1 Dhala Ibrahiim ta’da dhan mo, a’di ta dhana dhan gana/ ki yil piti mo. Dhali Tap̱a a’di ’borki’da Ibrahiim mii ka ris to ’baar mo be. 2 Dhala Ibrahiim oki c̱iŋkinam piti gwo mo ki, a’di jin caki’d jin hilki gu’b piti mo, a’di jin ta tap̱a ap̱owa ris tom piti kun tana a’di mo, ki: Kari me’d pini awum pem mo. 3 Dhali aha/ mina kar /e mmothul gwo me’da ap̱o/ ki Tap̱a mo ka Arumgimis jin di’di momis mo dhali a’di jin di’di mony’cesh mo ki /e mini diki gama ’bom gom ya/m pem ’peni i’bwa/ gi ’Kwani gi Paŋ Kanaan mo e bwaman uni kun c̱a’bka/ mo. 4 Hili /e mini ya mo e bampam pem mo dhali e ’kwani ma bas pem mo dhali gama ’bom gom ya/m pem ka Is/hak mo be. 5 Dhali c̱iŋkina/ ki o a’di gwo mo ki: Wariba/ a’bom midi diki hayaa/ gwo e mmobaṯẖaa/ e bampa/ yan mo. Waḵki/ wakan mo tani ya/m pini miga/ mii sus mo ka nyaŋ’ko’d e bampam pini jin yayina /e ’peni nycine/ mo? 6 Ibrahiim ki thoḵ a’di gwo mo ki: A/e mini mii dhalku/ ki sus ya/m pem ka nyaŋ’ko’d e bampa/ c̱aan mo. 7 Tap̱a jin ta’da Arumgimis gi momis mo a’di jin suski aha/ mo ’peni gu’b ma babam pem mo dhali ’pena ’cesh jin dho’thkunu aha/ mo dhali a’di jin oki aha/ gwo mo dhali thulki aha/ gwo me’da ap̱o/ mo gom emen pem mo mmo/o ki: Aha/ mina c̱i emen pini a’cesh yan mo. Dhali a’di midi hasha man’doyu gwom piti ibwambori jis/em pini mo dhali /e mini gama ’bom gom ya/m pem ’peni mun mo be. 8 Hili waḵka ’bom dina bwa ki oyu/ mmobaṯẖ /e mo tani yan’ko’d /e din ki ’kus ’peni gwo yan jin gama ana me’d mo haali/ /e yisa mini sus ya/m pem imuna. 9 Dhali gom gwo gi wakan mo tani c̱iŋkinam piti karki me’d piti eya wum ma Ibrahiim mo a’di jin ta tap̱am piti mo dhali thul gwo me’d ap̱o/ gom a’di isi gom gwo gi to yan mo be.

10 Dhali yan’ko’d c̱iŋkina/ a’di suski kalmani ’kume’d jin ta ji gi tap̱am piti mo dhali bu’th moyam piti mo. Dhali a’di ki kala ris to kun c̱inu ki me’d e kugu ’peni tap̱am piti mo. Dhali a’di cuki mis mo dhali ya mo e uḵa ’cesh jin tana dhan yi’deya ḵara’b e ’peŋkuman bampa/ ma Nahur mo be. 11 Dhali a’di ki ḵana ris kalman mo mmo’ko ki jiŋ ’kup̱a’dup̱una ’cesh ka pije/ ’peni ’peŋkuman bampa/ mo e yany jis yi’de/ ka tee c̱aan mom’pimpili/ mo ka tente/ jin ’ceṯẖa up̱ ka pije/ mmo/ii ha’b yi’de/ mo be. 12 Dhali a’di ki o gwo mo ki: Ayy Tap̱a Arumgimis gi tap̱am pem ka Ibrahiim mo, nyoŋi aha/ ki ’bore/ mo jin miga/ gam mii adu is mo, aha/ ’thona /e mo. /E ki ṯor aha/ mmodhal mii e is ki mo/en gi tap̱am pem ka Ibrahiim mo. 13 Hili mo mo ma, aha/ doshkina e shemen jis yi’de/ jin kasha e mo dhali i’bwa/ gi ’kwani gi ’peŋkuman bampa/ uni iikin ka pije/ mmoha’b yi’de/ mo be. 14 Dhalki nyara/ jin miga/ o gwo ki: Aha/ ’thona /e ki /e mini dhal dhur yi’dem pini mo ki aha/ mina ’taki p̱i yi’de/ mo, dhali jin midi oyaa/ gwo mo ki: P̱iyi ma tani dhali aha/ mina c̱iki kalman pini mmop̱i mo, dhalka yim midi mii ta a’di jin mina /e mii kar ’pen ka pije/ gom c̱iŋkinam pini ka Is/hak mo be. Dhali gom mii yan kan mo tani aha/ mina mish ki /e ṯorki aha/ mo/en gi tap̱am pem mo be.

