Lamatuak Yesus Tutui Malolen
tungga
Lukas
1
Tao hata de Lukas surak tutuik ia
1-3 Ama Teofilus fo mana hambu hada-horomatak.
Soda-molek.
Hatahori noꞌuk ka soba surak tutuik laꞌe-neu hata fo ara mori-dadi nai ai taladan nara ena. Ara surak tutuik kara raa, pake tutuik mana koko mafeo-falik numa ai fali neni ai mai seluk, numa fai uluk mai, fo ai bubuluk numa Lamatuak Yesus hatahori uma dalen nara ma numa hatahori laen mai boe fo ara mete-rita ro mata heli-helin nara. Basa tutuik kara raa, tungga tetu-tetu no Manetualain hehelu-bartaan numa lele uluk mai.
Dadi au parisa no lutuk basa matak kara raa lalaꞌen mulai numa tutuik oka-huun mai ena. Boe ma au aketu fo surak basa sara ro malole tungga tututin. No dalak naa, papa bisa bubuluk no tetuk hata fo mori-dadi ena.
4 Ma papa oo bisa namahere mae, hata fo hatahorir tuik kara raa ena, ta tutui pepeko-lelekok boe. Basa naar, hambu sara tetebes!
Manetualain atan numa nusa tetuk do inggu temak mai nafada memak Yohanis Mana Saranik dadadin
5 Tutuik ia oka-huun talo ia: neu manek Herodes toꞌu parenda numa profensi Yudea, hambu hatahori esa, nade Sakaria. Hatahori ia, malangga anggama Yahudi esa. Ma ndia oo bua-aok esa no baꞌi Abia malangga anggaman nara boe. Sakaria saon, nade Elisabet. Ndia oo tititi-nonosik numa malangga anggamar mai boe, huu ndia ia, baꞌi Musa kaꞌan Harun tititi-nonosin.
6 Dua sara leo-laꞌo no ndoos tungga Manetualain parendan ma hohoro-lalanen lalaꞌen. Hatahorir oo fee hada-horomatak neu sara boe.
7 Dua sara oo lasik kara ena boe, tehuu ana taak kara, huu Elisabet ana manan makatemak.
8 Laꞌe esa, Sakaria no ndia bua-aon Abia sara hambu babaꞌek tao ues numa Uma Huhule-haradoi Ina-huuk nai Yerusalem.
9 Tungga sira siꞌen, malangga anggama raa leꞌa lot fo sangga bubuluk see ndia hambu babaꞌek maso neni Uma Huhule-haradoi Ina-huuk Kama Malalaon Mateꞌen dale neu. Nai naa, hatahori naa muste hotu ai kaboo menik, nai Manetualain matan. Faik naa, lot tuda laꞌe-ndaa Sakaria.
10 Boe ma ana maso dale neu. Neu ana hotu ai kaboo menik numa Kama naa, hatahori noꞌun seli hule-haradoi numa uma bebelan naa.
11 Medak neu ma, Manetualain atan esa numa nusa tetuk do inggu temak mai, nambariik numa mamana hotu ai kaboo menik boboan kona.
12 Sakaria mete-nita naa, boe ma namataꞌu nalan seli, losa ana ta bubuluk nae tao hata ena.
13 Tehuu ata naa kokolak nae, “Sakaria! Boso mamataꞌu, ee! Manetualain namanene nala o huhule-haradoim ena. Dadi neu ko o saom bonggi nala ana touk esa fee o. O muste foin, nade Yohanis.
14 Neu ko hatahori noꞌuk ka oo ramahoko sama-sama ro ei boe, nahuu ei hambu anak ena. Kakanak ia, neu ko tao nala o dalem mbena sau-sau.
15 Manetualain Dula-dalen koasan sama-sama noon, mulai numa inan bei fo nairun mai. Ana muste naluli basa laru-ara. Neu ana namoꞌo mamais a, Manetualain paken dadi neu hatahori mana nesi mata.
