19
Jaꞌ liꞌ yaloj ti ep crixchanoetic tey ta vinajel chichꞌic ta mucꞌ Riox iyil ti Juane
1-2 Tsꞌacal to icaꞌi ch-avan ep crixchanoetic ta vinajel:
Coliyalbotic li Cajvaltique ti lispojotic xae, ti muc xquichꞌtic casticoe.
Stuc noꞌox oy syuꞌel.
Stuc noꞌox chquichꞌtic ta mucꞌ yuꞌun lec tajmec li cꞌusi tspase.
Iyacꞌbe xa castico yuꞌun smulic li jbabiloniaetique ti ichꞌbilic toꞌox ta muqꞌue.
Yuꞌun jaꞌ ta smulic ti isoc li crixchanoetique chac cꞌu chaꞌal tsocvan jun ants ti tol saꞌ yajmule.
Yuꞌun jaꞌ ta smulic ti muc xichꞌic ta mucꞌ Riox li crixchanoetique.
Jaꞌ istojic noxtoc ti lismilotic ti chitunotic yuꞌun li Rioxe, xiic.
3 Iyalic noxtoc:
―Coliyalbotic Riox ti iꞌochic ta cꞌocꞌ ta sbatel osile ―xiic.
4 Li veinticuatro moletique xchiꞌuc li chanvoꞌ ti stosoltosol satique, isquejan sbaic, isnijan sbaic, iyichꞌic ta mucꞌ ti Rioxe ti tey chotol ta smucꞌta chotlebe.
―Toj lec ti jaꞌ yech icꞌote. Colavalboticotic, Cajval ―xiic.
5 Icaꞌi ti oy muchꞌu icꞌopoj tal yoꞌ mucꞌta chotlebale. Jaꞌ yech iyal chac liꞌi:
“Colaval”, utic li Rioxe, voꞌoxuc ti chatunic yuꞌune, ti avichꞌojic ta muqꞌue.
Ta biqꞌuit ta mucꞌ “colaval”, utic, xi.
6 Icaꞌi ti oy muchꞌutic ep chcꞌopojique, coꞌol xchiꞌuc bu xpomomet mucꞌta ucꞌum, coꞌol xchiꞌuc bu nopol xꞌavan chavuc. Jaꞌ yech iyalic chac liꞌi:
Coliyalbotic li Cajvaltique ti stuc xa tspas mantale.
Stuc noꞌox oy syuꞌel.
7 Junuc noꞌox coꞌontic acꞌu quichꞌtic ta mucꞌ yuꞌun chnupun xa li Cajvaltic Jesuse.
Tsꞌaquiem xa li yajnile.
8 Li scꞌuꞌ acꞌbile lec tajmec, sac tajmec xojobal,
xiic. Li lequil cꞌuꞌule jaꞌ seña li cꞌusitic lec ispasic li muchꞌutic yichꞌojic ta mucꞌ ti Cajvaltic Jesuse.
Jaꞌ liꞌ yaloj ti chnupun yaꞌel ti Cajvaltic Jesuse
9 Li anjele liyalbe ti acꞌu jtsꞌiba ta vun ti jun yoꞌonic ti muchꞌutic tacbilic ta iqꞌuel ti cꞌalal xnupun ti Cajvaltic Jesuse.
―Melel ti jun yoꞌonique yuꞌun jaꞌ yech yaloj li Rioxe ―xiyut.
10 Ijquejan jba, ijnijan jba ta yichon li anjele, chquichꞌ ox ta mucꞌ ti caloje.
―Mu me xaquejan aba, yuꞌun chitun noꞌox yuꞌun li Rioxe chac cꞌu chaꞌal li voꞌote xchiꞌuc li yan achiꞌiltaque ti sjunul yoꞌonic chalic aꞌyuc scꞌoplal li Jesuse. Jaꞌ ichꞌo ta mucꞌ li Rioxe. Yuꞌun coꞌol chcaltic aꞌyuc scꞌoplal li Jesuse, coꞌol chitunotic yuꞌun li Rioxe chac cꞌu chaꞌal ti yajꞌalcꞌoptac Rioxe ―xiyut.
