ROOMTE
Suh Pool Ih Raang Arah Le
Ephangjatjih
Pool ih Roomte suh le maat raangta ah langla heh ih neng hah nah kah ano Room mina loong damdoh menjat hoon suh nyia neng Rangsoomnok nah Rangte tiit baat suh thunta. Heh tenthun ah langla neng damdoh rekam than roongtong ano, neng hah nawa ih Spain hadaang ko ih wangsuh chungta. Erah raangta ah langla Rangte tiit mathan jatte loong asuh we toom nyoot suh nyia Kristo hasong nah mootkaat reeraang lam ih mamet maak theng ah loong ah nyoot soot suh thunta. Arah leedap adi Pool ih mathan jat ha loong thoontang raang ha. Pool ih Room nok hate suh jengse ah jen ra ano nyia rangsoom tiit ah jen baat rum ano, heh ih le raangta hesot hemat tiit ah jatthuk rumta: “Ruurang Ese rah ih Rangte damdoh mame jen pun song theng rah baat hali: erah langla seng hanpi hephang dowa ih hethoon tuk ih ah.” (1:17)
Pool ih erah hesot hemat tiit ah huk punbaat rumta. Mirep Jehudi loong nyia Ranglajatte loong ah, Rangte damdoh naririh toom ih pun songtong rum ah ih baatta, tumeah loongtang mina rah rangdah ni tongla. Mina loong ah Rangte damdoh jen pun song suh Jisu Kristo suh laalom theng. Erah lilih Pool ih baatta Kristo damdoh roong songtong thaang ah Rangte damdoh sano ih hoon ah. Rangte suh hanpiite loong ah semroongroong ang ah nyia Rangte moong achaang nawa ih rangdah ih khak arah dowa jen jaahaat et ah. Leedaap 5 dowa 8 adi Pool ih Rangte Hootthe ah tumjih raang ih baat ha nyia Rangte chaan aphaan ah hanpiite loong roidong ni mame moli loong tiit ah baat ha. Eno Rangte ih danjeeta kaamwah loong ah ih Rangte damdoh mina loong Jehudi ang koja oh nyia Ranglajatte loong ang koja oh mina loong ah Rangte damdoh mamah ih jen pun song theng ah erah loong ah baat ha. Pool ih hethoonko di raangha, Jehudi loong ih Jisu Kristo thaangju rumta langla Rangte mongtham ju angta mina loong ah Jisu Kristo men dowa ih Rangte tenthet nah thoksiit suh ah, eno Pool ih hanpi ha Jehudi loong ah ih erah dowa ba saarookwih takah thaaju rumka. Pool ih mina loong Kristo roidong nah mame songtongjih tiit ah raangha, ehan thoon ah mina chamchi nah mongnook sano toom je ah eah. Erah hesot hemat ah Rangte mootkaat tiit, Kristaan loong mootkaat deek akaan nyia mina esiit esiit damdoh, nyia thung atak nah chengmui tiit ah raangha. Heh ih heteewah tiitwaan nyia Rangte rangphoong jengkhaap lam ih thoon raangha.
Hemong Dowa Jatjih
Ephangjatjih nyia hesot hemat(1:1-17)
Mina warep ih jamha khopiiroidong rah(1:18—3:20)
Rangte khopiiroidong lam(3:21—4:25)
Kristo hasong ni roidong ena (5:1—8:39)
Ijirel ni Rangte kaankoong(9:1—11:36)
Kristaan Hasong(12:1—15:13)
Hethoon adi heteewah jengkhaapse (15:14—16:27)
1
1 Jisu Kristo laksuh Pool, Rangte ih heh Ruurang Ese ah tumbaat suh heh kaamwah ih danje ano poonta erah jiin nawa arah tiit ah.
2 Esa Rangteele ni raangthiinta jun ih, Ruurang Ese ah Rangte ih teewadi khowah loong suh thoomhoon lam ih baat rumta.
3 Erah heh Sah, Teesu Jisu Kristo tiit: hansi mina jun ih heh ah Dewid sutoom ih dongta;
4 esa moong achaang lamko ih we ang ano, heh ih elong chaan aphaan lam ih tek nawa ngaaksaat ano Rangte Sah ih noisokta.
5 Rangte ih ngasuh uh Jisu Kristo thoi ih heh kaamwah ih mootkaat suh saapoot ah kohalang, deek akaan mina loongtang suh Jisu tiit ah hanpi thuk suh nyia heh jengchaatchaat etthuk suh ah.
6 Arah jengkhaap ah Rangte ih sen Room hadaang nawa mina loong suh nep baat halan, Jisu Kristo mina toom ih hoon rum ah eah.
7 Erah thoih ngah ih sen Room nawa mina loongtang suh raangkoh rumhala o mina Rangte ih minchan halan nyia poon halan loong asuh ah:
Seng Wah Rangte nyia Teesu Jisu Kristo ih sen suh heh tenthet nyia semroongroong roidong ah toom kohan.
Lakookmi rangsoom
8 Jaakhothoon, Jisu Kristo jun ih Rangte suh sen loong raangtaan ih lakookmi liihang, tumeah mongrep nawa loongtang ih sen tuungmaang ah chaat et rumha.
9 Marah ngah ih amiisak tiit baat hang, adi Rangte ah nga haaki—Rangte raang ih ngaaten ngaamong ah koh angno Ruurang Ese tiit nyia heh Sah tiit ah baat suh nyootsoot hang. Ngah ih saarookwih samthun rumhala nyia rangsoom korumhala ah
10 Rangte ih jat eha. Ngah ih saarookwih nga Rangte suh sen damdoh jen chomui raang ih lamlaang kotsuh rangsoom tang.
11 Tumeah, ngah ih sen japtup suh rapne ih ramlang, sen suh moong achaang lam ih romseetam ah choh anno tarong ih tongjih tiit ah roongwaan suh ah.
