MOTMANGTIITWU
Ni Joon Suh Wuungbaat Arah
Ephangjatjih
Joon suh dongbaatta ah Kristaan loong ih Jisu Kristo ah seng Teesu ngeh hanpi rum kano siiwi rumta erah tok adi raangta. Arah raangta ah langla aa le ah ngo ih phat ah erate ah laalom nyia tenchaan hoon tenthun toom je ah ngeh raangta, erah damdi echam enaang nyia siiwi tokdoh uh tuungmaang ah lanaang theng ngeh chaan korumta.
Arah le adi ehanko adi raangha rah langla, motmangtiitwu nyia enyoot baat jenglam ih wuung baatta, erah tok dowa kristaan loong ih samjat rumta loong ah raangha, eno liwang nah wahoh loong raangtaan ih lajen jatjih ih hoon ah. Jengroop ah rootju rootjang ang tungkaang ih, arah leedap dowa hesot hemat ah mangphe ni maama maama lam ih we wuungbaat leh we wuungbaat eh thukta. Arah leedap tiit ah maama maama dong baat rum abah uh hesot hemat ah jengroop ah jatririh angka ah: Teesu Kristo jun ih Rangte ih heh raawah loong ah thoontang jen ah, Soitaan nep, eno Rangte ih heh suh hanpiite loong asuh raamui thoonta no ena rangmong nyia hatoh ena dowa romseetam damdoh hethaang ah koh rum ah.
Hemong Dowa Jatjih
Ephangjatjih(1:1-8)
Mot amang phangtup nyia chaas sinet suh le maatta (1:9—3:22)
Leeraangtui sinet erapchoi(4:1—8:1)
Sinet luirongmot (8:2—11:19)
Dragoon nyia suithih nyakhah enyi (12:1—13:18)
Hejaatjaat mot amang (14:1—15:8)
Rangte tenkhat ah sinet taamkhuung (16:1-21)
Bebiloon thet haat, eno suithih nyakhah, emoong khowah, eno Hakhoh juungbaan jenta.(17:1—20:10)
Ethoon dande (20:11-15)
Ena rangmong, ena hatoh, ena Jerusalem (21:1—22:5)
Hethoon(22:6-21)
1
1 Arah leedap ah Jisu Kristo ih dong wuungbaatta loong tiit ah raangthin arah. Heh suh Rangte ih erah wuungbaatta ah langla kharok ih timjih angte angla heh laksuh loong ih toomjat ah ngeh noisok ha. Kristo ih heh rangsah ah daapkaat ano heh laksuh Joon suh arah loong tiit ah jat thukta,
2 Joon ih marah tupta thoontang baatta. Rangte tiitkhaap nyia Jisu Kristo ih amiisak tiit dongbaatta loong ah langla arah.
3 Ngo ih arah leedap ah weh ah nyia khowah ih ban baat ha tiitkhaap ah chaat ah eno arah leedap adi marah raangha erah kapte loong ah tenroon angtheng! mamah liidi arah loong ah lang suh saapoot ah ethok ehala.
Chaas sinet suh jengseera
4 Esia juungkhuung nawa chaas sinet loong suh Joon taangnawa le:
Marah amadi uh eje, jaakhoh ni eje angta, eno liwang nah uh eraak ete, erah Rangte nyia sinet moong achaang heh luuwang tongtheng re dowa,
5 eno hanpi etheng, jaakhothoon etek nawa phang saatte, eno arah mongrep dowa luuwang loong pante Jisu Kristo taangnawa tenthet nyia semroongroong ah sen suh toom ang ah.
Heh ih minchan eh hali, eno heh bangphak ni tekbot ano seng loong ah seng rangdah nawa pang tahe
6 eno seng loong ah heh wah hasong nah moot suh romwah ih hoon thuk hali. Jisu Kristo damdoh saarookwe phaaknyaanya nyia chaan aphaan ah toom ang ha! Amen.
7 Sokthaak an, heh ah jiingmuung ni ra hala! Thoontang ih heh ah japtup ah, heh saam ni sotte rah ih uh ekap tup eh ah. Mina loong hatoh adoh heh raangtaan ih raamwe rum ah. Emamah ju toom ang ah!
8 Amadi uh eje, jaakhoh ni uh eje angta, eno linah uh eraak ete, Teesu Elongthoon Rangte ih liita, “Phangkhoh uh ngah, liwang uh ngah.”
Kristo tiit bantup
9 Ngah senphoh senno Joon, eno Jisu liphan diibah, ngah uh esiit sen damdi jiite anglang heh hasong ni chamnaang naante ah. Ngah ih Rangte jengkhaap nyia amiisak tiit Jisu ih dongbaatta ah baatkang no juungloot Patmos hah ni thin rum tahang.
10 Teesu saakaan saadi Chiiala lakmong ni ang tang, eno nga liko ni erongwah luirong huung mot arah likhiik chaattang.
11 Erah huungta rah ih liita, “Marah tup hu erah raang uh, eno erah le ah samnuthung sinet dowa chaas loong Ephisas, Ismirna, Pargamum, Thaitira, Sardis, philadelphia, nyia Laodisia nah maat uh.”
12 Nga reeni ngo waan hala ngeh taat ngaak soktang, eno ngah ih kom nawa hoon arah weetook thin theng sinet tuptang,
13 erah loong dowa mina likhiik tup arah uh eje angta, nyuh ah heh lasih ni thok jangdat arah angta, eno kom ah heh teekhuh ni ngoomkhak arah angta.
14 Heh khoroon ah ripuung nyia nge kah puung ajih puungta, eno heh mik ah we luungluung likhiik phaakta;
15 heh lah ah jaanmeen leep hut choi likhiik leepta, eno heh root ah choonraak juung kah reng datjan ah likhiik reng janta.
16 Heh lak dakchah ko adi ritsi sinet piita, eno heh tui nawa haanghop theh arah lang dong taha, eno heh the ah rangnithung rangsa kaphaak ah likhiik phaakta.
17 Erah japtup ango, ngah tekmang likhiik heh lathong ni loongdat tang. Heh lak dakchah ko rah ih taajoh hangno liita, “Nakcho uh! ephang uh ngah ethoon uh ngah.
18 Marah ething angla erah wah rah ngah, etek etang, enoothong amadi ngah roitang raangtaan ih ething anglang. Etek nyia jumlam ah jen suh ngah jinni chaan je ah.
19 Erah raangtaan ih marah tup hu erah raang uh, amadi angla nyia marah linah elang etheng ah erah ah.
20 Nga lak dakchah kooni piihang ritsi sinet nyia kom weetook thin theng sinet tup hu eradi timjih bah uh husah tiit eje: ritsi sinet ah angla chaas loong raangtaan ih rangsah loong, eno weetook thin theng sinet ah langla chaas sinet.