LIPE MUNDORUMU YEMA
Yesusini “Nanga Kongonomo Tende-Paa.” Nimbe Lipe Mundorumu Yemanga Bokumu
Bokumunge Ungu Pulu Mare
Ye kisene Yesusinge temanemo toringimenga te LLuku. Pe LLukuni Yesusinge temanemo topa pora sipelie ibokumu torumu. Boku talo pea ye nomi Tiopillasi simbendo torumu (LLuku 1:1-4, Lipe Mundorumu Yema inie 1:1-2). Inie 1:1 paa kanani. Akune boku ou torumu bokumunge “Yesusini pulu polopa terimu mele torundu.” nirimu (Mako 1:1 mele). Aku liemo ibokune molemo temanema Yesusinge temanemala, Yesusinge ungumela. Nalo Yesusi mana molopalie terimu mele molo. Yesusini yu lombili andoli yema yunge tondolomo ‘eno simbo kinie nanga ungumu nindiku, nanga kongonomo tendenge.’ nimbe yunge Minimu eno sirimu (1:3-9, 2:1-3). Yesusinge Minimu enonga konopune molopa tondolo purumu kinie enone Jerusalleme sukundu Yesusinge ungumu pulu polko ningu sindikulie (2:1-8:1), pe kolea awisilinge anjo anjo ningu sindiliku puringi. Pe Pollo kepe “Nanga kongonomo tende-pou.” nimbe lipe mundorumula. Kanu yema Yesusini “Nanga kongonomo tende-paa.” nimbe lipe mundorumu yemane ulu mare awisili teringi. (Enonga imbimunge ungu pulu te boku ambolkonomonga alsena anjokondo “1. aposel” molemo.) Pita kinie Polloselonga temane awisili molemo. Pitanga temanema 1:15-5:11,29-32, 8:14-25, 9:32-11:18, 12:1-19 molopa, Pollonga temanema 7:58 pulu polopa nimbe, 28:31 nimbe pora silimo. Nalo kamu koloringili mele naa nimbe silimo.
Ou Juda yembomane mindi ungumu pilku Kirasinge yemboma moloringi. Nalo pe Juda yembo awisilini “Ungumu naa pilimolo.” niringi kinie Juda yembo naa molko yembo lupe moloringime ningu siringi kinie eno awisili “Sike.” ningu tondolo munduku pilku Kirasinge yemboma moloringi. Yesusi Kirasi yunge yembo talapemo wendo wendo oringi mele ibokune molemo (1:15, 2:41,47, 8:1,4-8,26-40, pe awisilila).
Temane mare LLukuni we pilipelie boku torumunje. Nalo wale mare yu yuyu Pollo-kinie andopa kanopalie torumula. (Yu pea andoringi kinie “Olio isipu sipu terimulu.” nimbe boku torumu mele 16:10-17, 20:5-21:18, 27:1-28:16 molemo. Pillimono 23-24, Kollosi 4:10-17 kananila.)
Ungu pulu mare boku ambolkonomonga alsena anjokondo “8. bilip”, “2. arapela lain”, “14. Grik” mimi siku kanani.
Ya ungu pulumu pora nikimu.
1
1:1-8:3 YESUSINI “NANGA KONGONOMO TENDE-PAA.” NIMBE LIPE MUNDORUMU YEMANE KOLEA AWILI JERUSALLEME YESUSINGE UNGUMU NINGU SIKU MOLORINGI TEMANEMO
1:1-3 LLukuni IBoku Talo Sipemo Tombando
1 Ye Awili Tiopillasi, Yesusini pulu polopa ulume tepa yemboma ungu mane sipe terimu mele ou boku tenga torundu kanumu.
2 Ou ulume pulu polopa telipe pupelie, pe yandopa ‘Kelepo mulu koleana altopo nondopo pumbo.’ nimbe pilipelie nirimumuni, “Nanga kongono tende-paa.” nimbe mako topa lipe mundorumu yema,
Mini Kake Telimu yu kinie molopa lipe tapondorumu-ne Yesusini enondo “Eno i siku i siku teangi.” nimbe ungu mane sirimu.
