1 ’Ko’di yili su/ gwansani ’baar mo tani P̱irawn a’di shu’bki jan mo ki a’di doshki’d e shemen Yi’deŋ Ḵumma/ Niil mo. 2 Dhali hili mo mo ma, bip̱ ’koni pesu/ kun pikin ka pije/ ’peni ḵumma/ yi’de/ mo kun yesa buŋgwar is ki yes mo dhali kun ’thiḵa’thiḵ mo dhali uni shwakina lup̱e/ mo. 3 Dhali hili mo mo ma, bip̱ ’koni pesu/ kun ’bwaṯala’bwaṯal mo dhali kun korakor mo pikin mo ’peni Yi’deŋ Ḵumma/ Niil mo dhali doshkin mo nyaḵki bip̱a tiya mo e yana gap̱ Yi’deŋ Ḵumma/ Niil mo be. 4 Dhali uni gwansan kun ’bwaṯala is ki ’bwaṯal dhali kun korakor mo tani uni ’kaki uni gwansan kun yesa buŋgwar is ki yes mo dhali kun ’thiḵa’thiḵ mo. Dhala P̱irawn a’di merki e mo be. 5 Dhali a’di ’ce’dkina e mo dhali shu’bki jan jin ’kon ma p̱o/i su/ mo doḵ/e dhali hili mo mo ma, awusham pos ’koni pesu/ mo kun dwama e ki dwam mo dhali kun ’bora’bor mo uni cakin mo e cwalman ’de/ nyaḵki uni ma ’de/ ’deṯe/ gwan mo. 6 Dhali hili mo mo ma, ŋ’ko’d unim pesu/ gwan waski ’kup̱ mo, uniŋ korga/ dhali kun ’ce’dkina ’ce’d ki ’tham gi mom’pesho’k mo. 7 Dhali pos kun tawash ma wusha/ ki tawash mo tani uni a’di iloski pos kun ’koni pesu/ kun dwam ma wusha/ e ki dwam mo dhali kun bocora e ki bojor mo. Dhala P̱irawn merki e mo dhali hili mo mo ma a’di ita jan mo be. 8 Wakan mon’thamo/ mo tani shi/in piti ṯo’ckunu ’kus mo dhali a’di hashki gwo mo dhali yuḵa/ yuḵ goma ris ŋaariŋ ’Kwani Masir mo kun ṯori gwo ki ’twaŋ gwocon mo dhali aris ’kwanin yuḵga/ mo, dhala P̱irawn ṯorki uni jan piti mo. Hili jan ’deŋ kamu/ yisa di’da a’di jin mishi ’pemen jan ka P̱irawn ṯor mo.

9 Dhali yan’ko’d tap̱a jin karu mo mmohil ’kwani gi gu’b ma maliḵ oki’da P̱irawn gwo mo ki: Aha/ kakina miim pem jin thamkika/ e shwane/ mo. 10 Ka P̱irawn shwaki’da nyor ap̱o/ ’kwanim piti kun dhuna a’di aṯu’c mo dhali kar aha/ dhala man’coḵ maa e mo jin ’tashuwa ’tash ’twa/ mo e gu’b gi a’di jin ji’da ji mo tani, 11 aman su/ shu’bkina jan ka cim ’de/ mo mon’thiny yin mo a’di dhali aha/ aman ka ’deṯe/ ’deṯe/ takina ki jan mo kun ’kona ’pemen buni ki she/ ki she/ mo. 12 Dhuru’c wathi/ Ibraan yan diki’d nyaḵki aman imun mo a’di jin ta’da manmii wathi/ jin ca’da ṯu’c mo gom a’di jin ji’da ji mo. Dhali ki aman a’di ṯorkina a’di gwo mo tani a’di ṯorki ’pemen jan bam mo. A’di theke’thki ’pemen jan ṯor ki ’bore/ e ’kwani su/ gwan isi me’d jan buni mo be. 13 Dhali me’d jin ṯorkina a’di a’di ki aman mo tani wakan a’di p̱u’dki’d ki ’pemen gana/ mo dhali aha/ warkunu is mo mmodoḵa maktab pem mo dhali aman’coḵ maa a’di ishirkunu ka ’cajala/ mo.

