Muqeddes Kalam (latin yéziq) Ayup 19

Ayup yene söz qilidu: — «Men Xudani körimen!»

1 Ayup jawaben mundaq dédi: —

2 «Siler qachan’ghiche jénimni azablimaqchisiler,

Qachan’ghiche méni söz bilen ezmekchisiler?

3 Siler méni on qétim xarlidinglar;

Manga uwal qilishqa nomus qilmaysiler.□

4 Eger méning sewenlikim bolsa,

Men emdi uning derdini tartimen.

5 Eger siler méningdin üstünlük talashmaqchi bolsanglar,

Yüzüm aldida sherm-hayani körsitip méni eyiblimekchi bolsanglar,

6 Emdi bilip qoyunglarki, manga uwal qilghan Tengri iken,

U tori bilen méni chirmashturup tartti;

7 Qara, men nale-peryad kötürüp «Zorawanliq!» dep warqiraymen,

Biraq héchkim anglimaydu;

Men warqiraymen, biraq manga adalet kelmeydu.

8 U yolumni méni ötüwalmisun dep chit bilen tosup qoydi,

Qedemlirimge qarangghuluq saldi.

9 U mendin shan-sheripimni mehrum qildi,

Béshimdin tajni tartiwaldi.

10 U manga her tereptin buzghunchiliq qiliwatidu, men tügeshtim;

Ümidimni U derexni yulghandek yuluwaldi.

11 Ghezipini manga qaritip qozghidi,

Méni Öz düshmenliridin hésablidi.■

12 Uning qoshunliri sep tüzüp atlandi,

Pelempeylirini yasap manga hujum qildi,

Ular chédirimni qorshawgha élip bargah tikiwaldi.

13 U qérindashlirimni mendin néri qildi,

Tonushlirimning méhrini mendin üzdi.■

14 Tughqanlirim mendin yatliship ketti,

Dost-buraderlirim méni unutti.

15 Öyümde turghan musapirlar, hetta dédeklirimmu méni yat adem dep hésablaydu;

Ularning neziride men musapir bolup qaldim.□

16 Men chakirimni chaqirsam, u manga jawab bermeydu;

Shunga men uninggha aghzim bilen yélinishim kérek.□

17 Tiniqimdin ayalimning qusqusi kélidu,

Aka-ukilirim sésiqliqimdin bizar.□

18 Hetta kichik balilar méni kemsitidu;

Ornumdin turmaqchi bolsam, ular méni haqaretleydu.■

19 Méning sirdash dostlirimning hemmisi mendin nepretlinidu,

Men söygenler mendin yüz öridi.■

20 Et-térilirim ustixanlirimgha chapliship turidu,

Jénim qil üstide qaldi.□ ■

21 Ah, dostlirim, manga ichinglar aghrisun, ichinglar aghrisun!

Chünki Tengrining qoli manga kélip tegdi.

22 Siler némishqa Tengridek manga ziyankeshlik qilisiler?

Siler némishqa etlirimge shunche toymaysiler!□

Qutquzghuchi toghruluq bésharet

23 Ah, méning sözlirim yézilsidi!

Ular bir yazmigha pütüklük bolghan bolatti!

24 Ular tömür qelem bilen qoghushun ichige yézilsidi!

Ebedil’ebed tash üstige oyup pütülgen bolatti!□

Mis. 6:6; Law. 25:47-49; Ayup 33:23-24; Yuh. 11:25; 1Cor. 15:20-22

25 Biraq men shuni bilimenki, özümning Hemjemet-Qutquzghuchim hayattur,

U axiret künide yer yüzide turup turidu!□

26 Hem méning bu tére-etlirim buzulghandin kéyin,

Men yenila ténimde turup Tengrini körimen!□

27 Uni özümla eyni halda körimen,

Bashqa ademning emes, belki özümning közi bilen qaraymen;

Ah, qelbim buninggha shunche intizardur!□

28 Eger siler: «Ishning yiltizi uningdidur,

Uni qandaq qilip qistap qoghliwételeymiz?!» — désenglar,□

29 Emdi özünglar qilichtin qorqqininglar tüzük!

Chünki Xudaning ghezipi qilich jazasini élip kélidu,

Shuning bilen siler Xudaning sotining quruq gep emeslikini bilisiler».

