40
40-ci Ǐvel mə̌ğ
Fark'alxoy dəst'in kalat'aynak'. Davidi Ǐvel mə̌ğ.
1 Zu Q'ončuğoz umudbaki yaq'běği,
Şot'inal bez loxol běneği, bez şivana inebaki.
2 Şot'in za kurnuxun,
Oç̌alin oq'axune zapi c'evk'i.
Za şuk'k'ali kul nu p'ap'seynak' q'ayani loxole laxi,
Bez tura laxala ganune ost'aarbi.
3 Təzə sa mə̌ğě mə̌ğpest'i za,
Beşi Buxačuğo tərifbala mə̌ğ.
İsə gelet'in Q'ončuğo çalxale,
Şot'o güvəyinşaki içeynak' umudi ga bale.
4 Q'ončuğo güvəyinşakalo he bəxt'əvəre!
Bəxt'əvəre içoğoxun irəzit'oğoxun sa yaq'en nu tağalo,
Əfçi şeymoğoy qoşt'an t'it'alt'oğo nu gərbakalo.
5 Ay bez Buxačux bakala Q'ončux, Vi bit'oğoxun,
Vi yaynak' həzirbit'oğoxun əyitp'i çark'ala şey tene -
Vallarik'o butene!
Hetərez Vi əşurxo bayanbes bakon?
Mani əyitmoğonez mot'oğo bitova ak'est'es bakon?
6 Vi çureğalo nə q'urbanxo, nəəl payurxo tene baki,
Zaxun nə bok'ospsuni q'urbanxo,
Nəəl günaxxo os'kseynak' bakala q'urbanxo ten çureśi.
Zaxun bez ǔmǔğo qaypi Va ibaksunan çureśi Hun!
7 Mot'o görəz pi: «Mone, ezsa zu,
Bezi barada śameśi k'inək' ezsa!
8 Vi çureğalt'oğo bex p'ap'espseynak'ez eysa,
Zaxune Vi k'anunxo, ay Buxačux».
9 Vi düzgünluği k'ə baksuna bayanezbi zu Va bul k'os'bseynak' gireśi viçimoğoy běš,
Mot'o bez boş tez efi, avanu Hun, ay Q'ončux!
10 Bitot'ay pulaz qaypi, ak'esezdi Vast'a bakala düzgünluğa,
Vi yaq'en tağalt'oğoy bač'ane çurpi şot'oğo kul boxost'una.
At'unk'i t'e gireśi viçimoğon Vast'a bakala nu badalbakala çuresuna,
İçoğoy şaat'a çureśi şot'oğoynak' ük' bok'ospsuna.
11 Vi ük' bok'ospsuna zaxun kammaba, ay Q'ončux!
Barta Vi nu badalbakala çuresunen q'a bezi bač'ane çurpsunen za həmişə q'orişeq'an!
12 Hər t'ǒğǒlxun sa bələne c'eysa zaynak',
Bəloğoy kiyexun galpes tez baksa, t'ema gelene şorox.
Bez taxsırxon za t'etəre haq'layinşe ki, bez pulmuxe bayinq'baksa.
Ük' tene mande zast'a, bez biin popaxun gele günaxzax bu bezi.
13 Ay Q'ončux, bez loxol běğa, çark'est'a za,
Eki p'ap'a, za kul boxoda, ay Q'ončux.
14 Barta bez elmoğo haq'sun çureğalorox ot'p'i biyaburbakeq'at'un,
Barta bez pis ğina mǔqbakalorox ç̌omə̌yin qoşq'at'un qaybaki.
15 Barta bez loxol axšumpi k'əşinen ak'est'alt'oğon
Sal içoğoy bula alabes maq'at'un baki!
16 Va qə̌věğalorox isə barta mǔqbakeq'at'un,
Barta ç̌oyenq'an axšumpi şot'oğoy,
Barta Hun şot'oğo Vaxun eğala çark'esuna ak'est'at'an
"Q'ončux kalane" pi içoğoy ük'q'an qayeśi.
17 Zu isə gorox, fağır sa amdarzu,
Barta Q'ončuğon İz kula zaxun maq'an zapi.
Hunnu za çark'est'alo, za kul boxodalo, ay bez Buxačux!
Barta bez pul yaq'a maq'an mandi!