14 Dhala P̱irawn a’di hashki gwo mo dhali yuḵa Yuusup̱ mo dhali uni suski a’di ki ’ta’b mo ’peni jisa ’tum mo dhali ki a’di ’thiki’da mur ’kup̱ mo dhali aḵ burrinyem piti e mo tani a’di p̱u’dki’di bwambor ma P̱irawn mo be. 15 Dhala P̱irawn oki’da Yuusup̱ gwo mo ki: Aha/ takina gi jan mo dhali wathiŋ kamu/ yisa di’da jin mishi ’pemen piti ṯor mo dhali aha/ ciḵkina gwo mo gom /e mo ki me’d jin ciḵkina /e gwo gom jan mo tani /e mishki ’pemen buni ṯor mo be. 16 Yuusup̱ thoḵki’da P̱irawn gwo mo ki: A’di yisa ta aha/ mo. Arumgimis midi c̱iya P̱irawn gwon thoḵ jin ha me’d ki haŋ gana/ mo. 17 Dhala P̱irawn oki’da Yuusup̱ gwo mo ki: Hili mo mo ma e jan pem jin shu’bka/ mo tani aha/ doshkina ap̱owa gap̱ Yi’deŋ Ḵumma/ Niil mo. 18 Dhali bip̱ ’koni pesu/ kun ’thiḵa’thiḵ mo dhali kun yesa buŋgwar is ki yes mo pikin ka pije/ ’peni ḵumma/ yi’de/ mo dhali uni shwakina lup̱e/ mo. 19 Dhali bip̱ ’koni pesu/ kun baṯẖi uni isho’k mo kun hatha’ko’d ki ha’th mo dhali kun ’bwaṯala is ki ’bwaṯal mo dhali uni korakor mo uni kun wakan yisa mishkika/ me’d ’deŋ kamu/ e bampa/ Masir mo. 20 Dhali uniŋ korga/ dhali uni bip̱ kun ’bwaṯala is ki ’bwaṯal mo tani uni ’kaki bip̱ pesu/ gwan kun ’thiḵa’thiḵ kun ’koni ṯwa/a/ mo. 21 Dhali me’d jin ’kakina uni uni mo tani wathiŋ kamu/ yisa midi ’taki mish mo mowa mo jin ’kakina uni uni mo haali/ uni i’kokin ki ’bwaṯal kan naskina/ ’pena muŋ’kup̱ mo dhali yan’ko’d aha/ merkina e mo. 22 Aha/ si’da/ mishkina e jan pem mo awusham pos kun ’koni pesu/ mo uni kun cakin mo eya cwalman ’de/ nyaḵki uni ma ’de/ ’deṯe/ gwan mo kun dwama e ki dwam mo dhali kun ’bora’bor mo. 23 Dhali awusham pos kun ’koni pesu/ uni ḵu’thkin mo mmokora kor mo dhali kun ’ce’dkina ’ce’d sho’k ki ’tham gi mom’pesho’k mo waski ’kup̱i ’ko’di uni mo. 24 Dhali uni wusham pos gwan kun korakor iloskina wusham posa dwamga/ gwan kun ’koni pesu/ mo. Dhali aha/ ṯorkina aris ŋaari/ gwan gwo mo uni kun ṯori gwo ki ’twaŋ gwocon mo, hili wathiŋ kamu/ yisa di’da jin midi ’taki be’daa/ gwo ’pen ka pije/ ki ’bore/ mo.

