2
Jꞌetꞌesejcꞌop cuꞌuntic ti Cristoe
1 Jech ta jtsꞌibaboxuc talel liꞌe, Jnichꞌnabtac, yoꞌ jech mu xasaꞌ amulic. Pero mi oy buchꞌu junucal avuꞌunic ti laj sta ti smule, oy jun Jꞌetꞌesejcꞌop cuꞌuntic ta stojol ti Jtotic Diose, jaꞌ ti Jesucristo ti tucꞌ yoꞌntone.
2 Jaꞌ ta sventa ti Jesucristoe ti jech lijꞌacꞌbat perdón yuꞌun ti jmultique. Pero maꞌuc noꞌox ti voꞌotique. Yuꞌun laj staic perdón ec scotol ti cristianoetic ti oyic ta sjoylej banomile.
3 Mi ta jchꞌunbetic smantal ti Diose, jech o xal umbi, ta jnaꞌtic ti laj xa cojtiquintique.
4 Pero mi oy buchꞌu ta xal: “Ti vuꞌune ta xcojtiquin ti Diose”, mi xie, pero mi muꞌyuc ta xchꞌunbe ti smantale, jaꞌ jun jutcꞌop, jecheꞌ ta jꞌechꞌel.
5 Yan ti buchꞌu ta spas ti cꞌusi ta xale, cꞌux ta xaꞌi ti Dios ta melele. Jaꞌ jech ta jnaꞌtic ti junotic schiꞌuc ti Diose.
6 Ti buchꞌu ta xal ti junic schiꞌuc ti Diose, jechuc me yoꞌnton cuxiuc jech chac cꞌu chaꞌal ay cuxiuc ti Jesucristoe.
Ti achꞌ mantale
7 Quermanotac, mu yuꞌunuc ta jtsꞌibaboxuc talel achꞌ mantal. Yuꞌun jaꞌ onoꞌox ti mantal ti oy onoꞌox ta atojolic ta sliquebe. Ti mantal ti laj avaꞌiic scꞌoplale, jaꞌ onoꞌox ta voꞌne.
8 Manchuc mi jech un, pero ti jech ta jtsꞌibaboxuc talel liꞌe, coꞌol sꞌelan achꞌ mantal ta xcꞌot ta atojolic. Jaꞌ ti laj svinajes ti Cristo ti jaꞌ melel ti achꞌ mantale jech chac cꞌu chaꞌal ti oy ta atojolique. Yuꞌun ti icꞌal osile ta xa xꞌechꞌ batel. Yuꞌun xojobin xa ta melel ti saquilal osile.
9 Mi oy buchꞌu ta xal ti oy ta saquilal osile, pero mi xtiꞌet to sjol ta stojol ti yermanoe, oy to ta icꞌal osil.
10 Yan ti buchꞌu cꞌux ta xaꞌi ti yermanoe, oy ta saquilal osil. Muꞌyuc cꞌusi chopol tey ta stojol yoꞌ ta xyalesat ta mulil.
11 Yan ti buchꞌu xtiꞌet sjol ta stojol ti yermanoe, oy ta icꞌal osil ta xanav. Mu snaꞌ bu ta xbat. Yuꞌun ipasat ta maꞌsat yuꞌun ti icꞌal osile.
12 Ta jtsꞌibaboxuc talel liꞌe, Jnichꞌnabtac, yuꞌun ti Diose laꞌacꞌbatic xa perdón yuꞌun amulic ta sventa ti Jesucristoe.
13 Ta jtsꞌibaboxuc talel liꞌe, totil meꞌiletic, yuꞌun laj xa avojtiquinic ti Buchꞌu oy xa onoꞌox cꞌalal lic meltsajuc talel scotole.
Ta jtsꞌibaboxuc talel liꞌe, querem tsebetic, yuꞌun laj xa apechꞌic ta teqꞌuel ti pucuje.
Ta jtsꞌibaboxuc talel liꞌe, Jnichꞌnabtac, yuꞌun laj xa avojtiquinic ti Jtotic Diose.
14 Ta jtsꞌibaboxuc talel liꞌe, totil meꞌiletic, yuꞌun laj xa avojtiquinic ti Buchꞌu oy xa onoꞌox cꞌalal lic meltsajuc talel scotole. Jech ta jtsꞌibaboxuc talel xtoc liꞌe, querem tsebetic, yuꞌun tsotsoxuc, yuꞌun oy ta avoꞌntonic ti scꞌop Dios ti laj achꞌunique, yuꞌun laj xa apechꞌic ta teqꞌuel ti pucuje.
15 Mu me xbat avoꞌntonic yuꞌun ti sba banomile schiꞌuc ti cꞌusitic oy yuꞌune. Yan ti buchꞌu ta xbat yoꞌnton yuꞌun ti sba banomile, muꞌyuc cꞌux ta xaꞌi ti Jtotic Diose.