□ 19:3 «Siler méni on qétim xarlidinglar» — mushu yerdiki «on qétim» dégini «nurghun qétim»ning birxil ipadisi. ■ 19:11 Ayup 13:24; 16:9; 33:10; Yigh. 2:5 ■ 19:13 Zeb. 31:11-12; 38:12; 69:8; 88:8, 18 □ 19:15 «öyümde turghan musapirlar» — yaki «öyümdiki méhmanlar». «hetta dédeklirimmu méni yat adem dep hésablaydu» — Ayupning öyide turghan musapirlar (belkim eslide uning himayisige ériship uning xizmetchiliri bolghanlar) hazir uni yat adem, musapir dep qaraydu. □ 19:16 «Men chakirimni chaqirsam, u manga jawab bermeydu; shunga men uninggha aghzim bilen yélinishim kérek» — Ayupning eslide chakirigha buyruq bérish üchün söz qilishi belkim hajetsiz idi, uning bir imasi yaki qarap qoyushi kupaye idi. □ 19:17 «Aka-ukilirim» — ibraniy tilida «Anamning baliyatqusidiki oghullar». «Aka-ukilirim sésiqliqimdin bizar» — yaki «Aka-ukilirim yélinishlirimdin bizar». ■ 19:18 Ayup 30:1 ■ 19:19 Zeb. 41:9; 55:12-14 □ 19:20 «Jénim qil üstide qaldi» — ibraniy tilini sözmusöz terjime qilsaq: «Jénim chishlirimning térisining üstidila qaldi». ■ 19:20 Ayup 30:30; Zeb. 102:5; Yigh. 4:8 □ 19:22 «Siler némishqa etlirimge shunche toymaysiler!» — erebler (we belkim ibraniylar) bezide «ademning étini yéyish» dégenni «ademge töhmet chaplash» dégen menide ishlitidu. Ayupning dostliri uning azablirini az dep, uning azablirigha yene «Xuda séni tashliwetti» dégen wehimini artip qoyghan. □ 19:24 «Ah, méning sözlirim yézilsidi! ... ... Ebedil’ebed tash üstige oyup pütülgen bolatti!» — uning bu arzusi (23-24-ayet) emelge ashuruldi. Biz hazir uning muqeddes kitabgha pütüklük sözlirini oquwatimiz (bashqa xil terjimisi uchrishi mumkin). □ 19:25 «...özümning Hemjemet-Qutquzghuchim hayattur» — Ayup eslide 9-babta Xuda hem özümning otturisida kélishtürgüchi bir «elchi» yaki «arichi» bolsa idi, dégen intizarini bildürdi. U hazir bu yerde özining mundaq bir «kélishtürgüchi»sining heqiqeten barliqini jakarlaydu; ibraniy tilida «goél» («hemjemet-qutquzghuchi») dégen bu söz, adette birsi melum awarichilikke uchrighanda, uninggha tughqanchiliq (hemjemetlik) qilip uni qutquzush üchün «bedel töleydighan qutquzghuchi tughqini»ni bilduridu. Bu Qutquzghuchi-Nijatkarining bolghanliqining netijisi bolsa: — U kelgüside öz közi bilen Xudasini köreleydu hemde shu chaghda Xuda uning béshigha chüshkenliri toghrisida uninggha jawab béridighanliqidin ibarettur. Bu bayan intayin heyran qalarliq, hem bezi jehetlerdin Ayupning bayanlirining ichide uning étiqadining eng yuqiri pellisi süpitide julalinip turidu. «Goél» toghruluq yene «Rut»tiki «kirish söz» we «qoshumche söz»imizni körüng. «U axiret künide yer yüzide turup turidu!» — yaki: «U axirqi bolghuchi bolup yer yüzide turidu». □ 19:26 «Men yenila ténimde turup Tengrini körimen!» — mushu yerde esli tékistni chüshinish sel tes. «Men ténimdin sirt (démek, roh tendin ketkendin kéyin) Xudani körimen!» dégen bashqa bir xil terjimisi bar. Bu xil terjime toghra bolsa, undaqta uning menisi «Hazirqi ténimdin sirt...» dégenlik bolsa kérek. Meyli qaysi xil menide éytilghan bolsun, Ayupning közi özining Xudasini körüshige yetken. □ 19:27 «Ah, qelbim buninggha shunche intizardur!» — mushu yerde sözmusöz terjime qilsaq: «Méning böreklirim (yüreklirim, démek) ichimde tügey dep qaldi!». Ibraniylar üchün, «börekler» ademning héssiyatlirining, wijdaniningmu chongqur yiltizidur. Shuning bilen bu jümle, Ayupning Xudani körüshtin ibaret zor intizarigha özining berdashliq bérelmeywatqanliqini bildürgen bolushi mumkin. □ 19:28 «Eger siler: «Ishning yiltizi uningdidur, uni qandaq qilip qistap qoghliwételeymiz?!» — désenglar,...» — Ayup öz dostlirining «Ayupning yoshurun gunahlirini pash qilmighuche hergiz boldi qilmayli» dégen pozitsiyide turuwatqanliqini bildürmekchi.