16 Neu ko ana kokoe-nanasi hatahori Israꞌel noꞌuk ka fo tungga falik sira Manetualain, fo mana naena haak parenda sara.
17 Ndia hihiru-heheon ma koasan, neu ko sama tetar leo baꞌi Elia fo Manetualain mana toꞌu dedeꞌan numa lele uluk mai. Ana mai nakahuluk numa ita Lamatuan mai. Ana tao nala ina-amar dalen sue-lai rasafali anan nara. Ma hatahori mana masadea Manetualain oo, ana tao nasafali sara fo ara bisa tungga Manetualain hihii-nanaun boe. No dalak naa, ana tao nala hatahorir sadia dalen nara fo simbok Lamatuak mamain.”
18 Tehuu Sakaria naselu nasafali mbali ata naa nae, “Ta bisa dadi?! Au ua au saong lasik talo ia ena! Talo bee de au bisa bubuluk ae, basa iar bisa mori-dadi?”
19 Boe ma ata naa naselu nae, “Talo ia! Au ia, Nggabarial, Manetualain neondan. Ana ndia nadenu au mai fo afada hara lii malole ia neu o.
20 Tehuu o ta nau mamahere au kokolang. Dadi tandan fo o mokek talo ia! O maam nakadite ma o ta bisa kokolak mala numa hatematak ia neu, losa ei hambu mala kakanak naa. Dei fo o tadu aom leo. Te hata fo au afadak ia, neu ko ana mori-dadi ndaa no fain.”
21 Hatahori noꞌuk kara fo mana hule-haradoi ruma dea, ara tutundindiik, nahuu Sakaria ta kalua-kalua.
22 Neu ana dea mai, ana ta bisa kokolak nala hata ena. Boe ma ana dududu a mbali sara nenik liman, de ara bubuluk rae, Manetualain natudu feen tanda heran esa ena, numa Kama Malalaok Mateꞌen naa dale.
23 Basa sira ue babaꞌen, boe ma Sakaria fali neni uman neu.
24-25 Ta dook ka boe ma Elisabet taꞌin naisi. Boe ma ana kama aon losa bulak lima. Ana kokolak nae, “Koa-kio Manetualain! Mateꞌen boe ma Manetualain natudu Ndia dale susuen neu au. Mete ma au hambu tititi-nonosik ena, na, hatahorir ta rakamamaek au ena bali.”
Manetualain atan numa nusa tetuk do inggu temak mai natonggo no Maria
26 Neu Elisabet taꞌin laꞌok bula nee ena, boe ma Manetualain nadenu atan numa nusa tetuk do inggu temak mai, fo neni nggorok esa nai profensi Galilea neu, nade Nasaret. Ata naa, nade Nggabarial.
27 Nai Nasaret hambu ana feꞌok esa, nade Maria. Maria ia, ta mesa kana, huu touk esa, nade Yusuf fufudin ena. Yusuf naa, mane Dauk tititi-nonosin. Nggabarial neu natonggo no ana feꞌok Maria.
28 Ana natudu aon neu ana feꞌok naa, boe ma nae, “Soda-molek ina! Manetualain here nala o ena, fo nae tao hata neulauk esa neu o. Manetualain sama-sama no o, Maria.”
29 Maria namanene nala naa, boe ma ana pangganaa doak ata naa kokolan. Ana ta nalela ata naa kokolan.
30 Boe ma ata naa tutin bali nae,
“Maria! O hae mamataꞌu.
Huu Manetualain nae natudu Ndia dale susuen neu o.
31 Ta dook ka bali te o taꞌim naisi ena,
de neu ko o bonggi mala ana touk esa.
O muste foin, nade Yesus.
32 Neu ko Ana dadi neu Hatahori moꞌo-inahuuk.
Neu ko Manetualain seseik kana nae, ‘Ndia ia, Au Ana heli-heling.’
Fo ndia ia, Manetualain mana Demak Mateꞌen Anan.
Neu ko Manetualain soꞌu nalan fo toꞌu parenda,
sama leo Ndia baꞌin mane Dauk.
33 Neu ko Ana ndia toꞌu parenda seku neu soa-neu hatahori Israꞌel asa.
Huu Ndia parendan ta mana basak.”
34 Tehuu Maria natane Nggabarial nae, “Au ia, bei ta sunggu-soro ita ua touk esa boe na! De talo bee fo au taꞌing bisa naisi?”
