21
Aradi q'a iz t'ǒğǒl bakala şəhərmoğoy əfçibaksun
1 Negeva bakala Arad şəhəri padçağen inebaki ki, israilluyox At'arima tağala yaq'ent'un c'ovaksa. Me padçağ iç kənanluney. Şo azuk'i loxol davinane c'eri, israilluğoxunal şot'ay kiyel əsir baft'aloroxe baki.
2 T'e vədə israilluğon elasp'i Q'ončuğo əyitt'un tadi: «Əgər Q'ončuğon me azuk'a beş kiyel tadayin, yan şot'oğo k'as'p'i içoğoy şəhərmoğoval dirist' śarpi śik'alyan».
3 Q'ončuğon israilluğoy me xoyinša inebaki. T'e aradlu kənanluğonal şot'oğo taşevt'unk'i. Azuk'en şot'oğoy şəhərmoğoval, t'iya yəşəyinşala kənanluğoval dirist' əfçinebi. Mot'oxun oşa t'e gane s'iya Xormat'un laxi.
Moiseyi misəxun dizik' düzbsun
4 Azuk' Edom oç̌ala nu bayseynak' Hor buruğoxun c'erit'uxun oşa fırıpi Č'oč'a dənizi yaq'ene taśi. Yaq' boxoyey, amdarxonal ene porttet'unbsay.
5 Şot'oğon Buxačuğoxun q'a Moiseyaxun t'ot'ot'unney: «Het'aynak'nan yax Misirəxun c'evk'i? Ams'i oç̌ala biseynak'? Nə xeya bu, nə šuma bu! Me hik'k'ala nu dərmən ukuni loxolal ene běğes teyan baksa!»
6 T'e vədə Q'ončuğon amdarxo duğseynak' azuk'i çurk'ala gala zəhərlu dizik'xone yaq'abi, şot'oğon amdarxo dut'unğsay, azuk'i boşt'anal gele amdare p'uri.
7 İsrailluğon Moiseyi t'ǒğǒl hari pit'un: «Yan günaxyan əşp'est'i, Q'ončuğoxun q'a vaxun t'ot'oyanpi, isə xoyinšyanbsa, Q'ončuğo k'alpa afırıpa, bərkə yax me dizik'xoxun çark'est'ane!»
Moiseyen Q'ončuğo azuk'a görə xoyinšebi,
8 Q'ončuğonal Moiseya pine: «Sa dizik' düzbi şot'o durut'i loxol ost'aarba. Barta dizik'en duğalt'in şot'ay loxolq'an běği, t'e vədə biyalatene».
9 Moiseyen misəxun sa dizik' düzbi şot'oboxoy durut'i loxol ost'aarebi, şuval dizik'en duğayin me misnə dizik'i loxol běğat'an bisateney.
Moava tağala yaq'
10 İsrailluyox p'urum yaq'at'un baft'i, hariyal Ovot'a çurt'unpi.
11 Ovot'axun c'eri Moavi běğ c'eğalaç tərəf bakala ams'i oç̌ala, İye-Avarima çurt'unpi.
12 Memiin p'urum yaq'a baft'i hari Zered uk'ala dərənet'un çurk'ala ga düzbi.
13 Oşa t'et'iinal c'eri hari Arnon oqe t'iyə̌mi tərəf bakala ams'i oç̌alat'un çurpi. Memiin emorluğoy oç̌ale burqesay. Arnon oq emorluğoy q'a Moav oç̌alxoy arane sa zahman k'inək'ey.
14 Me barada "Q'ončuğoy davoox" uk'ala girke boş metəre śam:
"...Sufina bakala Vahev q'a dəroox, Arnon,
15 Ar ayizexun c'ovaki Moavi zahmana bakala dərəni döşexun tağala yaq'..."
16 T'et'iin israilluyox Beera Q'ončuğon Moiseya "azuk'a girba, şot'oğo xe tadoz" pi kərizin t'ǒğǒlt'un hari.
17 Miyat'un israilluğon me mə̌ğə̌ mə̌ğpey:
«J̌alpa buybaka, ay kəriz,
Me kərizin barada mə̌ğpanan!
18 Azuk'i kalat'oğon q'a s'ilat'oğon
İçoğoy kiin ak'est'i gala kašeśi kərizin barada mə̌ğpanan!»
