano nyia mi taano bangphook ah tekraat eha; hepoong uh takah poongka, adoleh hejaase ah uh emat e ah. Erah likhiikkhiik changteng loong ah neng pheehoon mootkaat damdoh thet haat ah.
Thaak taari nyia phate joonnaam
12 Phate joonnaam di o ih tuumaang roh eha erah juuba tenroon, tiimnge liidi erah thaak taari ha jen ano, heh mongnook loong asuh Rangte ih kakhamta jun ih hethaang ah roidong koh ah.
13 Erah likhiik thaak taari heedoh, seng ih mabah uh lajaatjaat jeng theng, “Arah thaak taari hali ah Rangte taangnawa.” Tiimnge liidi Rangte ah ethih ekhah ih tami thaak taari ka, he teewah ih o uh tathaak taari ka.
14 Enoothong seng tenthun ethih nyia nyamnyook ih dat hoom hali.
15 Eno seng tenthun ethih ekhah rah ih rangdah dongsam thukla nyia dongtup ha; erah lih adi rangdah ah hantek phong taano etek ih thukla.
16 Joonte loong erah raangtaan ih naktoom mokwaan han!
17 Ranglakkot ese nyia epun lakkot ah rangmong nawa ra hala; rangmong dowa weephaak Dongsiitte Rangte reenawa ra hala, heh lekte tah angka nyia rangnak takah ngaak ang thukka.
18 Hethung hetak nawa ih nyia heh jengkhaap amiisak nawa ih dongtup tahe, tiimnge liidi mathan dongsiitta erah loong tung dowa seng loong ah phangkhoh tiik arah potiik loong ang theng.
Echaat nyia reeraang pakna
19 Joonte loong, sen ih arah samthun roh etheng! Warep ih boichaat ah jaalo ih boichaat theng, enoothong ejeng nyia ekhat ah siak lakhat theng.
20 Mina tenkhat ih Rangte kateng tenthun nyia mootkaat ah mabah uh tachoka.
21 Erah raangtaan ih lalangka lampo ni jangse li dowa nyia ethih mootkaat loong dowa haloh ang theng. Jirep ah Rangte suh look anno sen tenthun ni tiimjaat jengkhaap dong thukla erah ah kaptheng, erah ih juuba jen puipang han.
22 Heh jengkhaap ah boichaat luulu ih anno sen teenuh teewah nak mokwaan an; erah nang ebah erah chaat han jengkhaap kap suh jangse an.
23 Sen ih jengkhaap ah boichaat luulu ih anno erah jun ih jangse lareeraang kanbah, theeri ni adoleh samsok ni o mina ih heh teenuh teewah likhiikkhiik ih japtup arah likhiik ih ang an.
24 Erah loong ah ebah neng teenuh teewah ah samkhikhih ih sok ano dokkhoom kala eno hethe hekhoh tiim likhiik angko taaja erah jaasiit di lak haat ha.
25 Enoothong marah hootthe mina puipang suh epunthoon ah, labeehaat thang ih erah hootthe ah kap anbah nyia boichaat luulu lah ethang ih jangse ih reeraang pakna anbah—sen tiim re an erah doh Rangte ih romseetam kohan.
26 O ih bah uh sen jaachi ni ngah thooroom mina ngeh ih tam thun han? Heh tuihih ah laplap ih moot abah heh thooroom ah thaangmuh, erabah heh teeteewah ba mokwaan ha.
27 Sen loong Wah Rangte ih kilingling nyia amiimi thooroom liiha abah amah suh liiha: numuh wamuh nyia numuh jooti loong ah neng chamchoh doh chosok theng adoleh arah mongrep dowa mih thet hoomjih loong dowa haloh ang theng.