1 Uni gwansan itana nyaḵum yil gi iya/ ma Nuuh mo uni gun ta Saam dhala Haam dhala Yap̱aṯẖ mo. Iya/ dho’thkunu uni mo ’ko’da gannu/ yi’de/ mo be.

2 Iya/ ma Yap̱aṯẖ: a’di jin ṯwa/a/ yuḵu gway ka Jumar mo, dhala Majuuj mo dhala Maday mo dhala Yawan mo dhala Ṯubal mo dhala Maashik mo dhala Ṯiras mo. 3 Dhali iya/ ma Jumar: a’di jin ṯwa/a/ yuḵu gway ka Ashkanaas mo, dhala Rip̱aṯẖ mo dhala Ṯujarmah mo. 4 Dhali iya/ ma Yawan: a’di jin ṯwa/a/ yuḵu gway ka Aliishah mo, dhala Tarshiish mo dhala Kittiim mo dhala Dudaniim mo. 5 ’Peni uni ’kwani gwansan kun ’kokin e yana gap̱ mo tani uni a’di ipeperkin mo be. Uni gwansan kun ta iya/ ma Yap̱aṯẖ mo kun ’kon e mony’cesh buni mo, uni ka ’deṯe/ ’deṯe/ ki ’twam buni gun wala uni mo ka waḵ buni i’pen mo dhali ki kal buni ilu/ mo.

6 Iya/ ma Haam: a’di jin ṯwa/a/ yuḵu gway ka Kush mo, dhala Masir mo dhala P̱uth mo dhala Kanaan mo. 7 Dhali iya/ ma Kush: a’di jin ṯwa/a/ yuḵu gway ka Saba mo, dhala Hawiila mo dhala Sabtah mo dhala Raamah mo dhala Sabtaka mo. Dhali iya/ ma Raamah: a’di jin ṯwa/a/ yuḵu gway ka Shaba mo, dhala Dadaan mo. 8 Kush a’di warki’d ka baba ma Nimruud mo. A’di ta wathi/ en’thi/ jin ṯwa/a/ jin c̱a’bki dem dem e mony’cesh mo. 9 A’di ta wathi/ jin c̱a’bki dem dem mmopar ka yempa/ ibwambori Tap̱a mo. Gom gwo gi wakan mo tani a’di onu gwo mo ki: Wathi/ jin waga Nimruud jin c̱a’bki dem dem ibwambori Tap̱a mo. 10 Dhali monṯel ’pen gi ’peŋkuman bampam piti mo ta Pam Baabil mo dhali Pan Arak mo dhali Pa Akkad mo, aris uni ’baar mo ’kon e mony’cesh gi Pan Shinaar mo. 11 ’Peni mony’cesh c̱aan mo tani a’di yaki’d mo e Pa Ashshuur mo dhali nyaŋ Pa Ninawa mo dhali Pa Rahubuteer mo dhali Paŋ Kaalah mo 12 Dhali Pa Rasan ibwaman gi Pa Ninawa mo dhali gi Paŋ Kaalah mo, a’di jin ta ’peŋkuman bampa/ jin caaca mo. 13 Masir warki’d ka baba ma Ludim mo dhala Anamiim mo dhala Lahabiim mo dhala Nap̱tuhiim mo 14 dhala P̱atrusiim mo dhala Kasluhiim mo (uni i/iiyina ’Kwani gi Pa P̱ilisthiin ’peni cine/ mo) dhali Paŋ Kap̱turiim mo.

15 Kanaan warki’d ka baba ma Sidun mo a’di jin ta ya/m piti jin ṯwa/a/ mo, dhala Hiṯẖ mo 16 dhali ’Kwani gi Pa Yabuus mo dhali ’Kwani gi Pa Amuur mo dhali ’Kwani gi Pa Jirjaash mo 17 dhali ’Kwani gi Pa Hiwwi mo dhali ’Kwani gi Pa Argi mo dhali ’Kwani gi Pan Siin mo 18 dhali ’Kwani gi Pa Arwaad mo dhali ’Kwani gi Pan Samaar mo dhali ’Kwani gi Pa Hamaat mo. Dhali yan’ko’d mo tani awaḵ gi ’Kwani gi Paŋ Kanaan uni ihagaski mony’cesh ki lala’th mo. 19 Dhali mo gi ’Kwani gi Paŋ Kanaan p̱ar ’twa/ ki ribi/ ribi/ ’peni Pan Sidun e mo jin c̱utha a’di bway ’kup̱ ki Pany Jaraar ki si’d piti jin si’da a’di ntagi Paŋ Ghassa mo dhali ’peni mo jin c̱utha a’di bway ’kup̱ ki bway Pan Saduum mo dhali Paŋ Gamuura mo dhali Pa Admah mo dhali Pa Sabuyiim ki si’d piti jin si’da a’di ntagi Pan Laasha/ mo. 20 Uni gwansan uni ta iya/ ma Haam mo ka waḵ buni i’pen mo dhali ki ’twam buni ilu/ mo dhali ki mony’cesh buni ilu/ mo dhali ki kal buni ilu/ mo be.

21 Dhali uc̱i dho’thkunu eya Saam si’da/ a’di jin taki’da baba gom uc̱i ma Aabir ’baar mo, a’di jin ta’da kam ma Yap̱aṯẖ jin ca’d mo. 22 Iya/ ma Saam: a’di jin ṯwa/a/ yuḵu gway ka Iilaam mo, dhala Ashshuur mo dhala Arp̱akshaad mo dhala Lud mo dhala Araam mo. 23 Dhali iya/ ma Araam: a’di jin ṯwa/a/ yuḵu gway ka Uus mo, dhala Hul mo dhala Jaaṯẖar mo dhala Mash mo. 24 Dhala Arp̱akshaad warki’d ka baba ma Shaalah mo dhala Shaalah warki’d ka baba ma Aabir mo. 25 Eya Aabir mo tani iya/ su/ dho’thkunu mo. Dhali jan ’de/ yuḵu gway ka P̱aalaj mo haali/ ka teem piti mo tani mony’cesh ḵwa/kunu bwa mo, dhala kam jin ta ’ko’d piti mo tani yuḵu gway ka Yagthaan mo. 26 Yagthaan warki’d ka baba ma Almudad mo dhala Shaalap̱ mo dhala Hadharmoot mo dhala Yaarah mo 27 dhala Haduraam mo dhala Usal mo dhala Diglah mo 28 dhala Uubal mo dhala Abimaayil mo dhala Shaba mo 29 dhala Up̱ir mo dhala Hawiila mo dhala Yubab mo. Aris uni gwansani ’baar mo tani uni ta iya/ ma Yagthaan mo. 30 Dhali mony’cesh jin ’kokina uni nycine/ mo tani a’di p̱arki ’twa/ ki ribi/ ribi/ mo ’peni Pa Misha mo e mo jin ta bway jin c̱u’thki ’twa/ ki Pan Sap̱aar ibampa/ ki paŋ ’kuwosh gi mom’pesho’k mo. 31 Uni gwansan ita iya/ ma Saam mo ka waḵ buni i’pen mo dhali ki ’twam buni gun wala uni ilu/ mo dhali ki mony’cesh buni ilu/ mo dhali ki kal buni ilu/ mo be.

32 Uni gwansan itana waḵ gi iya/ ma Nuuh mo isi gi gwom buni jin bele’thkunu mo dhali gom kal buni mo, dhali ’peni uni gwansan mo tani kal gi ’kwani uni ihagaski mony’cesh ki lala’th mo ’ko’da gannu/ yi’de/ mo be.