1 Iman’doyu gwo su/ gwansan p̱u’dkin mo e Pan Saduum mo e mom’pimpili/ mo. Dhala Luuth diki’d mo mmoc̱a’b ’pena ’cesh e ’twaŋkal gi Pan Saduum mo. Ki Luuth p̱arki uni e mo tani a’di cuki mis mo mmogam uni ’kup̱ mo dhali a’di kumki is piti mo ki bwam/em piti eya ’cesh mo. 2 Dhali a’di oki gwo mo ki: Itap̱am pema, aha/ doṯkina um mo. Ṯuki mo ma ’peni bway bum mo e gu’b gi c̱iŋkinam bum mo dhali ’baari mon’thiny mo dhali lami sho’k bum mo. Yan’ko’d um mini mish cu mis mo ki jahanne/ mon’thamo/ mo dhali ii ki bway bum mo. Uni oki gwo mo ki: Yisa. Am mina i’baar mon’thiny mo e bway tur mo. 3 Hili a’di ṯirrishki uni ki gwom ’bi’thga/ mo. Wakan uni ṯu’kki mo ’peni bway buni e a’di mo dhali cic̱ki gu’b piti mo. Dhali a’di miiki uni dhan mo jin shwanu to mo dhali shunki maaŋḵuthu’d jin miinu ki dar ka cumaṯ mo dhali uni ishwakin mo be. 4 Hili ki uni ’koki ish ’ko’da ’cesh naskina/ mo tani ’kwaniŋ gwas gi ’peŋkuman bampa/ yan mo, ’kwaniŋ gwas gi Pan Saduum mo, uni kun ta dhuru’c mo dhali uni kun tana dhani lu/ mo, aris ’kwani ’baar mo ntagi wathiŋ gwaṯẖ jiŋ ’ko’d mo tani uni ’kamki gu’b mo. 5 Dhali uni yuḵki ’twa/ eya Luuth mo ki: Mane ’kwaniŋ gwas kun p̱u’dkin e /e mon’thiny yan mo mane? Susi uni ka pije/ e aman mo ma ki aman mina mish uni mo. 6 Dhala Luuth yaki’d ka pije/ ki campur mo e ’kwaniŋ gwas mo dhali mu’thki campur i’ko’di a’di mo, 7 dhali oki gwo mo ki: Aha/ doṯkina um mo ikam pema, dhalku/ tonthus ki mii wakan mo ma. 8 Hili mo mo ma, aha/ takina gi i’bwa/i su/ mo kun ’koki mish wathiŋ kamu/ mo. Dhalki aha/ bway mo mmosus uni ka pije/ e um mo dhali miiyi um e uni mo me’d jin o um bwa mo. Hili dhalku/ toŋ kamu/ ki mii e ’kwaniŋ gwas gwansan mo ma haali/ uni p̱u’dkin mo ibwaŋ’kwariny ma darha’da/ ma galgin gu’b pem mo. 9 Hili uni oki gwo mo ki: Doshi ka c̱iŋ’ko’d mo ma. Dhali uni oki gwo mo ki: Cim yan p̱u’dki’d mo mmoc̱a’b yilkina/ mo dhali a’di midi ’taki lo’b mo jin tanuwa mandwall gwo moyi. Shwane/ aman mina ṯu/ul /e mo ki mii kun warkin ki shi/ kagahara mo mmobol kun minu mii gom uni e mo. Yan’ko’d uni yap̱ki ap̱o/ wathiŋ gwaṯẖ jin yuḵu ka Luuth ki is kagahara mo dhali ’dishki is mo mmo’ce’da campur mo. 10 Hili ’kwaniŋ gwas dhuki me’d buni mo dhali susa Luuth bway bwaŋ gu’b e uni mo, dhali mu’thki’da campur mo. 11 ’Kwaniŋ gwas kun ’kokin mo eya campur gu’b mo tani dha’bkina uni em buni ki ja’da/ mo, uni kun gwa’da is mo dhali kun caaca mo, wakan ki uni wukina is buni e mo mmotopuwa campur mo.

12 Yan’ko’d ’kwaniŋ gwas okina Luuth gwo mo ki: Ṯal ’deŋ kamu/ takina /e imahana? Iya/ kun ta imar mo ’taa? Iya/ mo ’taa? I’bwa/ mo ’taa? Walla ma a’diŋ kamu/ jin takina /e mo e ’peŋkuman bampa/ yan mo tani susi uni ka pije/ mo ’peni mo yan mo 13 haali/ am mura ’ce’d mo yan sho’k mo haali/ cuuwa/ jin ’theru ap̱o/ ’kwanim piti mo tani a’di warki’d mmomaru is mo ibwambori Tap̱a mo dhali aman hashkina Tap̱a mo mmo’ce’d a’di sho’k mo be. 14 Dhali wakan mo tani Luuth yaki’d ka pije/ mo dhali oki iya/ kun ta imar mo uni kun mini ’taki mash i’bwa/ piti gwo mo ki: Cuyi mis mo ma. Iiku/ ka pije/ mo ’peni mo yan mo, haali/ Tap̱a muru’di ’ce’d ’peŋkuman bampa/ yan sho’k mo. Hili a’di wakina e ga man/o gwo ki maḵ mo e iya/ kun ta imar piti mo.