3 Yesusi yu mindili nomba kolopa lomboropa ola molopalie nirimumuni, yu ‘Lombili andolime na paa sike lomboropo ola molondu mele kanangi.’ nimbe eno moloringine yu pupe eno kanoko molangi ulu mare terimu. Yu walse walse nimbe eno moloringine omba mona molopa, Pulu Yemo ye nomi kingimu molopa kolea nokolemo nokomba mele eno nimbe sirimu. Aku sipe tepa molopili wale paono talo omba purumu.
1:4-12 Yesusini “Mini Kake Telimu Omb Enone Linge.” Nimbelie Yu Mulu Koleana Olando Purumu Temanemo
4 Walse eno kinie molopalie Yesusi yuni nimbendo: “Eno ou kolea awili Jerusalleme munduku siye naa kolangi. Ou Tatane “Simbo.” nirimu Minimu ‘Ou opili pe pamili.’ ningu inie we nokoko molangi. Akumu nane eno ou nimbu sirindu pilieringi kanumu.
5 Nane enondo ou nimbondo: “Jonone yemboma no linderimu lsingi nalo wale awisili omba naa pupili eno nanga yemboma Pulu Yemone Mini Kake Telimu simbe linge.” nirindu kanumu.” nirimu.
6 Kanu kinie Yesusi lombili andolime yu kinie maku toko molkolie niringimuni, enone Yesusindu ningendo: “Awilimu, kinié walemonga nuni “I sirele yemboma altoko enono molangi, Romo gapomano manie pupili, enono gapomano liengi, na enonga ye nomi kingimu molopo eno nokambo.” nininje?” ningu walsiku pilieringi.
7 Yuni enondo nimbendo: “Tatane ulu lupe lupe “Tembo.” nimbe mako tolemo walema kinie melema inge teli walema kinie enonga kongono molo. Tatane ulume temba walema Tata yuyu akume pilipe molemo.
8 Nalo eno molongena Mini Kake Telimu ombalie ‘Eno tondolo pupili molangi.’ nimbé. Kanu kinie pe eno tondolo pupili molkolie kolea awili Jerusalleme kinie, kolea Judia disiriki lemo taonona kinie kolea kangama pali kinie, kolea Sameria disiriki lemo koleama pali kinie, kelko ma koleama pali kinie yembomando enone na terindu mele kepe “Tembo.” nirindu mele kepe kanoko pilieringi mele ningu siliku punge.” nirimu.
9 Yuni aku sipe nimbe molopalie, eno kanoko molangi yu ma koleamo mundupe siye kolopa mulune olando purumu kinie kupe te omba yu pipi sirimu, pe altoko naa kanoringi.
10 Yu ola pumbe purumu kinie eno olando siku neme neme ningu kanoko angilieringi kinie eno angilieringine ye talo mulumbale kake pakokolo tamburumbu ongo angilkululie niringilimuni,
11 elone enondo ningelendo: “Kolea Gallilli yema, eno mulune olando siku nambemune kanoko angilkimiliye? I Yesusi, Pulu Yemone kinié mulu koleana olando likimu yemo, yu kinié pukumu kanokomele mele pe walse aku sipe kelepa manie ombá.” niringili.
12 Kanu kinie eno ma pangi Unjo Ollipi Poniemo munduku siye kolko Jerusallemendo kelko yando oringi. Aku ma pangimu kinie kolea awili ⸤Jerusalleme⸥ kinie paa nondopa mele lierimu, aulke ponjilimu, ⸤Juda yemboma koro moloringi⸥ wale Sambatemonga Isirele yemboma andoringi aku mele.
1:13-26 ‘Judasi Isikeriotenga Ye Te Kolo Wangopa Molopili.’ Ningu Mako Toringi Temanemo
13 Yesusi mulu koleana olando purumu kinie yu lombili andolime Jerusallemendo yando ongo suku pukulie niringimuni, ulkena puku ulke olakondo peringine ola puringi. Akune peringi yemanga imbime isipe: Pita keme Jono keme Jemisi keme Enderu keme, Pillipu Tomasiselo kinie, Batollomiu Mateyuselo kinie, Allapiasi malo Jemisi keme “Olio Isirele yemboma oliolio gapomano molamili.” ningu karaye teringi talape ‘Sellote’ nili ye Saimono keme elo kinie, Jemisi malo Judasi yu kinie, aku ye rureponga yepoko aku ulkena peringi.