25 Dhali yan’ko’da Yuusup̱ thoḵki’da P̱irawn gwo mo ki: Jan ma P̱irawn mo tani a’di ṯal ’de/ mo be. Arumgimis be’dki’da P̱irawn gwo mo gom to jin murkina a’di i’dish ’twa/ mmomii mo be. 26 Bip̱a ’borga/ kun ’koni pesu/ mo tani uni a’di ita yil kun mini ’ko ipesu/ kun mini ’bora’bor mo dhali awushan dwamga/ kun ’bora’bor mo tani uni si’da/ ita yili pesu/ mo, jan a’di iṯala ’pen ’de/ mo be. 27 Dhali bip̱ kun ’koni pesu/ kun ’bwaṯala’bwaṯal dhali kun korakor mo kun p̱u’dkini ’ko’di uni mo tani uni a’di ita yili pesu/ mo dhala wusha/ kun tawasha tawash mo tani uni kun ta ’tham gi mom’pesho’k kun ’ce’dkina ’ce’d sho’k mo tani a’di si’da/ ita yili pesu/ jin mina ṯe/ i’kosha ’kosh mo be. 28 A’di a’dan be me’d jin ṯorkika/ /e aP̱irawn ka Arumgimis murki’da ṯora P̱irawn to jin i’disha ’twa/ a’di mmomii mo. 29 Yil imidi ’ko ipesu/ jin mina tonṯe/ idho’th kagahara mo e bampa/ Masiri ’baar mo. 30 Hili ’ko’di uni mo tani adhan ṯe/ si’da/ midi cu mis i’kosh ’kwani ki yili pesu/ mo dhali aris to kun ishkin kagahara mo tani mina ’kwani iŋa mo be e bampa/ Masir mo. Adhan ṯe/ midi kup̱ bampa/ ’baar mo. 31 Dhali aris to kun tana ’kwani kagahara minu mol ’ban mo e bampa/ mo gom ’pemen gwon ṯe/ mo a’di jin midi baṯẖa/ baṯẖi ’ko’d mo haali/ ṯe/ a’di midi jwakaṯa du ki ’bi’th mo. 32 Dhali jan ma P̱irawn kun shu’bkina a’di ka ’buḵum ’ban mo tani uni ta kun thosonkin ma Arumgimis mo dhali Arumgimis midi ṯor uni eya tente/ ki ’dishe/ san mo. 33 Dhali gom gwo gi wakan mo tani dhalka P̱irawn a’di kwany wathi/ jin midi ḵu’th is ki ’cese/ ’cese/ dhali wathi/ jin yuḵayuḵ mo dhali kari a’di ap̱o/ bampa/ Masiri ’baar mo. 34 Dhalka P̱irawn di’b mii is mo mmodhu ’kwani ’pen ka pije/ mo mmota imanhil tonṯe/ ap̱o/ bampa/ mo dhali bu’th ’bwanu’b tonṯe/ kun ’kon ma p̱o/i mudhe’d kun gamkina ’Kwani Masir ka tee yan kun isha tonṯe/ ka enthus ki yili pesu/ mo. 35 Dhali dhalki uni tula ris tonṯe/ is mo ’peni yila ’borga/ yan mo kun iiyin mo dhali dhuyi pos e me’d ma P̱irawn a’di jin cili mom’bi’th mo gom tonṯe/ goma ris ’peŋkuman bampa/ mo dhali dhalki uni dhu uni mo. 36 Dhali tonṯe/ minu ’tash ’twa/ mo ap̱o/ bampa/ gom yili pesu/ yan mo jin mina ṯe/ ibiṯa p̱o/ bampa/ Masir mo wakan ki ’kwani kun ’koni bampa/ yan mina ṯe/ diki ’ce’d sho’k mo.

37 Gwo yan ’thinuwa ’cesh mo tani a’di wame’d ’boro’da P̱irawn e ki ’bor mo dhali ’kwani si’da/ kun miina ṯu’c piti ’baar mo. 38 Dhala P̱irawn oki’da ris ’kwanim piti kun miina ṯu’c piti gwo mo ki: A/ana mina gam wathi/ jin wakansan ’peni mana mo a’di jin taki’d gi Shi/in ma Arumgimis mo? 39 Wakana P̱irawn oki’da Yuusup̱ gwo mo ki: Me’d jin ṯorkin ma Arumgimis /e aris to gwansani ’baar mo tani, wathiŋ kamu/ yisa di’da jin midi ḵu’th is ki ’cese/ ’cese/ dhali jin yuḵayuḵ wakansan me’d /e mo. 40 /E mini ta tap̱a ap̱o/ gu’b pem mo, dhali aris ’kwanim pem uni mini nin is buni mo me’d jin mina /e iḵan uni gwo mo. Hili jasi gwo goma ḵursi ma maliḵ mo tani aha/ imina a’di icil dhali bol /e e ki ca kagahara mo. 41 Dhala P̱irawn oki’da Yuusup̱ gwo mo ki: Hili mo mo ma aha/ karkina /e mo ap̱o/ bampa/ Masiri ’baar mo. 42 Dhali yan’ko’da P̱irawn bu’thki tome’d piti ’peni me’d piti mo dhali hi’thka Yuusup̱ e me’d piti mo dhali shum a’di ki burrinye/ ma maliḵ jin na’bulana’bul mo dhali hi’thki a’di ajindhiir ’dolkon i’bam piti mo. 43 Dhali a’di karki a’di mmomera arabiya jin dira shumarum piti mo a’di jin ’kon ma p̱o/i su/ mo dhali uni ḵumki cuuwa/ ibwambori a’di mo ki: Luŋa luŋ ki jiŋ ’kup̱a’dup̱un mo ma. Nyc̱a/ a’di karki a’di ap̱o/ bampa/ Masiri ’baar mo. 44 Doḵ/e P̱irawn oki’da Yuusup̱ gwo mo ki: Aha/ tana P̱irawn mo. Wathiŋ kamu/ yisa midi mii ’de’k me’di mis walla sho’k piti e bampa/ Masiri ’baar mo ki dar gi gwoŋḵan pini mo. 45 Dhala P̱irawn yuḵki’da Yuusup̱ gway ka Sap̱naat P̱aniih dhali c̱iki a’diya Asnaat mmomash mo a’di jin ta ’bwa/ ma P̱uthip̱aara/ mo a’di jin ta’da gasiis ma Uun mo. Wakana Yuusup̱ raski’d ki mis e bampa/ Masiri ’baar mo.

