76
76-ci Ǐvel mə̌ğ
Fark'alxoy dəst'in kalat'aynak'. Simlə ət't'əcxoy faren mə̌ğěğala Asafi Ǐvel mə̌ğ.
1 Çalxesa İudeyina Buxačux,
Kala s'iye q'ončuxe Şo İsraila.
2 Salemane Şot'ay bakala ga,
Sionane məsk'ən sake Şot'in.
3 T'et'iyane düşməni bosala oxurxo xoxp'i,
Q'ılıncxo q'a q'alxanxo - davina əşp'est'ala bito silaxxone əfçibi.
4 Vi tamtarağen işiğe saksa, ay Buxačux,
Ə̌qnə heyvanxon buy alloy burux hik'k'ale Vi kalaluği běš!
5 Hetər q'oççağxone əfçibaki,
Pula q'ic'p'i tat'unśi me dünyənexun şorox,
Saycət'in iz k'əşinəl alabes tene baki şot'oğoy!
6 Ay İak'ovi Buxačux, ük'e q'ı̌ badala Vi harayaxun
Davin arabooxe ěkaxun sagala tarapi.
7 Həgigiyal q'ı̌balane Vaxun!
Vi əcuğon biq'at'an şuva Vi divanbsunaxun çark'eśes bakon?
8-9 Göynuxunen divanbi q'ərar c'evk'i Hun, ay Buxačux,
Bito koruği boş bakalt'oğon çark'est'i.
Hayzeri Vi divanbsuni k'ə baksuna ak'est'at'an
Me dünyəne bakalt'oğoy səse bot'baki!
10 Hörməti q'ončux baksunane ak'est'i Vi əcuğon biq'sunen,
Dirist' mandit'oğonal içoğoy bula alabes tet'un baki.
11 Efi Buxačux bakala Q'ončuğo elasp'i niyətp'anan,
Əyit tadit'oğoval bex p'ap'esp'anan,
İz kalaluğen amdarxo Q'ı̌ya Badalt'aynak' payurxo eçanan,
Ay hərrəmine bakala azuk'xo.
12 Kalaluğbalxoy pulane haq'sa Şot'in,
Dünyəne bakala padçağxone q'ı̌ya bast'a!