14 Kanune eno pali liku maku toko, konopu telune pupili Pulu Yemo kinie ungu ningu mindi moloringi. Ambo mare kinie Yesusinge anumu Maria kinie Yesusinge angenupili kinie akume pea pali Pulu Yemo kinie ungu ningu moloringi.
15 Kanu walemanga Yesusinge lombili andoli yembo wane anderete tuwendi moloringi kinie Pitane ola angilipe enondo nimbendo:
16 “Angokeme, Mini Kake Telimuni ⸤ye nomi kingi⸥ Depisinge kere-pundune pe wendo ombá mele nirimu yuni bokune torumu mele yu paa sike aku sipe wendo ombámondo nirimu. Akumu paa sike wendo orumu. Kanu ungumu Judasini Yesusi yu opa puluema lipe simbe Depisini ou nirimu kanu ungumunge pulumu talko wendo orumu.
17 Judasi olio kinie pea molopo kongono pea tepo molorumulu kanumu. Akumunge ye te yunge kolo wangopa molopili” nirimu.
18 (Aku ye Judasi yu tepa kenjerimumunge kou siringi kanumuni ma te topo topa lsimu kinie yu mana manie topa mundupe yunge olomo suku nimbe yunge oloma pali wendo omba purumu.
19 Pe Jerusalleme moloringi yemboma pali Judasi aku terimu pilkulie enonga umbu ungune kanu koleamo imbi leko ‘Akeltama’ niringi. ‘Akeltama’ akumunge pulumu ‘Meme Ondoli Mamo’.)
20 “I ungu wendo ombá nirimu Depisini bokune torumu ungumu Konana bokune molemo mele isipe:
‘Yunge ulkemo we angiliepili,
Akune yembo te naa peangi.’
nimbe molemo kanumu. Konana tene isipe nikimula:
‘Yembo te yunge kongonomo kolo wangopa tepili.’
nimbe molemo kanumu.
21-22 “Kapola, iunguselonga te ou kamu talko wendo orumu, kinié te kamu wendo opili teamili. Ou olio ye engaki rurepo molorumulu inikirumunge te manie purumumunge kolo wangopo te mako tamili. Iye mako tomolomo yu isipe ye te molopili: Ou Jonone pulu polopa yembo no linderimu mele kepe, pe kelepa yandopa yandopa Yesusini ulume tepa ungume nimbe molopalie, yu olio mundupe siye kolopa mulu koleana olando purumu mele kepe, aku ulume pali wendo orumu mele, olio kinie tapu topa andopa kanorumu ye te mako tamili. Kanu yemo yuni Yesusi lomboropa ola molorumu mele kanorumumunge olio pea manda andopo nimbu simolo.” nirimu.
23 Pitane aku nirimu kinie pilkulie enone ye talo mako toringi. Ye tenga imbi Josepo, kanumundu ‘Basipasi’ niringila, (yunge imbi te ‘Jasitasi’ niringila;) ye te Matayasi.
24-25 Aku yeselo mako tokolie Pulu Yemo walsikulie ningendo: “Awilimu, nu yembomanga pali konopune kanoleno kene Yesusini “Nanga kongono tende-paa.” nimbe lipe mundorumu ye rureponga kongonomo Judasi mundupe siye kolopa yunge koleando purumu, kanu kongonomo Judasi yu kolo wangopa temba ye te nuni iyeselonga te mako tonumu olio liku ora si.” niringi.
26 Kanu kinie pepá gomo talonga yeselonga imbiselo toko manie mundukulie mingimu ambolko lope-lape tendekolie wendo lsingi kinie Matayasinge imbimu wendo orumu, kinie “Yesusini ou lipe mundorumu ye rureponga yepoko kinie pea kongono tapu toko teangi.” niringi. Kanu kinie kanu lipe mundorumu yema altoko engaki rurepo moloringi.