İOANİ
XİBİMCİ NAMAK'
Běšin əyit
İoani me namak'al süft'in p'ə̌ namak'allarik' həysət'in T'urśiya bakala Efesa, İsusi nanaxun bakalt'uxun təxminən 90 usen oşane śameśe. Me namak' nə süft'in namak'allarik' bütüm věbakalxoynak' tene, nəəl p'ə̌mci namak'allarik' maninesa vebakalxoy cəmiyəteynak'. Me namak'a İoanen Gay s'iyen sa amdareynak'e śame. Şot'in me amdari seri yaq'a baksuna, İsusa q'abulbi Q'ončuğoy sakala işiği boş yəşəyinşbsuna ibaki heq'ədər mǔq baksunaxune śame.
Alimxoy fikiren me Gay uk'ala amdar bakes banekon maninesa věbakalxoy cəmiyətin üzvine, namak'i boş iz s'i duğeğala Diot'ref isə t'e cəmiyəti kalat'oğoxun soğo. İoanen iz amdarxo t'e cəmiyətə karoozbi İsusi Mǔq Xavara yəymişbseynak'e yaq'abey. Diot'refen isə şot'oğoy zombsuna q'abultenebsay, cəmiyətəxunal şuk'k'ala şot'oğo ǔmǔxlaxsa tene barey. Qavuna mandi me amdarxo İsus Xrist'osi Çark'est'al baksuna ük'in věbakala, me zombsuni seri baksuna q'abulbala Gayene iz k'oya q'onağbsa, şot'oğo lazım bakala hörmətəne ak'est'a.
İoanen namak'a Gaya tərifbsunaxune burqsa, oşa şot'aynak' Diot'refi iz yaq'abi amdarxo saal şot'oğoy Seri Bakalt'ay barada uk'alt'oğo nu q'abulbsunaxune śame. Namak'i axırast'a İoanen iz s'iya duğala Dimit'ri isə bakes banekon ki, Gaya me namak'a p'ap'esp'i amdare.
1
1 Zaynak' əziz bakala Gay, me namak'a śamk'ala, vi Seri Bakalt'u çalxi düz yaq'a baksuna görə va gele çureğala ağsaq'q'alaxun xeyirq'an baki.
2 Zaynak' əziz bakala dost', afırızne ki, vi əşurxo şaat'q'an taśi, Buxačuğon vi elmoğo maq'an laft'i, vi bədənəl vi uruf k'inək' sağlamq'an baki.
3 Beşi viçimoğon hari vi seri bakala zombsunaxun nu c'eri Şot'ay laxi yaq'en taysuna zaynak' exlətp'at'an gele mǔqezbaki.
4 Zaynak' bezi əyloğoy düzgün bakala yaq'en taysuna ibaksunaxun kala mǔqluğ teno.
Gaya tərifbsun
5 Zaynak' əziz bakala dost', hun bezi yaq'abi, vi nu çalxala amdarxoynak' bit'oğon vi düzgün yaq'axun nu c'eysunane ak'est'a.
6 Şot'oğon hari vi içoğo ak'est'i hörməti barada miya bakala cəmiyəteynak' exlətt'unbi. Həysəəl şot'oğo Mǔq Xavara karoozbseynak' İsusa çalxalt'oğoy s'iya layiğ yaq'abadayin şaat' sa əş biq'in bakon.
7 Axıri şorox me yaq'a c'eğat'an buxačuxsuzt'oğoxun hik'k'al tet'un ext'i, içoğoy sa məksəde buy - amdarxo Xrist'osa çalxest'un.
8 Metər amdarxo köməybsun beşi borce, şot'aynak' ki, şot'oğoy q'a beşi niyət sane - Mǔq Xavara karoozbsun.
Diot'ref q'a Dimit'ri
9 Zu me pit'oğoy barada cəmiyəteynak' śamezpi, ama içu cəmiyətin kalo bi Diot'refen beşi amdarxo q'abulbsun çurtenesa.
10 Kiya hevaxt' eğayiz şot'ay biq'ala əşurxoy barada exlətp'oz: hetəre beşi barada əfçi əyitmux yəymişi amdarxo yaxun irapst'a. İzi yax nu q'abulbsun t'ǒǒx, hələ sa q'abulbalt'oğoval bartenne, amdarxo cəmiyətəxun şəp'esunene q'ı̌dest'a.
11 Zaynak' əziz bakala dost', ama hun pist'oğollarik' təə, şaat't'oğollarik' hərəkətba. Şaat' əş biq'alo Buxačuğoxune, pisluğ balo isə Buxačuğoxun ə̌xile.
12 Běğa, Dimit'rin barada bitot'in şaat'e əyite, izi düzgün yəşəyinşbsunenal mot'o ak'esest'a. Yanal mot'oğo beşi piin ak'i me barada şahidluğyanbsa, beşi uk'alt'oğoy seri baksuna isə avanu.
Dirist'oğonbsun
13 Vaynak' śamk'ala gele əyitmuxzax bu, ama mot'oğo namak'en upsun tez çuresa.
14 Buxačuğon bark'ayin usumluğen suna ak'i exlətp'es bakalyan.
15 Vaynak' serluğez arzubsa. Miya bakala dost'urxon vaynak' dirist'uğt'un yaq'absa. Hunal kiya bakalt'oğoy bitova zaxun tək-tək dirist'uğ upa.