21
21-ci Ǐvel mə̌ğ
Fark'alxoy dəst'in kalat'aynak'. Davidi Ǐvel mə̌ğ.
1 Ay Q'ončux, Vi zorene mǔqst'a padçağa,
Vi içu çark'est'unene fərəxləyinşaksa şo.
2 Şot'ay ük'exun c'ovakalt'oğo tam bex p'ap'esenbi Hun,
Şot'ay ǰomoxun c'eğalt'oğo coğabsuz ten efi.
3 Şot'o q'abulenbi Hun, şaat' şeyurxo içuxun kamtenbi,
İz bel təmiz q'ızılaxun tacen laxi.
4 Şot'in Vaxun yəşəyinşe çureśi, Hunal şot'o bol-bolen tadi,
Şot'ay ömürə həmişəluğen boxoybi.
5 Şot'o düşmənxoxun çark'est'i iz s'iyan alabi,
Şot'o kala s'iye, hörməti q'ončuxen bi.
6 Şot'o həmişəluğ bakala sa xeyir-bərəkəten tadi,
Vi iz t'ǒğǒl baksuni mǔqluğan ak'est'i.
7 Axıri padçağen Q'ončuğone bač'an tarast'a,
Ala Arśit'ay nu badalbakala çuresuna görəl iz tur ǰěna tene lamanst'a.
8 Vi zorba kula boxodi Vi düşmənxo biq'alnu,
Va nu çureğalorox Vi kiyexun tet'un çark'al.
9 Va ak'at'an içoğo bok'ala buxarin boş hisbalt'un,
Vi əcuğon şot'oğo ašampi taşala arux k'inək' əfçibale.
10 Şot'oğoxun törəyinşakalt'oğo etenfal,
Oç̌ali ç̌oyelxun şot'oğoy nəsilə tumexun əfçibalnu Hun!
11 Vi loxol düşməni piin běği Va pisluğbsunt'un çureśi,
Vi əşurxoy nu bul biq'seynak' içoğoy kiyexun ayeğalt'u bit'un, ama tet'un başarbi.
12 Vi běš badi şəp'eğalnu şot'oğo Hun,
İçoğoy loxol eğala xişt'ik'xoxun t'it'alt'un şorox.
13 Ay Q'ončux, hayza, Vi kalaluğa, Vi zora ak'est'a!
Barta yanal mot'oğo ak'i Vi s'iya alabala mə̌ğur mə̌ğk'en!