15 Nṯwa/a/ ki a’di ki ’baarki gwom piti mmo/o mo tani hili mo mo ma, Rip̱ka a’di jin dho’thkunu ka Baṯu/iil jin ta ya/ ma Milkah jin ta ash ma Nahur jin ta’da kam ma Ibrahiim mo tani a’di yayi’d ka pije/ ka dhur yi’dem piti me’d e ’kup̱a bi ma yim mo be. 16 Ayim nyara/ ta jaro/ ki jaro/ mo, a’di jin di’d ki nyaraŋ gana/ a’di jin dina wathiŋ kamu/ ki mash mo. Ayim yaki’d ka luŋgu’b e jis yi’de/ jin kasha e mo dhali ’tu’d dhur ma yim mo dhali a’di p̱u’dki’d mo be. 17 Yan’ko’d a’di jin ta c̱iŋkina/ guski’d mo mmogama ayim ’kup̱ mo dhali o gwo mo ki: Aha/ ’thona /e mmoc̱iyaa/ ari yi’de/ ’peni dhur pini mo. 18 Dhala yim ki o gwo mo ki: P̱iyi ma, tap̱am pem mo, dhala yim ki jahanne/ ki dhal dhur piti me’d ’peni me’d ma yim mo dhali a’di ki c̱i a’di yi’de/ mmop̱i mo. 19 Dhali ka yim ’baarki yi’de/ mmoc̱i a’di mmop̱i mo tani ayim ki o gwo mo ki: Aha/ si’da/ mina mush ki kalman pini yi’de/ mo ntagi uni mini p̱i ikap̱ mo be. 20 Dhali ki jahanne/ ayim ki gac̱ yi’dem piti eya ḵur mo dhali gus ka nyaŋ’ko’d bway jis yi’de/ mo mmomush yi’de/ mo dhala yim mushki yi’de/ goma ris kalman piti mo be. 21 Wathi/ ki guwa yim ki e ki e ma ’thime/ ki shwamm mo mmoda/ar gwo waḵki/ Tap̱a thoson moyam piti mo walla yisa.

22 Ki kalman kap̱ki yi’de/ mmop̱i mo tani wathi/ ki bu’th ’dolkon jin hidhu i me’d jin baru ka nusa guurush mo dhali gurany ’peri su/ mo goma yim ki hidha bi mo jin baru ki ’dolkoni ’kume’d ka guurush mo. 23 Dhali yan’ko’d a’di ki o gwo mo ki: Ṯoraa/ gwo mo ma ki /e ta ’bwa/ maja mo? A/mo jin ishu di’di gu’b gi cima jin mina aman i/ishi cineya? 24 Ayim ki o a’di gwo mo ki: Aha/ tana ’bwa/ ma Baṯu/iil jin ta ya/ ma Milkah mo a’di jin dho’thkin ma yim ka Nahur mo be. 25 Dhala yim ki mar gwo is mo mmo/o gwo mo ki: Am tana ka wusha/ dhali tonṯe/ mmo’kosh jwa mo dhali gu’b mmo/ishi cine/ mo be. 26 Wathi/ ki goŋ ’kup̱ piti ka luŋgu’b mo dhali luŋ Tap̱a mo be. 27 Dhali a’di ki o gwo mo ki: Mom’bor mii gom Tap̱a mo a’di jin ta’da Arumgimis gi tap̱am pem ka Ibrahiim mo, a’di jin diki dhal mo/en piti ’pen mo dhali mii ma isiŋ gana/ ’kup̱ ki tap̱am pem mo. Dhali gom aha/ tani Tap̱a ki shu aha/ bway gu’b gi ibas gi itap̱am pem mo.

