PITAR
Ih Takkhoh Raang Arah Le
Ephangjatjih
Pitar ih phangkhoh raangta le ah Kristaan loong raangtaan ih angta, aradi “Rangte ih danjeeta mina” ngeh ih liiha, o mina Asia Minor juukuh ko ni saapta rumta loong asuh ah. Arah le ah wette loong asuh chaankot raangtaan ih raangha, o mina neng tuumaang raangtaan ih siiwi chamnaang rumta loong asuh ah. Arah le raangte warah ih Ruurang Ese tiit adi Jisu Kristo tektiit, ngaaksaat tiit, eno heh kakham jun ih laalom thukla we dopbaat rumha. Erah ang thoidi neng chamnaang ah enaan etheng nyia ekap etheng ih hoonta, neng loong ah kamkam ih tuumaang thoilam doh banlam ih phate ah ngeh ih jat rumta eno neng loong asuh “Jisu Kristo mik ih tuptheng Dong raaha doh” hethaang ah koh ah ngeh ih jat rumta.
Arah le raangte warah ih chamnaang tokdi chaankot jengkhaap luulu lah angthang ih, arah le wette loong asuh Kristo mina likhiik ih songtong theng ngeh ih baat ha.
Hemong Dowa Jatjih
Ephangjatjih(1:1-2)
Rangte ih khopiiroidong kot dopbaat(1:3-12)
Esa hasong song suh chaankot jengkhaap(1:13—2:10)
Chamnaang pootdoh Kristaan mootkaatjih (2:11—4:19)
Kristaan tongtang nyia mootkaat pakna (5:1-11)
Ethoon ni(5:12-14)
1
1 Jisu Kristo kaamwah, Pitar jiin nawa—
Arah le ah Rangte ih danjeeta mina o Pontus ni, Galatia, Kappadosia, Asia nyia Bithania hadaang ni nokmah wensang ih saapta rumta loong raangtaan.
2 Sen loong ah Rangte mootkaat raangtaan ih Jisu Kristo jeng chaatchaatte angsuh nyia heh sih ih toom saasiit han suh adoleh Chiiala nawa ih esa noksong angthuk suh danje tahan.
Rangte tenthet nyia semroongroong thoontang sen lakbui toom ang ah.
Khothing tong suh laalom
3 Seng Teesu Jisu Kristo Wah Rangte suh lakookmi ju li ih! Heh tenthet elong je thoidi Jisu Kristo ah etek nawa we ngaaksaat thuk ano seng suh roidong ena koh hali. Erah ih seng ething laalom ah koh hali,
4 eno Rangte ih heh mina loong suh romseetam hantek kot suh banthiin ha ah bansok hi. Sen loong raangtaan ih erah rangmong ni banthiin ha, maradi chaam uh tami chaamka adoleh thet uh tathika, adoleh emut uh tamutka.
5 Erah loong ah sen raangtaan, o mina sen tuumaang jun ih Rangte chaan nawa ih huthiin halan, eno khopiiroidong sen raangtaan ih thiinha ah rangthoon doh dongjat thuk han.
6 Erah raangtaan ih, amadoh sen loong ah phate chamnaang thoidoh pootsiit thungthet theng ang ah bah uh tenroon ih tong an.
7 Erah chamnaang lan abah sen tuumaang ah thaangmuh tah angka ngeh ih jatthuk suh angla. Kom, thet jaat ah botse we ni thaaksook ha; an tuumaang, kom nang ih thaangchaan ah uh ejen naan esuh thaak phate jaatjaat ih ho. Eno juuba Jisu Kristo kaat Rangwuuja phoongpha, rangka nyia choomjoot ah choh an.
8 Sen ih latup kandi heh minchan ehan, eno amadi latup kanbah uh hanpi ehan. Erah raangtaan ih tuikhoi ih lajen toobaatke tenroon elong nyia rangka theng ih roon lan,
9 tiimnge liidoh, heh suh tiim raang ih tuumaang lan, erah senchi senla raangtaan ih khopiiroidong ah choh han.
10 Khowah loong ih khopiiroidong tiit jamtoongte ta tiit ah arah, eno Rangte ih sen suh ranglakkot tiit banbaatta ah sen suh kohan.
11 Neng ih saapoot ah tiimtok doh ang ah nyia mamah thok ha erah tiit ah jat suh taat thun rumta. Khowah loong sak ni Kristo Chiiala ah erah tokdi pah ano, cham anaang ah Kristo ih jen naan ah eno erah lih adoh heh men rangka tiit ah banjat rumta.
12 Rangte ih khowah loong suh neng mootkaat pakna ah neng raangtaan tah angka ngeh ih dongjat thuk rumta, enoothong erah sen raangtaan, rangmong dowa Esa chiiala chaan aphaan nawa ih Ruurang Ese tiit baattaante loong asuh erah banbaat rumta ah baat halan. Erah loong tiit ah rangsah loong botseh jat esuh nookla.
Esa ih songtong suh poonha
13 Erah raangtaan ih, erah reeraang suh senthung sentak nah banthun roh ih an. Jisu Kristo dongha doh sen suh kottheng romseetam ah raangtaan ih ban laalom an.
14 Rangte jeng chaatchaat ih an, eno tiim uh lajat ih angtan dowa likhiik sen roidong ah hansi tenthun nah nak angthuk an.
15 Erah nang ebah, sen loong poonte Rangte esa angla likhiik, tiimjih re anbah uh esa ang theng.
16 Rangteele ni liiha, “Esa ang an tiimnge liidi ngah esa.”
17 Sen ih Rangte rangsoom andi, Ewah li han, heh ih, mina loongtang neng reeraangla jun ih phoosiitsiit ih dande ha; erah raangtaan ih, sen loong ah arah hah adoh tong pootdoh heh men ah samthun roh ih anno songtong an.
18 Tiimnge liidi sen ih jat ehan sen roidong di sente senwah loong ih lalangka lampo nyoot tahan dowa puipang suh tiimjih kota. Erah langla thetsiit jih hun nyia kom likhiik tah angka,
19 erabah thaangchaan thoon Kristo ih hepuh hesak ah kota, hema muh saapsah likhiik angdowa.
20 Mongrep maang dongsiitka di Rangte ih Jisu ah danje ano sen loong raangtaan ih liwang ni dongjat thuk ha.
21 Sen ih Rangte ah heh jun ih hanpi han, marah heh ih tek nawa ngaaksaat thuk ano heh men rangka ha; erah raangtaan ih sen loong ah Rangte suh tuumaang lan nyia laalom lan.
22 Erah thoidi amadi amiisak tiit jeng ah boichaat anno sen teenuh teewah saachamcham anglan eno hanpiite sen loong jaachi ni minchanmui elan, wasiit ih wasiit senten senmong nawa ih minchanmui lan.
23 Tiimnge liidi ething nyia mabah uh lathoonka Rangte jengkhaap jun ih we doptup halan, sen wah etekjaat jun ih lah angthang ih latekjaat jun ih ah.
24 Rangteele ni amah liiha’
Mina loongtang naam likhiik,
eno neng rangka ah woma popong likhiik.
Naam ah ehook ela, adoleh popong ah emut ela,
25 enoothong Teesu jengkhaap ah saarookwet raangtaan ih tong ah.”
Arah jengkhaap ah sen suh baat tahan Ruurang Ese tiit ah.