16 Yuꞌun ti cꞌusi ta xacꞌ ti sba banomile, maꞌuc liquem talel ta stojol ti Jtotic Diose. Yuꞌun jaꞌ yuꞌun stuc ti sba banomile. Yuꞌun ti oy cꞌusi chopol ta scꞌan ti scꞌupijel coꞌntontique, ti ta jcꞌan caꞌitic ti cꞌusi lec ta xil ti jsatique, ti ta jtoy jbatic yuꞌun ti cꞌusi xꞌayane, scotol ti vaꞌi sꞌelan taje, jaꞌ ta xacꞌ ti sba banomile.
17 Yuꞌun ti sba banomile ta xa xlaj batel ti cꞌusi oy yuꞌune schiꞌuc scotol ti chopol scꞌupijel coꞌntontique. Yan ti buchꞌu ta spas ti cꞌusi ta scꞌan yoꞌnton ti Diose, ta xcuxi o sbatel osil.
Ti melele schiꞌuc ti jutbile
18 Jnichꞌnabtac, sta xa yorail ti slajebal cꞌacꞌale. Ti voꞌoxuque avaꞌbinojic xa ti ta xtal jun ti ta scrontain ti Cristoe. Avi tana liꞌe, oy ep ti cristianoetic ti ta scrontainic ti Cristoe. Jech o xal un, ta jnaꞌtic ti slajebtic xa batel ti cꞌacꞌale.
19 Ti stuquic taje, liꞌ ilocꞌ ta jtojoltique. Yuꞌun maꞌuc onoꞌox jchiꞌiltic ta melel. Ti jaꞌuc jchiꞌiltique, liꞌ oy ta jtojoltic ti jechuque. Pero ti jech icꞌot ta pasele, yoꞌ jech ta xvinaj ta melel ti maꞌuc jchiꞌiltic scotole.
20 Yan ti voꞌoxuque laj xa yacꞌboxuc Chꞌul Espíritu ti Cristoe. Jech o xal un, jamal aba asatic acotolic.
21 Jech ta jtsꞌibaboxuc talel liꞌe, yuꞌun laj xa avojtiquinic ti melele. Pero mu yuꞌunuc ta xcal ti mu xavojtiquinique. Yuꞌun xanaꞌic lec ti mu xlocꞌ talel jutbil cꞌop ta stojol ti melele.
22 ¿Buchꞌu ti jutcꞌop un chaꞌe? Jaꞌic ta melel ti buchꞌu ta xal ti Jesuse maꞌuc ti Cristoe. Jaꞌ me ti yajcronta Cristo taj une. Yuꞌun ta scrontainic ti Dios Totile schiꞌuc ti Nichꞌonile.
23 Yuꞌun scotol ti buchꞌutic ta scrontainic ti Nichꞌonile, muꞌyuc oy ta stojolic ti Dios Totile. Yan ti buchꞌu ta xal ti xchꞌunoj ti Nichꞌonile, jaꞌ jech xtoc umbi, xchꞌunoj ti Dios Totile.
24 Jech o xal un, tey me oyuc o ta avoꞌntonic ti lequil achꞌ cꞌop ti laj avaꞌiic talel ta sliquebale. Ti mi jech tey oy ta avoꞌntonic ti cꞌusi laj avaꞌiic talel ta baꞌyele, jaꞌ jech ti voꞌoxuque junoxuc xa schiꞌuc ti Nichꞌonile schiꞌuc ti Dios Totile.
25 Yuꞌun ti Jesucristoe yalojbotic onoꞌox ti ta xacꞌ ti cuxlejal sbatel osile.
26 Jaꞌ jech laj jtsꞌibaboxuc avaꞌiic scꞌoplal ti jloꞌlavanejetic taje.
27 Pero ti voꞌoxuque avichꞌojic xa ti Chꞌul Espíritu ti laj yacꞌboxuc ti Cristoe. Jaꞌ yuꞌun un, mu persauc ti oy buchꞌu ta xaschanubtasoxuque. Yuꞌun jaꞌ stuc ti Chꞌul Espíritu ti ta xaschanubtasoxuc scotole. Ti cꞌu sꞌelan ta xaschanubtasoxuque, jaꞌ melel onoꞌox, muꞌyuc jutbil. Jech o xal un, junuc avoꞌntonic cuxianic ta stojol ti Cristoe jech chac cꞌu chaꞌal ta xaschanubtasoxuc ti Chꞌul Espíritue.
28 Jaꞌ yuꞌun un, Jnichꞌnabtac, junucoxuc me ta stojol ti Cristoe, yoꞌ jech jun coꞌntontic ta stojol ti cꞌalal ta xvul ta loqꞌuele, yoꞌ jech mu xijqꞌuexav ta stojol ti cꞌalal ta xtale.
29 Yuꞌun ti voꞌoxuque anaꞌojic xa ti lec yoꞌnton ti Jesucristoe. Jech o xal un, ta scꞌan ta xanaꞌic xtoc, scotol ti buchꞌutic lec ta spasique, jaꞌ me snichꞌnabtac ti Diose.