35 Boe ma Nggabarial naselu nae, “Talo ia! Neu ko Manetualain Dula-dale Malalaon neni o neti. Ma Manetualain mana Demak Mateꞌen koasan, neu ko ana nasaꞌo nala o. No dalak naa, neu ko Kakanak fo o bonggi malak naa, malalao ndoos. Huu Kakanak naa, Manetualain Anan.
36 Boso heran! O bobonggim esa, nade Elisabet, taꞌin naisi ena boe. Hatahorir rae, ana ta bisa bonggi nala ena, nahuu lasik ena. Hatematak ia taꞌin kaisik ma laꞌok bulak nee ena.
37 Huu soa-neu Manetualain, basa hata a mesan bisa dadi!”
38 Boe ma Maria naselu nae, “Malole. Au ia Manetualain atan. Naa fo basa sara dadi tungga papa kokolam naa. Au sadia tungga kada Manetualain hihii-nanaun.”
Basa boe ma, ata numa nusa tetuk do inggu temak mai naa laꞌo ela Maria.
Maria neu tiro-dangga Elisabet
39-40 Seli fai hida, boe ma Maria lai-lai hiek numa Nasaret mai, neni Sakaria nggoron manai profensi Yudea mbuku leten neu. Losa naa, boe ma ana dudi tutik kana neni Sakaria uman dale neu. De ana lole haran neu Elisabet.
41 Neu Elisabet namanene Maria haran naa, boe ma kakanak manai Elisabet taꞌin dale naa, natingga-nasaka. Ma Manetualain Dula-dale Malalaon maso neni Elisabet neu.
42 Boe ma ana nanggou, de nafada nae, “Maria! Neu ko hatahorir soꞌu botik o nadem lena heni basa inak kara marai dae-bafok ia! Neu ko hatahorir oo soꞌu botik Kakanak manai o taꞌim dale naa boe!
43 Au oo neni soꞌu botik boe, nahuu au Lamatuang inan mai tiro-dangga au.
44 Neu o mai, de lole haram neu au, boe ma kakanak manai au taꞌing oo natingga-nasaka, huu namahoko boe.
45 Manetualain natudu dale susuen neu o ena, nahuu o mamahere mae, Ana nau tao tungga Ndia hehelu-bartaan.”
Maria koa-kio Manetualain
46 Maria soꞌuk haran nae,
“Numa au dale kuru-erong mai,
au akadedemak Lamatuak!
47 Au daleng mbena sau-sau,
nahuu Manetualain tao nasoi-nasoda au!
48 Ana loti-mete natalolole au ena,
Ndia hatahori neondan fo sosoan taak ia.
Numa hatematak ia neu, basa hatahorir tao au ia leo,
ina mana mauak nalan seli,
49 nahuu Manetualain tao dedeꞌa heran nara neu au.
Ndia naa, mana Koasa Mateꞌen ma Malalao Ndoos.
50 Manetualain soa natudu dale kasian neu basa hatahorir mana fee hada-horomatak ma rakaluku-rakatele neun,
numa tanak esa neni tanak esa neu.
51 Ana pake koasan,
fo tao nala hatahori mana koa aok kara ramue-anggik.
52 Ana hai heni hatahori mana toꞌu koasar,
nahuu sira nekededema aon nara.
Tehuu Ana soꞌu botik hatahori mana makaloloe aok kara.
53 Ana hao-hani hatahori mana ndoe-laꞌak kara losa rakabete,
tehuu Ana husi heni hatahori kamasuꞌik kara
fo ara laꞌo ro lima roun nara.
54 Ana tulu-fali Ndia hatahori Israꞌel asa,
ma soa natudu Ndia dale kasian neu sara.
55 Lele uluk, Ana ndara fangga hehelu-bartaak no ita bei-baꞌin nara,
fo ndia, baꞌi Abraham no basa ndia tititi-nonosin lalaꞌen.
Hatematak ia hehelu-bartaak bei neni ndara fanggak seku neu.”
56 Boe ma Maria leo no Elisabet losa bulak telu. Basa de ana fali neni ndia uman nai Nasaret neu.
Elisabet bonggi nala Yohanis
57 Fain losak ka, boe ma Elisabet bonggi nala ana touk esa.
58 Hara liik naa natanggela neni ndia nufanelun ma nggoro isin nara rae, Manetualain natudu dale susuen, de fee anak esa neu Elisabet ena. Boe ma basa sara ramahoko.