15 Ki e ma tente/ kasha’d mo tani aLuuth miikina iman’doyu gwo is ki ’kasa/ ’kasa/ mo mmo/o gwo mo ki: Cuyi mis mo mo ma mmosus ashim pini dhali i’bwa/m pini isu/ mo, uni kun ’koyin mmahan mo, isi ciki/ ki /e minu diki ’ce’d sho’k mo e mo jin doruwa dor mo gi ’peŋkuman bampa/ mo. 16 Dhali ki a’di di’d mmoc̱ora/ c̱or naskina/ mo tani ’kwaniŋ gwas gwansan bu’thki a’di i is ap̱o/ me’d piti mo dhali ap̱o/ me’d gi ashim piti mo dhali ap̱o/ me’d gi i’bwa/m piti isu/ ilu/ mo. Tap̱a si’da/ a’di di’d mmomiimii ap̱o/ a’di mo. Dhali uni isuski a’di ka pije/ mo dhali karki a’di ka pije/ mo ’peni ’peŋkuman bampa/ mo be. 17 Dhali ki uni suskina uni ka pije/ mo tani uni ki o gwo mo ki: Yeyi /e mo ma gom mondiki/em pini mo. Dhalku/ /e ki hil ka c̱iŋ’ko’d ŋ’ko’di /e mo ma walla dhalku/ /e ki c̱a’b e mo isi ’baar mo jin ta’da mom’ba’da’d mo. Yeyi /e mo ma ’kup̱ ki wosh mo isi ciki/ ki /e minu diki kup̱ ki ’ci’d’da/ mo be. 18 Dhala Luuth oki uni gwo mo ki: Ayy tap̱am pema, dhalku/ a’di ki di wakan mo ma. 19 Hili mo mo ma, shwane/ c̱iŋkinam pini gamki’da ’the e jis/em pini mo, dhali momiimiim pini eḵkina /e mo, a’di jin ṯorkina /e i aha/ mo e mo jin woṯẖuwa woṯẖ gom mondiki/em pem mo. Dhali mmoye mo e ’kup̱ ki wosh mo molga/ mii mo isi ciki/ ki tonthus yan midi ’taki ḵal aha/ ka ’cesh mo dhali aha/ mina ’taki wu mo be. 20 Hili mo mo ma, shwane/ ’peŋkuman bampa/ yaase a’di ’disha’dish mo mmoye nycine/ mo, dhali a’di si’da/ gwa’dagwa’d mo. Ayy, dhalki aha/ mmoye mo imun mo ma – a’di diki ta ari gwa’dga/ mo ’taa? – Dhali mondiki/em pem minu woṯẖ mo be. 21 Dhali a’di oki a’di gwo mo ki: Hili mo mo ma aha/ mina mii mii ma ’the si’da/ mmomiga/ diki kum ’peŋkuman bampa/ yaase ’twa/a ’cesh mo, a’di jin doṯkina /e mo. 22 Layu/ /e ki jahanne/ mo ma mmoye imun mo haali/ aha/ mola toŋ kamu/ mii mo ntagi /e mini p̱u’du/ mo e mun mo. Haali/ a’di gi wakan mo tani a’di iyuḵkunu ’peŋkuman bampa/ yan gway ka Suugar mo. 23 Atente/ sulki’d mo hila/ ap̱o/ mony’cesh mo me’d jin cic̱kin ma Luuth e Pan Suugar mo.

24 Dhali yan’ko’d mo tani Tap̱a a’di he’thki’da p̱o/ Pan Saduum mo dhali ap̱o/ Paŋ Gamuura mo to jin si’du/ mo dhala kap̱any o’d ’peni Tap̱a mo ’peni bwaman momis mo. 25 Dhali a’di kumki ’peŋkuman bampa/ gwansan ’twa/a ’cesh mo dhala ris mom’ba’da’d si’da/ mo dhali aris uni gun ’kokin mo e ’peŋkuman bampa/ gwansan mo dhali to jin caki’d mo ap̱o/ mony’cesh mo. 26 Hili ashim piti jin diki’di ’ko’d mo ibwamp̱o/ a’di mo tani a’di hilki mo ka c̱iŋ’ko’d mo dhali a’di warki’d mo ki wosh ’doŋkoro/ mo. 27 Dhala Ibrahiim la cuki mis mo mon’thamo/ mo e mo jin doshkina a’diya dosh mo ibwambori Tap̱a mo. 28 Dhali a’di hilki’da ’cesh mo ’kup̱ ki Pan Saduum mo dhali Paŋ Gamuura mo dhali ’kup̱ ki aris bampa/ jin ta mom’ba’da’d mo dhali a’di hilki mo mo. Dhali hili mo mo ma, aku’d ’peni bampa/ cuki mis mo me’da ku’d ’peni mo jin ’thanu o’d ki wur wur mo.

