3
Wathi/ jin Ta Ŋwol Wac̱kunu mo e ’Twaŋkal Gu’b gi Mondheleladhelel mo
1 Dhala Buṯerus dhala Yohaan ’kon mmo/ii ka gagamis e gu’b gi mondheleladhelel mo, ki mo jin ’thonu jin ta’da tente/ kwara mo.
2 Dhali wathiŋ kamu/ ta ŋwol ’peni bwaŋ kum mo jin ḵalu mo dhali ’thinu mo e ’twaŋkal gu’b gi mondheleladhelel jin yuḵu ki jiny Jaro/ mo mmo’tho to ’peni uni kun seki gu’b gi mondheleladhelel mo be.
3 Ki a’di parki’da Buṯerus e mo dhala Yohaan mmomura uni ise gu’b gi mondheleladhelel mo tani a’di ki doṯ to mmobu’th mo.
4 Dhala Buṯerus mmohila a’di a’di ka ’thime/ nyaḵ ka Yohaan si’da/ mo tani a’di o a’di gwo mo ki: Hili am mo ma.
5 Dhali a’di ki ha gwom buni e mo mmoṯosh ki a’di midi ’taki bu’th toŋ kamu/ ’peni uni mo.
6 Hila Buṯerus o a’di gwo mo ki: ’Dolkon kush dhali ’dolkon gana/ p̱iyini aha/ mo tani hili a’di jin taka/ mo tani a’di imiga/ ic̱i /e mo. Ki gway ma Yesus Ḵrisṯẖos gi Pa Naasira mo tani yayi ki sho’k mo ma.
7 Dhali a’di ki bu’th a’di ime’da bim poros mo dhali ’de’k a’di ki mis mo dhali ise/ sho’k piti dhala simam bam sho’k piti bu’th ’bi’th mo.
8 Dhali mmop̱ena a’di imis mo tani a’di doshki’d mo dhali ṯel moya ’pen mo dhali a’di seki’d nyaḵki uni e gu’b gi mondheleladhelel mo mmoya ki sho’k mo dhali mmop̱e mo dhali mmomaŋa Arumgimis mo be.
9 Dhala ris ’kwani ’baar mo mishki a’di mo mmoyana a’di ki sho’k mo dhali mmomaŋa a’di Arumgimis mo
10 dhali uni nyiṯẖkin ki a’di ta a’di jin c̱a’bki’d mmo’tho to i’Twaŋkal Jaro/ gi gu’b gi mondheleladhelel mo be. Dhali uni meren ki mer jin shiyi’d mo dhali mmoda/ar a’di kagahara gom a’diyin jin p̱u’dki’d e a’di mo be.
Gwo ma Buṯerus jin Ṯorkina A’di eya Lambalany ma Sulemaan mo
11 Hili ka Buṯerus uni ka Yohaan mmobutha a’di a’di ki me’d mo tani aris ’kwani ’baar mo nyaḵki so ki uni kun ’kona lambalany jin yuḵu ki ji ma Sulemaan mo mmomer kagahara mo.
12 Dhali ka Buṯerus ki p̱ar a’di e mo tani a’di ki thoḵ ’kwani gwo mo ki: ’Kwani ma Israyiil, ata mera um gom wathi/ yan kan mo? walla ata hila um am ka ’thime/ kan mo me’d mom’bi’th jin ta jim bam ki is bam mo dhali mmodhuna aman is bam ki she/ ki dhelel dhelel mo tani am wac̱a a’di mmomish ya ki shoka?
13 Arumgimis ma Ibrahiim dhala Is/hak dhala Yakuub, Arumgimis gi ibabam bana, karki ca gi c̱iŋkinam piti ka Yesus eya tente/ jin c̱ikina um mmowu mo dhali jin waṯkina um gway mo ibwambor ma Bilaaṯus mo ki a’di dina gwo ibwa mo mmo’cuḵ a’di mo be.
14 Hili um waṯki gway ma Amanḵogu yan dhali Amanmii ka ḵar/eŋ gana/ yan mo dhali um doṯkina man’kosha mee mo jin minu c̱iki um mo be.
15 Dhali Amanṯel mondiki/e ’pen ’koshkina um jwa mo jin ’de’kkin ma Arumgimis ’peni mowu mo tani ana ’baar mo tana iman/o gwo gom a’di mo.
16 Dhali ki moŋgam gway piti is mo tani gway piti ki ’bi’th wathi/ yan is mo jin hila um mo dhali jin mishkina um mo. Nye, moŋgam gwo is jin di’d e a’di mo tani a’di ki c̱i a’di isa ’borgaŋ gana/ yansan ibwambori umi ’baar mo.
17 Dhali shwane/, ikam pem, aha/ misha ki a’di miikina um mo mmomolkina um to mo, me’d jin miikina um tap̱am bum si’da/ mo.
18 Hili to gwansan kun ṯor ma Arumgimis nṯwa/a/ ki ’twa/ gi imanc̱i gwo ma Arumgimis kadhamo/ ’baar mo tani ka Ḵrisṯẖos piti mina isi mii ’kosh ka nyor mo tani a’di miikunu a’di wakan mo.
19 Rici uma du is mo ma dhali ṯuka bor doḵ/e mo ki miinthus bum minu ’kosh mo, ki mii gi wakan mo ki mowac̱ midi p̱u’d mo ’peni bwambori Tap̱a mo be,
20 dhali ki a’di midi hasha Ḵrisṯẖos jin karkunu mo gom um mo, a’di jin ta’da Yesus mo,
21 a’di jin mina momisi mii bu’th mo ntagi mo jin minu ṯela ris to ’baar mo shoka ’cesh doḵ/e mo, uni gun on ma Arumgimis ki ’twa/ gi imanc̱i gwo ma Arumgimis kadhamo/ mo kun dhunu ki she/ ki dhelel dhelel mo kun ’kokin ’peni isa dhamo/ innii mo.
22 Ka jiŋ gana/ aMusa oki gwo mo ki: Amanc̱i gwo ma Arumgimis mina Tap̱a Arumgimis piyu/ mo gom um ’peni bwam ikam bum mo jin midi wa e ki aha/ mo. A’di mina umi ciḵ to ’baar mo ki ’beles kun mina a’di o um mo.
23 Dhali a’di midi war ka ris ’kwani ’baar ki ’beles kun mini ’koki ciḵ gwo ma manc̱i gwo ma Arumgimis yan mo tani uni minu ’ce’d shoki ’baar mo ki ’bil ’bil ’peni bwaŋ ’kwani mo.
24 Nye dhali aris imanc̱i gwo ma Arumgimis kadhamo/ mo ’pena Samu/iil mo dhali uni kun baṯẖani ’ko’d tani aris uni ’baar mo kun oki gwo mo tani uni si’da/ ṯorki gwo mo goma cim gwansan mo be.
25 Um ta iya/ gi imanc̱i gwo ma Arumgimis kadhamo/ mo dhali gwo jin gamu me’d jin on ma Arumgimis is ki ibabam bum mo mmo/owa Ibrahiim gwo ’bil ’penimo ki: Dhali e emen pini mo tani arisa waḵi ’baar mo kun ’kon e mony’cesh yansan mo tani uni minu ’bor mii mo be.
26 Mmo’de’kkin ma Arumgimis c̱iŋkinam piti imis mo tani a’di c̱ina a’di um iṯwa/a/ mo mmo’bor um mii mo mmoṯuka ris umi ’baar ka ’deṯe/ ’deṯe/ ki ’beles ’pena bor miiny ’coḵgam bum mo be.