59 Neu kakanak naa bei fo faik falu, boe ma ara sunat ana, tungga hatahori Yahudi hohoro-lalanen. Ara rae foi kakanak naa, nade Sakaria, tungga aman naden.
60 Tehuu inan nareresi nae, “Ta bisa talo naa! Muste nade Yohanis!”
61 Tehuu ara bala rae, “Tao hata de here nadek Yohanis? Ta hambu hatahori esa boe na nai ei nufanelum ndia pake nadek naa!”
62 Boe ma ara dududuk Sakaria fo sangga bubuluk ana nau foi kakanak naa nade see.
63 Sakaria dududu fo noke batu lei. Ara feen, boe ma ana surak nae, “Ndia naden Yohanis!” Boe ma basa hatahorir heran bali-bali.
64 Medak neu ma, Sakaria maan mana barakaik naa, bangganaꞌu tutik kana. Boe ma ana soꞌuk koa-kiok neu Manetualain.
65 Basa hatahorir fo mana leo deka-deka rai naa, ramataꞌu ma heran. Boe ma tutuik naa natanggela numa bafak mai neni bafak neu, losa hatahorir marai profensi Yudea leten nara oo bubuluk boe.
66 Hatahorir fo mana ramanene tutuik naa duduꞌa rae, “Manggaledok ena, Manetualain koasan sama-sama no kakanak naa. Neu ko namoꞌo mamais a, ana dadi neu hatahori dae-bafok rupak leo beek, ou?”
Sakaria koa-kio Manetualain
67 Basa boe ma Manetualain Dula-dale Malalaon maso neni Sakaria neu. Huu naa de ana kokolak nae,
68 “Koa-kio Lamatuak, hatahori Israꞌel Manetualain!
Ana mai ena fo tefa-soi nala Ndia hatahorin nara,
mita fo ara boso sama leo ata-dator bali.
69 Manetualain soꞌu nala Hatahori esa ena fo Ndia koasan ta neni babanggak,
fo neu ko Ana tao nasoi-nasoda ita.
Ndia ia, numa baꞌi Dauk tititi-nonosin mai.
70 Manetualain helu-bartaa memak basa iar ruma lele uluk mai ena,
pake Ndia mana toꞌu dedeꞌan fo dalen mahanik kara.
71 Hatematak ia Ana nau nakamboꞌik ita
numa ita musun nara mai,
ma numa hatahorir fo dalen nara mburuk neu ita mai.
72-73 Ana natudu Ndia dale susuen neu ita bei-baꞌin nara,
nahuu Ana nasaneda taa-taa neu Ndia hehelu-bartaan neu sara,
fo Ana ndara fangga no baꞌi Abraham.
74 Ana nakamboꞌik ita numa ita musun nara mai ena,
fo ita bisa takaluku-takatele neun,
ma ta parluu tamataꞌu bali.
75 Ana nakamboꞌik ita ena,
mita fo ita bisa leo-laꞌo nai matan no lolo-laok ma ndoos seku neu.
76 Anis! O ia, Au anang.
Neu ko hatahorir ralela o rae, o ia, Manetualain mana Demak Mateꞌen mana toꞌu dedeꞌan.
Neu ko o muu mafada hatahorir,
fo ara simbok Lamatuak mamain no dale malenggak.
77 Neu ko o muu matudu dalak neu Manetualain hatahorin nara,
fo ara bubuluk rae, ara hambu masoi-masodak,
nahuu Manetualain koka heni sala-singgon nara.
78-79 Huu Manetualain dalen bangganaꞌu ma tuda kasian neu ita,
de Ana fee lelak beuk neu ita,
sama leo fai beuk neni manggaledo beuk.
Ita mana leo-laꞌo nai makiuk dale,
ma ita mana tamataꞌu mamates,
nahuu bei ta malole to Manetualain,
neu ko hambu manggaledok fo nakalalaꞌok ita teni dala mole-dame teu.”
80 Basa boe ma Yohanis tamba faik boe namoꞌo. Ma Manetualain Dula-dalen tao natetean. Ana namoꞌo mamais a, boe ma neu leo numa mamana nees, losa ana mulai tao uen soa-neu hatahori Israꞌel asa.