1 Dhali ka Abraam ’koni yili iss ’kwanimpa imudhe’d aṯẖka ’de/ mo tani Tap̱a piki Abraam i is mo dhali oki a’di gwo mo ki: Aha/ tana Tap̱a Arumgimis jin Eḵa/ e ki Eḵ mo. Yayi ki sho’k ibwambori aha/ mo ma dhali tayi ki dar gi mii i’ba/ mo. 2 Dhali gwom pem miga/ gam me’d nyaḵki /e mo ibwaman aha/ mo dhali /e mo dhali aha/ mina mar /e amar is kagahara mo be. 3 Yan’ko’d Abraam biṯki bwam/em piti a’cesh mo dhali Arumgimis oki a’di gwo mo ki: 4 Hili mo mo ma, gwom pem jin gamka/ me’d mo a’di di’d e /e mo dhali /e mini ta ababa goma waambuhany kal gi ’kwaniny’cesh mo. 5 Gway pini minu doḵ/e yuḵ ka Abraam* mo yisa, hili gway pini minu yuḵ ka Ibrahiim† mo, haali/ aha/ karkina /e mo mmota ababa goma waambuhany kal gi ’kwaniny’cesh mo be. 6 Aha/ mina kar /e jin mina /e dho’th maman mmoḵala dho’th ka enthus mo dhali ’peni /e mo tani miga/ dhu kal gi ’kwaniny’cesh mo dhali imaliḵ mini p̱u’du/ mo ’peni /e mo be. 7 Dhali gwom pem jin gamka/ me’d mo a’di imiga/ ṯel sho’k mo ibwaman aha/ mo dhali /e mo dhali emen pini kun mini pi ’peni /e mo ’ko’di /e mo eya ris nyaḵum yil gi ’kwanim buni mo, mmota gwo jin gamu me’d mo jin di’d ki sule/ sule/ mo be, mmota Arumgimis gom /e mo dhali gom emen pini kun mini pi ’peni /e mo ’ko’di /e mo be. 8 Dhali e /e mo dhali e emen pini kun mini pi ’peni /e mo ’ko’di /e mo tani aha/ mina c̱i um mony’cesh gi mo/ii ki iiŋ ’kus bum mo dhali aris mony’cesh gi Paŋ Kanaan mo mmota mom bum jin mina um ibu’th ki sule/ sule/ mo dhali aha/ mina ta Arumgimis buni mo be.

9 Dhali Arumgimis oki’da Ibrahiim gwo mo ki: Dhali gom /e mo tani /e mini mii dhu gwom pem jin gamu me’d mo, /e dhali emen pini kun mini pi ’peni /e mo ’ko’di /e mo eya ris nyaḵum yil gi ’kwanim buni mo be. 10 A’di ta gwom pem jin gamu me’d mo jin mina /e imii dhu mo ibwaman aha/ mo dhali /e mo dhali emen pini kun mini pi mo ’peni /e mo ’ko’di /e mo. Aris gwasan kun ’koni bwaman um mo tani uni minu mii i’ciṯẖa/ munyjal yis buni mo. 11 Um minu mii i’ciṯẖa/ munyjal yis bum mo e shuman is ma yi’c ma munyjal yis jin ’kuc̱kunu is mo, dhali a’di midi ta jamas mii gi gwo jin gamka/ me’d mo ibwaman aha/ mo dhali /e mo. 12 Dhali a’diyin jin di’di bwaman um mo jin ta’d ga cim pekwara mo tani a’di iminu mii ’ciṯẖa/ munyjal yis piti mo, aris gwasani ’baar ka ’deṯe/ ’deṯe/ mo eya ris nyaḵum yil gi ’kwanim bum mo waḵki/ a’di dho’thkunu mo e gu’b pini mo walla a’di yolkunu mo ka guurush pini mo ’peni ’kwanin tiya kun ’koki ta ji gi emen pini mo. 13 A’di jin dho’thkunu mo e gu’b pini mo dhali a’di jin yolkunu mo ka guurush pini mo tani a’di iminu mii i’ciṯẖa/ munyjal yis mo be. Wakan gwom pem jin gamka/ me’d mo tani a’di midi di e shuman is pini mo gwo jin gamu me’d mo jin midi di ki sule/ sule/ mo be. 14 Jan ṯal ’deŋ kamu/ ’peni gwasan kun ’konuki ’ciṯẖa/ munyjal yis mo jin diki ’ciṯẖa/ munyjal yis piti mo e shuman is ma yi’c ma munyjal yis jin ’kuc̱kunu is mo tani a’di iminu mii ’ciṯẖ ’twa/ mo ’peni ’kwanim piti mo be. A’di ’ce’dki gwom pem jin gamka/ me’d mo.