46 Yuusup̱ a’di ’kona yili iss ’de/ i’ce’dka ’kume’d mo me’d jin cic̱kina a’di e momii to ma P̱irawn jin ta’da maliḵ ’Kwani Masir mo be. Dhala Yuusup̱ yaki’d ka pije/ ’peni buŋ’kus ma P̱irawn mo dhali ya e bampa/ Pa Masiri ’baar mo. 47 Ki embul yil pesu/ yan mo tani a’cesh dho’thki to ka enthus mo. 48 Dhali a’di tulki’da aris tonṯe/ is mo ’peni yil pesu/ yan jin kap̱a ’pen ’kwani mo e bampa/ Masir mo dhali dhu uni e themes gi ’peŋkuman bampa/ mo. A’di si’da/ dhu e themes gi ’peŋkuman bampa/ ’peni bunto kun ’kam uni is mo. 49 Dhali aYuusup̱ dhuki posi themes ki nyanyeŋ gana/ ka enthus mo mmowa e ka si’b gi bwam ma gap̱ mo ntagi a’di daḵ uni bar mo haali/ a’di molu bar mo be.

50 Nṯwa/a/ ki yil ṯe/ diki p̱u’d naskina/ mo tani aYuusup̱ a’di ita gi iya/ isu/ mo, uni kun dho’thkin ma Asnaat a’di jin ta ’bwa/ ma P̱uthip̱aara/ jin ta’da gasiis ma Uun mo. 51 Yuusup̱ yuḵki gway ma ’ci ma bwanyaram piti ka Manassa mo haali/ a’di oki gwo mo ka: Arumgimis kar aha/ mmothisa ris mii kun diṯadiṯ e mo dhali aris to gi gu’b ma babam pem mo. 52 Dhali gway a’di jin ’kon ma p̱o/i su/ mo tani a’di yuḵki a’di gway ka Ep̱rayim mo: Haali/ Arumgimis karki aha/ mmoḵal mamana dho’th mo e bampa/ jin wo’ckina is aha/ she/ mo.

53 Yili pesu/ yansan jin kap̱a ’pen ’kwani a’di/ p̱iki gwo jip̱i/ mo e bampa/ Masir mo tani a’di ’baarki’d mo. 54 Dhali yili pesu/ jin mina ṯe/ i’kosh a’di iṯelki ’pen mo me’d gwo jin okin ma Yuusup̱ mo. Dhan ṯe/ a’di caaca e bampany ’ceshi ’baar mo dhali hili e bampa/ Masiri ’baar mo tani tonṯe/ di’d mo. 55 Ka ris ’kwanim bampa/ Masiri ’baar mo harki to mo tani ’kwani cuukin ’twa/a P̱irawn mo gom tonṯe/ mo dhala P̱irawn ṯorki ’Kwani Masir gwo mo ki: Iiku/ mo aYuusup̱ mo dhali ciḵ gwo jin mina a’di iḵan um mo mmomii mo. 56 Wakan me’d jin peperkina ṯe/ ap̱o/ bampany ’ceshi ’baar mo tani aYuusup̱ a’di iḵa’dki’da ris gu’b themes ’twa/ mo dhali yolki ’Kwani Masir tonṯe/ mo haali/ ṯe/ shina ’kosh ki shi/ e bampa/ Masiri ’baar mo. 57 Doḵ/e adhana ’cesh yini ’baar mo uni p̱u’dkin e Pa Masir mo eya Yuusup̱ mo mmoyol pos mo haali/ ṯe/ shilki ’kwani isi ’baar mo e mony’cesh mo be.