Girke qoomci hissə: 107-150-ci Ǐvel mə̌ğurxo.
107
107-ci Ǐvel mə̌ğ
1 Q'ončuğo şükürbanan, şot'o görə ki, şaat' bakalone Şo,
Şot'ay yax çuresun həmişəluğe, nu badalbakala çuresune şo!
2 Barta Q'ončuğon çark'est'it'oğoy,
İçoğo düşməni kiyexun haq'it'oğoy ǰomoxun maq'an biti me əyitmux.
3 Barta dünyəni bip' t'ǒǒxun gireśit'oğon,
Buxačuğon içoğo běğc'eğalaxun q'a běğbatk'alaxun,
Güneyaxun q'a q'uzeyaxun girbi topbit'oğon mot'o bayanbeq'at'un.
4 Şot'oğoxun bəziyorox ams'i, xesuz oç̌ala fırıpsun mandet'uniy,
İçoğoynak' mesbala sa ga tet'un bə̌ğə̌bsay şot'oğon.
5 Busa-xeneza tarat'unney,
Halnuxunt'un bist'ay şorox.
6 Ama Q'ončuğot'un k'alpi şot'oğon içoğoy t'ar ğine,
Şot'inal İz kula boxodi çark'esedi şot'oğo t'e bəlinəxun.
7 Düz yaq'ene taşeri şot'oğo
İçoğoynak' mesbes bakala t'e ganu.
8 Şükürq'an baki Q'ončuğo İzi nu badalbakala çuresuna q'a
Amdarxoynak' bi nu ak'eśi əşurxo görə!
9 Xeneza bok'ala ük'ə xe tadalo,
Busat'oğo İz neymətxon boşevk'alone Şo!
10 Bəziyorox isə zülmət bayinq'unat'uniy,
Türminət'un boserey şot'oğo içoğoy kul-tura zinciren ğaç̌p'i.
11 Buxačuğon pit'oğoy əleyinə c'eriyorox,
Ala Arśit'ay k'anunxo hik'k'albiyoroxey şorox.
12 Mot'o görəl Buxačuğon şot'oğoynak' bı̌hi əş yaq'absunene içoğoy cazina zapest'ay,
Metəre içoğoy dəməne bakala ǰěna bosest'ay.
Turaxun bitat'an biq'i alabalal buteney şot'oğo.
13 T'e vədə Q'ončuğot'un k'alpi şot'oğon içoğoy t'ar ğine,
Şot'inal çark'esedi içoğo bəlinəxun.
14 Zapi c'evek'i şot'oğo t'e zülmət bayinq'unaxun,
K'as'epi şot'oğo ğaç̌p'i zincirxo.
15 Şükürq'an baki Q'ončuğo İzi nu badalbakala çuresuna q'a
Amdarxoynak' bi nu ak'eśi əşurxo görə!
16 Dəmiri darvazoğo duği sakalo,
Nu qayeğala şəft'oğo xoxp'i qayk'alone Şo.
17 Haq'ılsuzluğaxun günax əşp'est'uni,
Buxačuğoy əyitəxun c'eysuni cazina zap'k'aloroxal buney.
18 Ukunaxunt'un bot'bakey şorox azari kiyexun,
İçoğoy sa tur gərəmzoğoney.
19 Ama Q'ončuğot'un k'alpi şot'oğon içoğoy t'ar ğine,
Şot'inal çark'esedi içoğo bəlinəxun.
20 Q'olayebi şot'oğo İzi sa əyiten,
Bisuni kiyexune ext'i şot'oğo.
21 Şükürq'an baki Q'ončuğo İzi nu badalbakala çuresuna q'a
Amdarxoynak' bi nu ak'eśi əşurxo görə!
22 Barta içoğoy şükürbsuna q'urbanxo eşt'unenq'at'un ak'est'i,
Barta Şot'ay biq'i əşurxo mǔq-mǔq mə̌ğpiq'at'un bayanbi şot'oğon!
23 Dənizə bakaloroxal buney,
T'e bə̌ğə̌loyluğxoy loxolxun gəmiğon taśi içoğoy šuma q'azayinşaloroxey şorox.
24 At'unksay şot'oğonal Q'ončuğoy kiyexun ayeğalt'oğo,
Şot'ay t'e xeyurxoy bel eçala nu ak'eśi əşurxo at'unksay.
25 Şot'ay ǰomoxun c'eğala sa əyiten
Dənizi ləpoğo eqevk'ala tufane galey.
26 Gəmiyoxe t'e ləpoğoy loxol göynul ěqeśi bist'ay,
İz boş bakalt'oğoy ük'e c'ap'baksay q'ı̌yexun.
27 Lilit'unney şorox finağoyxollarik',
İçoğoy avabakaloroxal eyexun c'ereney şot'oğoy.
28 Ama Q'ončuğot'un k'alpi şot'oğon içoğoy t'ar ğine,
Şot'inal zapi c'evek'i içoğo t'e bəlinəxun.
29 Şip'ebi Şot'in t'e tufana,
Ěqeśi ləpoğone bask'est'i.
30 Ük'e qayeśi şot'oğoy dənizi şip'baksuna ak'i,
C'evek'i Q'ončuğon şot'oğo içoğoy tağala gala.
31 Şükürq'an baki Q'ončuğo İzi nu badalbakala çuresuna q'a
Amdarxoynak' bi nu ak'eśi əşurxo görə!
32 Barta Şot'ay çark'est'it'oğon gireśi camaati běš Şot'ay s'iyaq'at'un alabi,
Tərifləyinşq'at'unbi Şot'o ağsaq'q'alxoy běš.
33 Oqurxo tağala oç̌alxone q'aribi Şot'in,
Orayinxo ǰalpi c'eğala ganune xam oç̌ala c'urevk'i.
34 Bar tadala oç̌alane bərəkətsuz sa oç̌al bi Şot'in
T'iya arśalt'oğoy əşp'est'i günaxxo görə.
35 Xesuz oç̌ala isə gölürxon buy sa oç̌al biyone Şo,
Orayinxone ǰalpi c'eri t'e q'ariluğa.
36 Busat'oğone eçeri arśevk'i Şot'in t'e oç̌ala,
Şot'oğonal ayizmux lasaki t'iya yəşəyinşbsat'un burqi.
37 Becərişt'unbsay şot'oğon t'iyana,
T'ulluğxo bit'i iz barat'un girbsay.
38 Buxačuğonal şot'oğoxun İz xeyir-bərəkətə kamtenebsay:
Şot'oğoy içoğoy sayal, içoğoy sürüğoy sayal avuzebsay.
39-40 Azuk'i loxol kalaluğbalt'oğoy İzi piyexun bist'una ak'est'ala Buxačuğon
Azuk'a taşeri ams'i oç̌ala bosala vədəmuxal baneksay,
Şot'oğo nə sa yaq', nə sa cığır nu bakala t'e gala fırıpesest'ay.
T'e vədə male baksay şot'oğoy say,
Koruği, çətinluği q'a zülümi boş əzyət zap'k'alat'un baksay.
41 Ama ěqeveksay Buxačuğon t'e fağırxo,
Çark'esest'ay şot'oğo eht'iyəci boş baksunaxun,
Avuzebaksay şot'oğoy nəsili boş bakalt'oğoy say, sa sürü avuzbakala k'inək'!
42 Düzgünt'oğonal mot'o ak'i mǔqt'unbaksay,
Pist'oğoy isə ǰomone giresay.
43 Barta müdrik bakalt'ay pulmux qayq'an baki,
Barta Q'ončuğoy nu badalbakala çuresuni bes bakalt'oğo ak'eq'an!