Jaꞌ liꞌ yaloj ti chcuch yuꞌun smilel scotol scronta ti Cajvaltic Jesuse
11 Iquil ti jamal li vinajele. Iquil jcot saquil caꞌ. Li muchꞌu scajlebinoje jaꞌ ti albil onox scꞌoplal ti yech scotol li cꞌusitic chale. Jaꞌ yech chal ti cꞌu xꞌelan ijpastique, mu yechuc noꞌox chacꞌ castico.
12 Li sbecꞌ sate xleblajet tajmec, coꞌol xchiꞌuc lebcꞌocꞌ yilel. Slapoj ep scorona. Tsꞌibabil sbi pero muc muchꞌu xojtiquin, stuc noꞌox xojtiquin.
13 Li scꞌuꞌe balem chꞌichꞌ. Jaꞌ ti muchꞌu ay yalbotic cꞌu xꞌelan yoꞌon ti Rioxe.
14 Isnapꞌletaic li yajtuneltac ti teyic ta vinajele. Li scꞌuꞌique naca lequic tajmec; sac, chꞌabal yicꞌubal. Naca saquil caꞌ scajlebinoj scotolic.
15 Li yajcapitanique chlocꞌ espada ta ye, lec juxbil yilel, pero jaꞌ li cꞌusi chale. Persa ta xchꞌunbat smantal yuꞌun li scrontatac ta sjunlej balamile. Tsꞌacal to ch-acꞌbatic castico yuꞌun ti Rioxe ti stuc noꞌox oy syuꞌele.
16 Tsꞌibabil ta scꞌuꞌ xchiꞌuc ta yoꞌ ti “jaꞌ stot scotol li preserenteetique xchiꞌuc scotol li jyuꞌeletique.”
17 Iquil jun anjel tey vaꞌal ta xojobal cꞌacꞌal. Iꞌavan:
―Acꞌu stsob sbaic scotol li xuleme yuꞌun ch-acꞌbat ep sveꞌelic yuꞌun li Rioxe.
18 Yuꞌun jaꞌ chtiꞌeic li preserenteetic chlaj chamuque, xchiꞌuc li capitan solteroetique, xchiꞌuc li muchꞌutic mu xiꞌic ta saꞌcꞌope. Ta xlajic ta xulem xchiꞌuc scaꞌic. Ta xlajic ta xulem noxtoc scotol li muchꞌutic ta scrontainic li Rioxe, ta biqꞌuit ta mucꞌ, acꞌu mi mozoinbil, acꞌu mi chꞌabal ―xi.
19 Li bolome iquil ti stsoboj sbaic xchiꞌuc li preserenteetic ta sjunlej balamile, xchiꞌuc yajsolterotac. Yuꞌun ta xꞌoch yuꞌunic acꞌ cꞌocꞌ xchiꞌuc li muchꞌu cajal ta saquil caꞌe xchiꞌuc li xchiꞌiltaque.
20 Li bolome coꞌol itsacatic xchiꞌuc li otro jcot chon ti tspꞌis sba ta yajꞌalcꞌop Rioxe. Jaꞌ ti iyacꞌ iluc syuꞌel yoꞌ bu li bolome, jaꞌ isloꞌlo o scotol li muchꞌutic yichꞌojbeic seña li bolome, xchiꞌuc ti iyichꞌbeic ta mucꞌ li slocꞌole. Li bolome xchiꞌuc li jcot chone ti tspꞌis sba ta yajꞌalcꞌop Rioxe, cuxul ijipatic ochel ta mucꞌta cꞌocꞌ yoꞌ bu chtil xchiꞌuc asuvree.
21 Yan li crixchanoetic ti ixchiꞌinic li bolome xchiꞌuc li jcot chone ti tspꞌis sba ta yajꞌalcꞌop Rioxe, imilatic ta espada ti chlocꞌ ta ye li muchꞌu scajlebinoj li saquil caꞌe. Ilaj scotolic ta xulem, lec inoj scotol li xuleme.