15
Moiseyi q'a Maryami mə̌ğ
1 T'e vədə Moiseyen q'a israilluğon Q'ončuğoynak' me mə̌ğə̌t'un mə̌ğpi:
«Zu Q'ončuğoynak' mə̌ğk'oz!
Şot'in kala q'ələbəne q'azayinşi,
Ěka q'a ěklat'u dənizəne bosi!
2 Q'ončux bezi zore,
Q'ončuğone za mə̌ğpest'alo,
Q'ončuğon za çark'esedi.
Q'ončux bezi Buxačuxe,
Zu Şot'ay s'iya alaboz.
Q'ončux Bezi bavay Buxačuxe,
Zu Şot'o alxışp'oz.
3 Q'ončux q'oççağe,
Q'ončuxe Şot'ay s'i.
4 Şot'in faraoni davin araboğo,
Q'oşunal dənizəne bosi.
Faraoni c'ək'eśi davabalxo
Č'oč'a dənizət'un batk'i.
5 Bə̌ğə̌loy xenen içoğo but'k'i
J̌ě k'inək' tumel śirik' taneşeri.
6 Ay Q'ončux! Vi yön kul ost'aar hamal zorbane.
Ay Q'ončux! Vi yön kiinen düşmənə k'as'p'i.
7 Vi loxol eğalt'oğo Hun Vi kala s'iyenen saki,
Vi əcuğ bəc'ük'eśi şot'oğo q'ari o k'inək' bok'osebi.
8 Vi bǒxmǒğoy nəfəsen xena çurpesedi,
Şoval bari k'inək'e baki,
Dənizi posk'ala xe buz k'inək' ost'aare baki.
9 Düşmən lovğalayinşebaksay:
"Şot'oğo şəp'eśi biq'oz,
İçoğoy kiyel bakalt'oğo haq'i za boşevk'oz!
Bez q'ılınca c'evk'i şot'oğo əfçiboz!"
10 Ama Hun Vi nəfəsen funpi, dənizenal şot'oğo q'uc'epi.
Q'urq'uşun k'inək' bə̌ğə̌loy xene boş batt'unk'i.
11 Ay Q'ončux, buxačuxxoy arane Vallarik'o butene!
Vallarik' ı̌veloval butene!
Vi kalaluğ alxışa q'a q'ı̌ya layiğe,
Möcüzoox yaratmişal Vallarik'o butene!
12 Vi yön kula boxondi, oç̌alenal düşmənxo q'uc'epi.
13 Vi nu badalbakala çuresunen azuk'a çark'est'i yaq'en ak'est'i.
Vi zoren Vi ı̌vel ganun taşeri.
14 Azuk'xon mot'o ibaki t'ut'uk'alt'un,
Filist'luğo q'ǐyen bot'ale.
15 Edomi kalaluğbalxoval t'e vədə q'ǐyen haq'ale,
Moavi kalorox kala q'ı̌ya baft'alt'un,
Kənanluyox isə q'ic'eśi mandalt'un.
16 Şot'oğo q'ǐyen q'a vəlvəlinen haq'ale.
Vi azuk' c'ovakamin
Vi zorba kiin oq'a şorox ǰě k'inək' lal-kar bakalt'un!
Ay Q'ončux, Vi çark'est'i me azuk' c'ovakale!
17 Şot'oğo eçeri Vi buruğo p'ap'esp'alnu,
Vi yəşəyinşbseynak' yaratmişi gala,
Ay Q'ončux, Vi kiin biq'i ǐvel gala!
18 Q'ončuğon həmişəluğ padçağluğbale».
19 Faraoni ěkurxo, davin araboox saal ěklorox dənizə bağat'an Q'ončuğon dənizi xena şot'oğoy loxol qoşe qaydey. İsrailluyox isə dənizi bǐyexun, q'ari ganuxunt'un c'ovakey.
20 Aaroni xunçi xavareçal Maryamen iz kiyel dəpe ext'i. Bütüm çupuxxonal içoğoy kiyel dəp ext'i əçik'a şot'ay bač'anexunt'un taśi.
21 Maryamen şot'oğoynak' me mə̌ğə̌ne mə̌ğpi:
«Q'ončuğoynak' mə̌ğpanan,
Şo gele kalane.
Ěka saal ěklat'oğo dənizəne bosi!»
Q'ončuğoy amdarxon İz əyitə əməlbsuna yoxlayinşbsun
22 Moiseyen israilluğo Č'oč'a dənizi t'ǒǒxun Şur s'iyen ams'i oç̌alane taşeri. Şorox t'et'iya xib ği yaq't'un taśi, ama xe tet'un bə̌ğə̌bi.
23 Mara uk'ala gala p'ap'at'an isə t'iya bakala xena ǔğěs tet'un baki, şot'o görə ki, ağuney. Kot'o görəne t'e ga Mara k'alesa.
24 Azuk'en «k'ə ǔğěn?» pi t'ot'onepi, Moiseyi ç̌oyel əyitpsat'un burqi.
25 T'e vədə Moiseyen Q'ončuğo xoyinšebi, Q'ončuğonal şot'o sa xodin taye ak'est'i. Moiseyen şot'o xenane bosi, xeyal ǔğə̌ləne baki.
T'et'iya Q'ončuğon israilluğoy İzi əyitə əməlbsuna yoxlayinşbseynak' şot'oğoynak' q'ayda-k'anun laxi pine:
26 «Əgər və̌n ef Buxačux bakala Q'ončuğo ǔmǔxlaxaynan, Şot'ay piyes düzgün ak'eğala əşurxo biq'aynan, Şot'ay əmirxo əməlbi k'anunxo efaynan, misirluğoy loxol hari azarxoy sayco və̌ynak' eğala tene. Axıri və̌x q'olaybala Q'ončux Zuzu».
27 Oşa israilluyox Maraxun c'eri Elimat'un hari. T'et'iya p'as's'e xene orayin saal yetmiş xurmin xodoy. Şot'oğon t'e orayinxoy t'ǒğǒl içoğoynak' çurk'ala gat'un düzbi.