28 Dhali yan’ko’d nyara/ a’di guski’d mo dhali ṯor ’kwani gi gu’b gi kum gwo mo goma ris to gwansan mo be. 29 Dhala Rip̱ka ta’d ka kam jin yuḵu gway ka Laabaan mo. Dhala Laabaan ki gus ka pije/ e wathi/ mo e jis yi’de/ jin kasha e mo be. 30 Dhali a’di ki p̱ar tome’d e mo dhali gurany ’per eya bi gi ’bwaham mo dhali me’d jin ciḵkina a’di gwo gi ’bwaham ga Rip̱ka mo ki: Wathi/ ṯorki’da ṯor ki aha/ mo tani a’di yaki’d mo e wathi/ mo. Dhali hili mo mo ma, a’di doshki’d nyaḵka kalman e jis yi’de/ jin kasha e mo be. 31 A’di ki o gwo mo ki: Yayi mo. Ayy mom’bor mii gi Tap̱a mo. Atinta dosha /eya pije/ kan mo? Haali/ aha/ thosonkina /e gu’b mo dhali mo gom kalman mo be. 32 Gom gwo gi wakan mo tani wathi/ p̱u’dki’d e gu’b mo. Dhala Laabaan ’cuḵki kalman ashi/ mo dhali a’di ki c̱i uni awusha/ mo dhali tonṯe/ gom kalman mmoshwa mo dhali yi’de/ mmolam sho’k piti mo dhali sho’k gi ’kwani kun nyaḵ iiyu/ ki a’di mo be. 33 Dhali yan’ko’d mo tani tonṯe/ karu ibwambori a’di mmoshwa mo. Hili a’di ki o gwo mo ki: Aha/ mina diki shwa tonṯe/ naskina/ ntagi aha/ mina ṯor ’pemen ’kup̱ yam pem yan. Dhali a’di ki o a’di gwo mo ki: Ṯori gwo mo ma.

34 Dhali gom gwo gi wakan mo tani a’di ki o gwo mo ki: Aha/ tana c̱iŋkina/ ma Ibrahiim mo be. 35 Tap̱a a’di ’borki tap̱am pem mii kagahara mo dhali a’di caki’d mo. Dhali Arumgimis c̱iki a’di toŋkal mo dhali bip̱ mo dhali ’dolkon kush dhali ’dolkon gana/ dhala ris c̱iŋkina/ kun miina ṯu’c mo kun ta gwaṯẖ mo dhala ris c̱iŋkina/ kun miina ṯu’c kun ta nyara/ mo dhala ris kalman dhala ris thuluny mo be. 36 Dhala Saarah jin ta ash gi tap̱am pem mo tani a’di dho’thki ya/ mo gom tap̱am pem mo ka yim ta’da dhan mo dhali ki a’di mo tani a’di c̱iki’da ris to ’baar mo kun tana a’di ki a’di mo. 37 Tap̱am pem ki kar aha/ mmothul gwo me’da p̱o/ mo mmo/o gwo mo ki: /E mini mii diki dhal ya/m pem bway mmogam nyara/ ’peni ’Kwani gi Paŋ Kanaan mo e mony’cesh jin dika/ mo. 38 Hili /e mini ya mo e gu’b ma babam pem mo e ’kwani ma bas pem mo dhali gama ’bom gom ya/m pem mo be. 39 Dhali aha/ ki o tap̱am pem gwo mo ki: Wariba/ a’bom midi ushu mmoyayu/ nyaḵki aha/ mo. 40 Hili a’di ki o aha/ gwo mo ki: Tap̱a a’di jin yaka/ ibwambor midi hasha man’doyu gwom piti nyaḵki /e mo mmoshu /e bway mo dhali /e mini gama ’bom gom ya/m pem ’peni ’kwani ma bas pem mo dhali ’peni ’kwani gi gu’b ma baba mo be. 41 Dhali yan’ko’d /e mini di ki ’kus mo ’peni gwo jin thulka/ me’da p̱o/ mo, me’d jin mina /e ya mo e ’kwani ma bas pem mo. Dhali waḵki/ uni mini ’koki c̱i ayim ki /e mo tani /e din ki ’kus mo ’peni gwo jin thulka/ me’da p̱o/ mo be.