Oşa israilluyox ams'i oç̌alaxun Mat't'anat'un taśi.
19 Mat't'anaxun Naxaliela, Naxalielaxun Bamot'a,
20 Bamot'axun isə Moav oç̌ala bakala dərənet'un taśi. T'iya bakala P'isk'a buruğoy belxun dirist' me xam ga ak'esay.
Sixon q'a Og padçaği israilluğo taşevksun
(K'an. 2:26-3:11)
21 İsrailluğon emorluğoy padçağ bakala Sixoneynak' xavar yaq'abi pit'un:
22 «Xaişyanbsa, vi oç̌alaxun c'ovaksuna yax icaza tada! Nə ef əkini, nə t'ulluğxoy boşt'an teyan c'ovakal, ef kərizxoy xenaxunal teyan ǔğə̌l. Vi oç̌alaxun c'ovakamin Kala yaq'axun teyan c'eğal».
23 Ama Sixonen israilluğo iz oç̌alaxun c'ovaksuna icaza tene tadi. Şot'in dirist' iz q'oşuna girbi davabseynak' ams'i oç̌ala şot'oğoy běše c'eri. Şorox Yahaśa ç̌o-ç̌oya hari davat'unbi.
24 Davina isə israilluğone taşeri. Şot'oğo q'ılıncen k'as'p'i içoğoy oç̌alxo Arnon oqaxun burqi Yabboga oqe t'ǒğǒl bakala ammonluğoy zahmanal śirik' ext'undi. Ammonluğon isə içoğoy oç̌alxo şaat't'un q'orişbsay.
25 Hametər, israilluğon emorluğoy Xeşbon şəhərə q'a şot'ay hərrəmine bakala ayizmoğo saal mandi bito şəhərmoğo kiyel badi baśi t'iya art'unśi.
26 Xeşbon emorluğoy padçağ Sixoni arśala şəhərey. Şot'in Moavi mot'oxun běš baki padçağaxun davabi şot'oğoy Arnon oqal śirik' bakala bito oç̌alxo ext'eney.
27 Me barada mə̌ğə̌l śameśeney:
"Xeşbona ekinan!
Barta Sixoni şəhər təzədənq'an biq'eśi,
Barta iz bariyox təzədənq'an laxeśi!
28 Xeşbonaxun arux,
Sixoni şəhərexun yalove c'eri!
Şot'in Moav oç̌ala bakala Ar şəhərə,
Arnon oqe t'ǒğǒl bakala ǰěyurxo bul k'os'balxo
Bok'osp'i śinepi!
29 Vay vi hala, ay Moav!
Ay Kemoşa içeynak' buxačux bi azuk', əfçinbaki!
Kemoşen vi ğarmoğo dədərgünebi,
Vi xuyərmoğo emorluğoy padçağ Sixoni kiyele efi!
30 Mone, və̌x tayanşeri,
Xeşbonaxun Divon şəhərel śirik' əfçiyanbi.
Medvanaxun burqi Nofahal śirik' hər tərəfə vərənyanbi".
31 Hametər, israilluyox baśi emorluğoy oç̌ala art'unśi.
32 Oşa Moiseyen Yazer şəhərəl piyexun c'vakest'eynak' amdarxone yaq'abi. İsrailluğon şot'ay hərrəmine bakala ayizmoğoxunal emorluğo şəp'eśi baśi t'iya art'unśi.
33 T'et'iin c'eri israilluyox yaq'en Başanaçt'un laśi. Başani padçağ bakala Ogenal dirist' iz q'oşuna girbi şot'oğoy běše c'eri. Şorox hari Edreyi şəhəre davinat'un c'eri.
34 Q'ončuğon Moiseya pine: «Şot'oxun ma q'ı̌ba! Zu şot'o içuval, iz q'oşunal, iz ölkinəl va ene tadez! Xeşbona arśi emorluğoy padçağ Sixoni bel eçerit'u şot'ay belal eçalnu».
35 İsrailluğonal şot'oğo bitova - Oga içu, iz ğarmoğo, dirist' iz q'oşuna - k'as'p'i śit'unpi. Şot'oğoxun sayco dirist' tene mandi, içoğoy oç̌alxoval bito israilluğone mandi.