12 Ngah ih sen suh baat thunhang ah langla, seng loong ah eroom ih toom chosokmui ih, sen ah nga tuungmaang nawa ih, ngah ah sen tuungmaang nawa ih ah.
13 Ngaaphoh ngaano loong, sen ih jat etheng, ngah sen hah nah raak suh saarookwih taat thuntang, ang abah uh jihoh nawa ih lamtang hangno tajen ra tahang. Ngah ih sengdung nawa uh eleksiit et suh thunhang, Ranglajatte loong leksiit rumtang ah likhiik ah.
14 Tumeah mina loong asuh baat kot ah ngah sak ni chaat hala, jatwah angkoja bah uh lajat angkoja bah uh, Leewette angkoja oh lawette angkoja oh.
15 Erah raang ih, ngah ih sen Room mina loong suh nep uh Ruurang Ese tiit ah baat kotsuh rapne ih ramlang.
Ruurang ese chaan aphaan
16 Ruurang Ese ah baat suh ngah tarakriikang; Rangte chaan nawa ih ba hanpiite loongtang puipang ah, jaakhoh ah Jehudi loong erah lilih Ranglajatte loong anep.
17 Tumeah, Rangte tiitkhaap ih mina heh teewah damdoh epun lam ih mame tongthaajih ah erah dongbaat ha: erah langla mina neng tuungmaang ah ephang dowa ih ethoon tuk ih eje angtheng. Rangteele ni liiha, “O mina Rangte damdi tuungmaang jun ih epun ih tongla aba khopui tong ah.”
Mina moongtaang
18 Rangte tenkhat ah rang nawa rangdah nyia ethih mina loong raang ih raaha, marah mina ih neng reeraang ethih nawa ih amiisak tiit ah tajat thuk rumka loong raang ih ah.
19 Rangte ih neng ah chamnaang etthuk ah, tumeah neng ih Rangte tiit ah jatcho ang rumta, Rangte heh teeteewah ih jatthuk cho ang rumta.
20 Rangte ih mongrep hoonta dowa ih, latupjih hemoong hechaang ah, babah uh lathoonjih, nyia esa dang ajang ah jatririh ih japtup rumta; erah loong ah Rangte ih hoonta huk akhaak loong ah thoidi jat hi. Erah thoih erah mina loong ah babah uh tajen leek rumka!
21 Neng ih Rangte ah jatcho, ang abah uh Rangte soomtuujih angta rah, neng ih tasoomtu rumka, adoleh heh suh lakookmi uh tali rumka. Erah nang ih bah neng ah thungko taklo, nyia neng tenthun ah laamang ni hahuung ih tongla.
22 Neng ih neng teeteewah suh jatwah ih thiik rumha, emah ih bah neng ah thungko mina loong;
23 Ething Rangte ah soom dakbi, neng ih mina, phih awoh, hi awak nyia changkom daangraat loong laaphaang ah soomtu rumha.
24 Eno Rangte ih neng suh jootthih reeraang loong ah neng ten ih jamha jun ih reethuk rumla, eno neng chamchi ni erakriijih reeraang loong ah re rumla.
25 Neng ih eleek tiit loong ah ih Rangte amiisak tiit ah lenglek rumha; edongsiite Rangte ah lalek soom thang ih heh lakmaak loong ah soomtu rumha, heh ah roitang phoongpha theng lek ang kano ah! Amen.
26 Neng erah re thoidi, Rangte ih neng suh erakriijih reeraang asuh laan lungwaang thuk rumla. Minuh loong ah uh neng khoopiin ah minuh damdi marah doh lah angjih erah lam adi muungtuung thuk rumla.
27 Erah likhiikkhiik miwah loong ah banlam doh bah minuh damdoh khoopiinjih angta rah ah thiinhaat ano miwah damdam di we luungla likhiik ih muungtuung rumla. Miwah loong ah erakriijih nengneng muungtuungla, erah thoidi neng thetre thaang chamchojih angta rah nengneng ih jam rumha.
28 Tumeah erah miloong ah ih Rangte mongtham neng thung ni tathiin rumka, erah thoidi Rangte ih neng ah ethih lam ni reethuk rumla, eno neng loong ah lareejih ah re rumla.
29 Neng tenthun ah jaatrep ethih ih me thuk rumla, ethih reeraang, nyamnyook, nyia jootthih; neng tenthun ni emiksuk mui, etek haatmui, changrook, mokwaan mui, nyia chamnaang di cham thuk rumla. Neng chamchi ni ejoobaat mui
30 nyia esiit esiit ih thetbaat mui; neng ih Rangte ah miksuk rum, jeng lachaat thang, engaampo, nyia elonghoon noisok; neng ih lamthih rah ehan han ih boot jam rumha; neng ih nengnuh nengwah jeng uh takap rumka;
31 nengdi nengthung nengtak ah tajeeka; neng ih neng kakham jengkhaap ah takapka, nyia nengdi wahoh suh tenthet minchan ah tajeeka.
32 Neng ih jat eha arah mina loong tongsong rumla likhiik ah Rangte Hootthe ni tekcho eah. Ang abah uh, neng ah amadi re ruh ih rumla, eno wahoh suh nep noisok leh reethuk et rumha.