7
Laj yichꞌ señailic ti lajchaꞌchop snitilul ti Israele
1 Laj taj une. Tsꞌacal to un, laj quil ti oy chanvoꞌ ángeletic ti vaꞌajtic ta jujot schiquin schanjotal ti banomile. Jaꞌ jech xtoc un, tey laj spajes ti iqꞌue yoꞌ jech muꞌyuc icꞌ ti ta banomile, ti ta nabe, yoꞌ jech mu xbacꞌ ta icꞌ ti teꞌetique.
2 Jaꞌ jech xtoc laj quil yan ángel ti ilocꞌ talel ta sloqꞌueb cꞌacꞌale, ti yichꞌojbe sello ti cuxul Diose. Ti ángel taje tsots laj yavta ti yan chanib ángeletic ti iꞌacꞌbat stsatsalic ta soquesel ti banomile, ti nabe.
3 Jech laj yal:
―Mu to xasoquesic ti banomile, ti nabe, ti teꞌetique, cꞌalal mu to cacꞌojbecutic señail ta stiꞌbaic ti yajtuneltac ti Dios cuꞌuntique ―xi.
4 Jech yepal laj caꞌi ti laj yichꞌic ti señailique, jaꞌ ciento cuarenta y cuatro mil (144,000) ta voꞌ ta scotol ti lajchaꞌchop snitilul ti Israele.
5 Ti snitilultac ti Judae 12,000
Ti snitilultac ti Rubene 12,000
Ti snitilultac ti Gade 12,000
6 Ti snitilultac ti Asere 12,000
Ti snitilultac ti Neftalie 12,000
Ti snitilultac ti Manasese 12,000
7 Ti snitilultac ti Simeone 12,000
Ti snitilultac ti Levie 12,000
Ti snitilultac ti Isacare 12,000
8 Ti snitilultac ti Zabulone 12,000
Ti snitilultac ti Josee 12,000
Ti snitilultac ti Benjamine 12,000
Ep ti slapojic ti saquil cꞌuꞌile
9 Laj taj une. Tsꞌacal to un, laj quil ep ti cristianoetique ti oyic ta jujun banomile, ti jujutos stsꞌunobalique, ti jujutos ti scꞌopique, ti oyic ta jujun jteclume. Tey vaꞌajtic ta stojol ti Buchꞌu chotol ta mucꞌ ta chotlebale schiꞌuc ti jcot ta uni chije. Ep ta jmec ti cristianoetique. Muꞌyuc buchꞌu junucal xuꞌ ta xat ti cꞌu yepalique. Jaꞌ jech xtoc slapojic saquil cꞌuꞌic schiꞌuc xtoc stsacojic yanal xan.
10 Scotol tsots ta xꞌavanic ti jech ta xalique:
Ati jech lijcolotique,
jaꞌ yuꞌun ti Dios cuꞌuntic ti liꞌ chotol ta mucꞌ ta chotlebale schiꞌuc ti jcot ta uni chije,
xiic.
11 Scotol ti ángeletic ti vaꞌajtic ta stsꞌel ti mucꞌ ta chotlebale, ta stsꞌel ti moletique, ta stsꞌel ti chanib ti cꞌusi cuxajtique, tey laj spatan sbaic ta banomil ta stsꞌel ti mucꞌ ta chotlebale. Tey laj yichꞌic ta mucꞌ ti Diose.
12 Jech laj yalic:
Jechuc. Acꞌo yichꞌ muyubtael ti Dios cuꞌuntique.
Acꞌo yichꞌ ti slequilale, ti sbijile, ti coliyal xꞌute,
ti ichꞌbil ta muqꞌue, ti smucꞌule, ti stsatsale.
Jechuc o sbatel osil ti Dios cuꞌuntique,
xiic.
13 Oy jun ta scotol ti moletique jech laj sjacꞌbun:
―¿Buchꞌutic leꞌe ti slapojic ti saquil cꞌuꞌile? ¿Bu talemic? ―xi.
14 Jech laj calbe:
―Voꞌot xanaꞌ atuc ―xcut.
Jech ti mole jech laj yalbun:
―Leꞌe, jaꞌic ti buchꞌutic ti cuch yuꞌunic ti svocolique. Laj xchuqꞌuic ti scꞌuꞌique, laj sacubtasic ta sventa schꞌichꞌel ti jcot ta uni chije.
15 Jech o xal un, liꞌ oyic ta stsꞌel ti bu chotol ti Diose. Cꞌacꞌal acꞌobal ta xacꞌ sbaic ta tunel liꞌ ta templo yuꞌun ti Diose. Jaꞌ yuꞌun un, ta xchabiatic yuꞌun ti Buchꞌu chotol ta mucꞌ ta chotlebale.
16 Mu xa xaꞌiic svocolic yuꞌun ti viꞌnale, ti taqui tiꞌile. Mu xa xlajic ta cꞌacꞌal. Mu xa cꞌusi ta spasbatic yuꞌun ti tsots cꞌacꞌale.
17 Yuꞌun ti jcot ta uni chij ti oy ta oꞌlol ti mucꞌ ta chotlebale, ta xchabi jech chac cꞌu chaꞌal ti chije. Tey ta xꞌicꞌatic batel ta sat voꞌ ti jaꞌ ta xacꞌ cuxlejale. Jaꞌ jech xtoc ta scusbat scotol ti yaꞌlel satic yuꞌun ti Diose ―xi.