29 Dhali a’di warki’d mo ka Arumgimis ’ce’dki ’peŋkuman bampa/ kun ’koni bwaman mom’ba’da’d sho’k mo tani Arumgimis kaki’da Ibrahiim e mo dhali karki’da Luuth ki ya mo ’peni bwaman mo jin kumkunu ’twa/a ’cesh mo me’d jin kumkina a’di ’peŋkuman bampa/ gwansan ’twa/a ’cesh mo uni kun c̱a’bkin ma Luuth nycine/ mo be.

30 Dhala Luuth yaki’di ya ki mis ka pije/ mo ’peni Pan Suugar mo dhali c̱a’bki’d mo e ’kuwosha turga/ mo dhali i’bwa/m piti isu/ nyaḵki a’di mo. Haali/ a’di ḵo/ki’da ḵo/ is mo mmo’ko e Pan Suugar mo. Dhali a’di c̱a’bki’d mo ibwamana jurum wosh mo dhali i’bwa/m piti isu/ nyaḵki a’di mo. 31 Dhali a’di jin ta bwanyara/ ki o a’di jin ta jiŋ ’ko’d gwo mo ki: Ababam bana ta’da dhan mo dhali wathiŋ gwaṯẖa kamu/ yisa di’da e mony’cesh mo mmoyayu/ bway bwaman ana mo me’d mii jin baṯẖu imii mo isi mony’ceshi ’baar mo. 32 Yayu/ /e mo dhali dhalki ana ṯuca babam bana mo mmop̱iya yimana mura’th jin ḵa/u ki ŋah ŋah mo, dhali ana mina nyaḵ ish ki a’di mo ki ana mina ’taki dhuwa dhu mo gom emen ma babam bana mo be. 33 Dhali uni ṯu’ckina babam buni mo mmop̱i yimana mura’th jin ḵa/u ki ŋah ŋah mo ki mon’thiny yin gana/ mo. Dhali a’di jin ta bwanyara/ yaki’d mo dhali nyaḵ ish ki com piti mo. Dhala Luuth a’di diki mish mo mo, atente/ jin ishkina a’diya yim ’ko’da ’cesh mo walla atente/ jin cukina a’di ki mis mo. 34 Dhali a’di waki’d mo ka cim jiŋ ’ko’d mo tani a’di jin ta bwanyara/ ki o a’di jin ta jiŋ ’ko’d mo ki: Hili mo mo ma katili/ ki mon’thiny mo tani aha/ nyaḵkina ish ka babam pem mo. Dhalki ana ki ṯu’c a’di mo mmop̱i yimana mura’th jin ḵa/u ki ŋah ŋah ki mon’thiny shwane/ si’da/ mo. Dhali yayi /e mo dhali ish nyaḵki a’di mo ki ana mina ’taki dhuwa dhu mo gom emen ma babam bana mo. 35 Dhali uni ṯu’ckina babam buni mo mmop̱i yimana mura’th jin ḵa/u ki ŋah ŋah mo ki mon’thiny doḵ/e mo. Dhali a’di jin ta jiŋ ’ko’d cuki mis mo dhali ishki nyaḵki a’di mo. Dhali doḵ/e aLuuth diki mish mo mo, atente/ jin ishkin ma yim ’ko’da ’cesh mo walla atente/ jin cukin ma yim ki mis mo. 36 Wakan be uni su/ kun ta i’bwa/ ma Luuth mo uni ’kokin mo ki uc̱i ibwa mo ki com buni mo be. 37 Dhali ayim jin ta bwanyara/ dho’thki ya/ mo dhali a’di yerkunu gway mo ka Muwab mo. A’di yaase ita com gom ’Kwani gi Pa Muwab mo ntagi shwanesan mo be. 38 Dhali ayim jin ta jiŋ ’ko’d mo a’di si’da/ idho’thki ya/ mo dhali gway piti yerkunu mo ka Ben/ammi mo. A’di yaase ita com gom uc̱i ma Ammuun mo ntagi shwanesan mo be.