15 Dhali Arumgimis oki’da Ibrahiim gwo mo ki: Dhali goma Saray jin ta ashim pini mo tani /e mini yuḵ a’di ki gway ma yim ka Saray yisa. Hili gway ma yim minu mii iyuḵ ka Saarah mo be. 16 Aha/ mina ’bora yim mii mo dhali bahili aha/ mina c̱i /e ya/m ka yim mo. Aha/ mina ’bora yim mii mo dhala yim midi ta kum gi kal gi ’kwaniny’cesh mo, dhali imaliḵ gi ’kwaniny’cesh mini p̱u’du/ mo ’pena yim mo be. 17 Yan’ko’d a/Ibrahiim biṯki bwam/em piti a’cesh mo dhali a’di ki p̱e’th mo dhali o gwo ki is piti mo ki: A/dhali ya/ minu dho’th e wathiŋ gwaṯẖ jin ’koni yili iss ’kwanimpa imudhe’d mowa? A/dhali Saarah si da/ jin ’koni yil iss ’kwanimpa idoŋon i’ce’dka ’kume’d mo ayim midi dhodha ’ciya? 18 Dhala Ibrahiim oki’da Arumgimis gwo mo ki: Ayy, dhalka Isma/iil c̱a’b ki e mo e jis/em pini mo. 19 Dhali Arumgimis oki gwo mo ki: Yisa. Hili Saarah jin ta ashim pini mo midi dho’th /e ya/in mo dhali gway piti mina /e iyuḵ ka Is/hak mo. Gwom pem jin gamka/ me’d mo tani miga/ ṯel sho’k mo nyaḵki a’di mo mmota gwo jin gamu me’d mo jin di’d ki sule/ sule/ mo gom emen piti kun mini pi ’peni a’di mo ’ko’di a’di mo be. 20 Dhali goma Isma/iil mo tani /e ciḵga/ mo. Hili mo mo ma, aha/ mina ’bor a’di mii mo dhali kar a’di mmodho’th maman mo dhali mar a’di amar is mo kagahara mo. A’di midi ta ababa gom uni kun ’koni ’kume’d i’ce’dka su/ mo kun ta iya/ ma maliḵ mo dhali aha/ mina kar a’di mmota kal jin caaca mo. 21 Hili gwom pem jin gamka/ me’d mo tani miga/ ṯel sho’k mo nyaḵka Is/hak mo jin min ma Saarah dho’th /e mo ka yir yan ka yil jiŋ ’ko’d mo.

22 Ki a’di thimki’da ṯor jin ṯorkina a’di nyaḵki a’di mo tani Arumgimis yaki’d ki mis mo ’pena Ibrahiim mo. 23 Yan’ko’d a/Ibrahiim bu’thki’da Isma/iil jin ta ya/m piti mo dhali aris c̱iŋkina/ kun yolu mo, uni kun dho’thkunu mo e gu’b piti mo walla uni kun yolkunu mo ka guurush piti mo, aris gwasani ’baar ka ’deṯe/ ’deṯe/ mo kun ’koni bwaman ’kwaniŋ gwas gi gu’b ma Ibrahiim mo, dhali a’di ki ’ciṯẖ uni amunyjal yis mo e shuman is ma yi’c ma munyjal yis buni kun ’kuc̱kunu is mo ka tee yin gana/ mo, me’d jin okin ma Arumgimis a’di mo be. 24 Dhala Ibrahiim ’kona yili iss ’kwanimpa imudhe’d i/aṯẖ ’de/ mo me’dyin a’di ’ciṯẖkunuwa munyjal yis mo e shuman is ma yi’c ma munyjal yis piti jin ’kuc̱kunu is mo. 25 Dhala Isma/iil jin ta ya/m piti mo tani a’di ’kona yili ’kume’d i’ce’dka kwara mo me’dyin a’di ’ciṯẖkunuwa munyjal yis mo e shuman is ma yi’c ma munyjal yis piti jin ’kuc̱kunu is mo. 26 Ka tee yin gana/ mo tani Ibrahiim dhali ya/m piti ka Isma/iil mo uni i’ciṯẖkunuwa munyjal yis mo. 27 Dhali aris ’kwaniŋ gwas gi gu’b piti mo, uni kun dho’thkunu mo e gu’b mo dhali uni kun yolkunu mo ka guurush ’peni wathiŋ kamu/ mo tani uni i’ciṯẖkunuwa munyjal yis nyaḵki a’di mo be.