22
Lee fo oen mana neni masodak ma ai huuk mana neni masodak
1 Basa boe ma ata numa nusa tetuk do inggu temak mai naa natudu au lee esa, oen neni masodak. Oe naa, neu ndoos sama leo titiro. Oe naa bubu numa Manetualain ma Bibi Lombo Ana kadera man-parendan mai.
2 Boe ma ana faa neni okofoo moꞌok taladan manai kota naa neu. Nai lee naa tatain beke serik, hambu ai huuk esa neni masodak. Ai huuk naa, teuk esa naboa laꞌe salahunu dua; bulak esa, laꞌe esa. Doon bisa dadi neu modo-aidoo, fo tao nahai hatahori nusa-nusak kara marai dae-inak.
3 Tehuu basa hata fo Manetualain timba nitan ma nakatoos sara, ta hambu sara rai kota naa. Manai naar, ndia Manetualain ma Bibi Lombo Ana fo mana ranggatuuk toꞌu parenda rai Sira kadera man-parendan, ro Sira hatahori neondan fo mana nakaluku-nakatele neu Sara.
4 Basa sara bisa mete-rita Manetualain matan. Ma Manetualain naden neni surak nai sira odamatan nara.
5 Nai naa, ta hambu leꞌodaek. De Manetualain hatahorin nara ta parluu ledo do lambu, nahuu Manetualain ndia tao manggaledo kota naa. Neu ko ara oo toꞌu parenda sama-sama nai naa boe, losa doon naa neu.
Lamatuak Yesus nateꞌe Ndia hara hehelun
6 Basa de Manetualain atan naa nafada au nae, “Basa hata fo au afada o ia ena, memak tebe. Basa hatahorir bisa ramahere au kokolang ia. Fai bakahulun Manetualain pake Ndia Dula-dalen fo nafada Ndia Dedeꞌa-kokolan neu Ndia mana toꞌu dedeꞌan nara. Tehuu hatematak ia Ana pake Ndia atan numa nusa tetuk do inggu temak mai, fo nafada anan nara laꞌe-neu basa dedeꞌak kara iar fo ta dook ka te muste mori-dadi.”
7 Basa naa, Yesus kokolak nae, “Masanedak, ee! Ta dook ka te Au mai ena. Nai susurak ia, basan neni surak ena laꞌe-neu hata fo neu ko mori-dadi. Basa hatahorir fo mana tungga susurak ia isi-liin nara, neu ko ara ndia raua ralan seli.”
8 Mana surak susurak ia, ndia au Yohanis. Au ia, ndia amanene ma ita basa dedeꞌak kara iar. Au amanene basa, boe ma au sendek luu-langgang fo akaluku-akatele neu ata manuma nusa tetuk do inggu temak mai naa ein. Huu Ana ndia natudu basa dedeꞌak kara iar neu au.
9 Tehuu ana kaꞌi au nae, “Wee! Boso tao talo naa! O muste makaluku-makatele neu kada Manetualain. Boso makaluku-makatele neu au. Huu au oo Manetualain hatahori neondan sama leo o, ma o toranoom mara, fo mana dadi reu Ndia mana toꞌu dedeꞌan, ma basa hatahorir laen nara, fo mana tao tungga hata fo neni surak nai susurak ia dale boe.
10 O boso mafuni susurak ia isi-liin neu hatahori laen nara. Ta dook ka te basa hata fo neni surak nai susurak ia dale, neu ko mori-dadi.
11 Basa hatahorir fo mana tao manggenggeok, na,
ela sara ruma naa fo ara tao kada manggenggeok rakandoo.
Tehuu basa mana leo-laꞌo no lolo-laok,
ara muste leo-laꞌo no lolo-laok rakandoo.
Basa hatahorir fo mana tao manggarauk,
ela sara ruma naa fo ara tao kada manggarauk rakandoo.
Tehuu basa mana tao neulauk,
ara muste tao neulauk rakandoo.”
12 Basa boe ma Yesus kokolak seluk bali nae, “Masaneda matalolole! Ta dook ka te Au mai ena. Neu ko Au bala neu basa hatahorir, tungga hata fo ara taok ena.
13 Au ia,
Numa Alfa mai losa Omega.
Au ia,
Numa A mai losa Z.
Basa-basan mori-dadi numa Au mai,
mulai numa makasososan mai losa babasan.
14 Hatahorir fo mana safe ralao bua-loꞌan nara ena, ara ndia raua.
Huu neu ko ara hambu haak fo maso tungga lelesu ina reni kota naa dale reu.
Hatahorir fo mana leo-laꞌo ro lolo-laok ena, ara ndia raua.
Huu neu ko ara hambu luas, fo raꞌa ai boak mana tao hatahorir rasoda rakandoo.
15 Tehuu hatahori laen, ta bole maso naa neu.
See fo ta mana dadi neu Manetualain hatahorin, ta bole leo nai naa.
Ndia, hatahori ta mana mamahere neu Manetulain,
hatahori mana hohongge-lelenak, mana songgo-tangguk,
mana makanisak, mana teka-dokik,
ma mana pepeko-lelekok.
Basa naar, ta bole maso.
Basa naar, ela sara reu kada dea.
16 Au ia, Yesus. Au ndia adenu Au atang numa nusa tetuk do inggu temak mai, fo atudu basa dedeꞌak kara iar, fo neu ko ei miu mafada Au hara hehelung neu saranik bubua kahituk kara raa.
Au ia, mane Dauk tititi-nonosin.
Au ia, Manek mana toꞌu parenda.
Au saꞌang manggaledo ndoos,
sama leo nduu mansai.
Au saꞌang tanden seli,
sama leo nduu dulu siluk.”
17 Manetualain Dula-dalen noke nae, “Ia mai leo!”
Baroit inak naa oo nanggou boe nae, “Mai leo!”
Naa fo basa mana mamanenek kara oo, tungga ranggou boe rae, “Mai leo!”
Naa fo basa mana dale madak kara, mai fo rinu leo!
Naa fo basa mana nau ninu oe fo mana neni masodak naa,
na, mai haꞌi leo!
Hatahori bole haꞌi oe naa,
no mudak.
Hatahori bole ninu oe naa,
no ta pake babaek.
Yohanis hara hehelu mateꞌen
18 Au ia, Yohanis, fee nesenedak neu basa hatahorir fo neu ko ramanene hata fo Manetualain natudu memak kana fee au nai susurak ia, talo ia: mete ma hambu hatahori tamba seluk hata-hata nai susurak ia, na, neu ko Manetualain fee tamba huku-dokik neun, nenik sosoek kahituk kara fo Ana mboꞌan neni dae-inak mai naa.
19 Mete ma hambu hatahorir tao rakuran hata-hata bali numa susurak ia mai, na, neu ko Manetualain haꞌi heni ndia haak fo ana ta maso neni kota malalaok neu, ma ana boso naꞌa ai boak fo tao hatahori nasoda nakandoo.
20 Yesus mesa kana ndia natudu basa dedeꞌak kara iar. Ana helu-bartaa ena nae, “Tebe naa! Ta dook ka te Au mai ena.”
Lamatuak Yesus, mai leo!
21 Au oke-hule fo Lamatuak Yesus natudu Ndia dale susuen neu basa Ndia hatahorin nara lalaꞌen. Amin.
Numa au mai,
Yohanis