42 Aha/ p̱u’dkina mo shwane/ e jis yi’de/ jin kasha e mo dhali o gwo mo ki: Ayy Tap̱a /e jin tana Arumgimis gi tap̱am pem ka Ibrahiim mo, waḵki/ /e shwane/ mini shu/aa/ bway e bway jin miga/ ya mo tani 43 hili mo mo ma aha/ doshkina e jis yi’de/ jin kasha e mo dhali dhalki nyara/ jin p̱u’du’d mmoya mush yi’de/ mo a’di jin miga/ o gwo mo ki: C̱iyaa/ ari yi’de/ ’pena dhur mo ma tani 44 dhali a’di midi oyaa/ gwo mo ki: P̱iyi ma dhali aha/ mina mush gom kalman pini si’da/ mo. Dhalki a’di ta’da yim jin mina Tap̱a kar ’pen ka pije/ gom ya/ gi tap̱am pem mo be.

45 Nṯwa/a/ ki aha/ daḵa gwom pem o mo eya du mo tani hili mo mo ma, aRip̱ka a’di ayim p̱u’dki’d mo nyaḵki dhur yi’de/ e ’kup̱a bi ma yim mo dhala yim yaki’d ka luŋgu’b e jis yi’de/ jin kasha e mo dhali mush yi’de/ mo dhali aha/ ki owa yim gwo mo ki: C̱iyaa/ dhalki aha/ p̱ina ma. 46 Dhali ki jahanne/ ayim ki dhal dhur yi’de/ me’d ’peni ’kup̱a bi ma yim mo dhali o aha/ gwo mo ki: P̱iyi ma dhali aha/ mina c̱i ki kalman pini si’da/ mmop̱i mo. 47 Gom gwo gi wakan mo tani aha/ p̱ikina mo dhala yim ki c̱i ki kalman mmop̱i si’da/ mo be. Dhali yan’ko’d mo tani aha/ ki doṯa yim gwo mo mmo/o ki: /E ta ’bwa/ maja si’da/? Ayim ki thoḵ aha/ gwo mo ki: Aha/ tana ’bwa/ ma Baṯu/iil jin ta ya/ ma Nahur mo, a’di jin dho’thkin ma Milkah a’di mo. Gom gwo gi wakan mo tani aha/ ki kar dhirriny ’dolkon e shush ma yim dhali gurany ’per eya bi ma yim mo be. 48 Dhali yan’ko’d aha/ ki luŋ ’kup̱ pem mo dhali luŋ Tap̱a mo, dhali ’bor Tap̱a mii mo a’di jin ta’da Arumgimis gi tap̱am pem ka Ibrahiim mo, a’di jin shu aha/ bway, ki bwaya ’borgaŋ gana/ mmosus ’bwa/ gi ’kwani ma bas gi tap̱am pem gom ya/m piti mo be. 49 Dhali shwane/ waḵki/ /e mini ṯu/ul gi mii ma teṯe/ mo dhali gi miiŋ gana/ gi tap̱am pem mo tani ṯori /e aha/ gwo mo dhali waḵki/ diki ta gwoŋ gana/ mo tani ṯori aha/ gwo mo ki aha/ mina ṯu’k mo ki me’da bim poros mo walla ki me’da biny cam mo.

50 Dhali yan’ko’d mo tani Laabaan dhala Baṯu/iil thoḵki gwo mo ki: To gwan p̱u’dkin ’peni Tap̱a mo dhali aman mola gwo shiyi’di o i /e walla jim ’boro’d mo. 51 Hili mo mo ma, aRip̱ka a’di di’di bori /e mo. Susa yim mo dhali iiyi mo me’d gwo jin okina Tap̱a mo be.

52 Dhali ki c̱iŋkina/ ma Ibrahiim ciḵki gwo jin ona uni mo tani a’di goŋki is piti mo ka ’cesh ibwambori Tap̱a mo be. 53 Dhali c̱iŋkina/ a’di ḵalki’da ris tonyjaro/ kun ta ’dolkon kush mo dhali ’dolkon gana/ mo dhali burrinye/ dhali c̱iki uni ka Rip̱ka mo dhali a’di ki c̱i ki uni ka kam nyara/ mo dhali ki kum nyara/ mo to gi ’bitha yol she/ ki ’bi’th mo. 54 Dhali a’di dhali ’kwani kun nyaḵ ii ki a’di mo tani uni shwaki to mo dhali p̱iki to mo dhali uni ki isha cim ’deŋ gana/ imun mo. Ki uni cuki mis mon’thamo/ mo tani a’di ki o gwo mo ki: Hashi aha/ ka nyaŋ’ko’d e tap̱am pem mo. 55 Akam gi nyara/ dhali kum nyara/ ki o gwo mo ki: Ayim midi c̱a’b naskina/ ka cimi ’kume’d mo. ’Ko’da cim c̱aan mo tani ayim midi ya beseene/. 56 Hili a’di ki o uni gwo mo ki: Dhalku/ ki mii aha/ mii ka diiṯe/ mo. Me’d jin ’borkina Tap̱a aha/ mii e bway pem mo tani dhalki aha/ yana mo ki aha/ mina ya mo e tap̱am pem mo. 57 Uni ki o gwo mo ki: Am mina yuḵ nyara/ mo dhali doṯa yim mo be. 58 Dhali uni yuḵkina aRip̱ka mo dhali owa ayim gwo mo ki: A/e mini ya nyaḵki wathi/ yan mo? Ayim ki o gwo mo ki: Aha/ mina ya mo be. 59 Gom gwo gi wakan mo tani uni hashkina Rip̱ka jin ta ’bwaham mo dhala yim jin midi nyaḵ di ki a’di mo dhali c̱iŋkina/ ma Ibrahiim mo dhali ’kwanim piti mo be. 60 Dhali uni ’borkina Rip̱ka mii mo dhali owa yim gwo mo ki: ’Bwah bama, tayi ata’da gi ’kwani ma alaap̱ ka ris kun maru is ka alaap̱i ’kume’d mo dhali dhalki emen pini dil to ’peni ’twaman ma goŋ gi uni gwansan kun shi/ uni i e mo. 61 Dhali yan’ko’d aRip̱ka dhali nyara/ kun nyaḵ ii ki a’di cuki mis mo dhali mer kalmana p̱o/ mo dhali baṯẖ wathi/ mo. Dhali kan c̱iŋkina/ suski’da Rip̱ka dhali ya e bway piti mo be.

62 Dhala Is/hak a’di yayi’d ’peni Pam Birlahayru/i dhali a’di c̱a’bki’d mo eya Januub mo. 63 Dhala Is/hak yaki’d ka pije/ mmo’thowa pije/ mo e mom’pimpili/ mo. Dhali a’di ’de’kki em piti ’kup̱ki mis mo dhali p̱ar mo e mo dhali hili mo mo ma, kalman uni p̱u’dkin mo be. 64 Dhala Rip̱ka ’de’kki em piti ’kup̱ ki mis mo dhali ka yim p̱arki’da Is/hak e mo tani ayim ki thul ka ’cesh ’peni kalman mo 65 dhali o c̱iŋkina/ gwo mo ki: Wathi/ jana idi’di maṯṯaan mo a’di jin yayi’d mmogam ana ’kup̱ mo? C̱iŋkina/ ki thoḵ a’di gwo mo ki: A’di ta tap̱am pem mo. Wakan ayim ki bu’th burrinyeŋ ’kup̱ piti dhali kum is piti mo be. 66 Dhali c̱iŋkina/ ki ṯor Is/hak gwo goma ris to kun miikina a’di mo be. 67 Dhali yan’ko’d Is/hak ki susa yim e gu’b burrinye/ mo dhali a’di ki butha Rip̱ka dhali ayim warki’d ki ash mo dhali a’di enki’da yim mo. Dhala Is/hak a’di malaskunuwa du mo ’ko’di jwa gi kum mo be.