Muqeddes Kalam (latin yéziq) Ayup 24

Miskinlik we jinayet

1 — Némishqa Hemmige Qadir soraq künlirini békitmeydu?

Némishqa Uni tonughanlar Uning shu künlirini bikardin-bikar kütidu?

2 Mana, ademler pasil qilin’ghan tashlarni yötkiwétidu;

Ular zorawanliq bilen bashqilarning padilirini bulap-talap özliri ochuq-ashkara baqidu;□ ■

3 Ular yétim-yésirlarning éshikini bulap heydep kétidu;

Ular tul xotunning kalisini képillik üchün éliwalidu.□

4 Ular miskinlerni yoldin néri ittiriwétidu;

Shuning bilen zémindiki ézilgenlerning hemmisi möküshüwalidu.■

5 Mana, ular desht-bayawanlardiki yawayi ésheklerdek,

Tang seherde olja izdesh «xizmiti»ge chiqidu;

Janggal ular we ularning baliliri üchün yémeklik teminleydu.□

6 Ular yamanning kaliliri üchün dalada ot-chöp oridu,

Uning üchün ashqan-tashqan üzümlirini tériydu;□

7 Ular kéchini kiyimsiz yalang ötküzidu,

Soghuqta bolsa yépin’ghudek kiyimi yoqtur.

8 Ular taghqa yaghqan yamghurlar bilen süzme bolup kétidu,

Panahsizliqidin tashni quchaqlishidu.

9 Ademler atisiz balilarni emchektin bulap kétidu,

Ular miskinlerdin bowaqlarni képillikke alidu.□

10 Miskinler bolsa kiyimsiz, yéling ötidu,

Bashqilar üchün bughday baghlirini kötürsimu, yenila ach qalidu;■

11 Ular bashqilarning öyide zeytunlarni cheylep yagh chiqarghan bolsimu,

Hoylilirida sharab kölchikini cheyligen bolsimu,

Yenila ussuzluqta qalidu.■

12 Sheherdin ademlerning ah-zarliri chiqip turidu,

Qilich yégenlerning janliri nale-peryad kötüridu;

Biraq Tengri héchkimning iplasliqini eyiblimeydu.□

13 — Nurgha qarshi isyan kötüridighanlarmu bar;

Ular nurning yollirini bilmeydu,

Uning teriqiliride turmaydu.

14 Qatil tang nuri kélishi bilen ornidin turup,

Kembegheller we miskinlerni öltüridu;

Kéchide u oghridek yüridu.□ ■

15 Zinaxormu «Méni héch köz körmeydu» dep zawal waqtini kütidu,

Bashqilar méni tonumisun dep ayalning chümbilini yüzige tartiwalidu.■

16 Qarangghuluqta oghrilar öyning tamlirini kolap téshidu;

Kündüzde ular özlirini öz öyige qamap qoyidu;

Ular nurni tonumaydu.■

17 Ular üchün tang seher ölüm sayisidek tuyulidu;

Ular qap-qarangghuluqning wehimilirini dost tutidu.□

18 Ular sularning yüzidiki köpüklerdek yoqap ketsun!

Ularning yer-zémindiki nésiwisi lenet qilin’ghanki,

Shunga ulardin héchkim üzümzarliqqa yene mangmisun!□

19 Qurghaqchiliq hem tomuz issiq qar sulirinimu yep tügitidu;

Tehtisaramu oxshashla gunah qilghanlarni yep tügetsun!

20 Uni, tughqan anisimu untusun!

Qurt shölgeylirini éqitip uni yésun!

Eske héch élinmisun!

Shuning bilen heqqaniysizliq derextek késilsun!□

21 U balisi yoq tughmaslardin olja alidu,

U tul xotunlarghimu héch shepqet körsetmeydu.

22 Biraq Xuda Öz qudriti bilen mundaq küch-hoquqi barlarning künini uzartidu;

Ular hetta hayatidin ümidsizlensimu qaytidin ornidin turidu.□

23 Xuda yenila ularni amanliqta muqimlashturidu,

Shunga ular xatirjem bolidu;

U ularning yollirini közde tutqan emesmu?□

24 Ularning mertiwisi birdemlik östürülidu,

Andin ular yoq bolidu;

Ular ongda qaldurulidu, andin bashqa ademlerge oxshashla yighip élip kétilidu;

Ular peqetla pishqan serxil bughday bashaqliridek késilip kétidu.□

25 Bu ishlar mundaq bolmisa, qéni kim méni yalghanchi dep ispatliyalaydu.

Méning geplirimni kim quruq gep déyeleydu?».

□ 24:2 «Mana, ademler pasil qilin’ghan tashlarni yötkiwétidu» — mushu bab 1-12-ayettiki «ademler» belkim chöl-bayawanda turuwatqan miskin jinayetchilerni körsitidu (bolupmu 5-12-ayetlerni körüng). «...tashlarni yötkiwétidu» — yaki «tashlarni yötkep kétidu». ■ 24:2 Qan. 19:14; 27:17; Pend. 22:28; 23:10 □ 24:3 «Ular tul xotunning kalisini képillik üchün éliwalidu» — bu kalisi belkim hem süt üchün hem yer heydesh üchünmu ishlitilidu. ■ 24:4 Pend. 28:28 □ 24:5 «...ular desht-bayawanlardiki yawayi ésheklerdek,...» — bu yaman ademler sheher-yézilardin heydiwétilgen bolup, desht-bayawanda jan béqishtin bashqa amali yoq idi. □ 24:6 «Ular yamanning kaliliri üchün dalada ot-chöp oridu, uning üchün ashqan-tashqan üzümlirini tériydu» — roshenki, yer igisi bolghan mushu rezil adem bu «chüprendiler»ge öz ashliq hosulini élishta yaki üzüm hosulini üzüshte héch ishenmeydu. □ 24:9 «Ular miskinlerdin bowaqlarni képillikke alidu» — yaki «Ular miskinlerdin képillik alidu». ■ 24:10 Law. 19:13 ■ 24:11 Qan. 25:4; Yaq. 5:4 □ 24:12 «... Biraq Tengri héchkimning iplasliqini eyiblimeydu» — kéyin Ayup bu sözidin hem mushuninggha oxshash bashqa sözliridin towa qilip: «Nesihetni tuturuqisiz sözler bilen xireleshtürgen kim?» dep sözidin yanidu (42-bab). Biraq bu babtiki 1-12-ayetlerdin roshen chüshinimizki, u mundaq kishilerning, hetta uningdin yiraq turghan ézilgüchilerning ehwaligha ichini aghritip köngül böletti. □ 24:14 «Qatil tang nuri kélishi bilen ornidin turup, kembegheller we miskinlerni öltüridu» — belkim tang seherdiki ghuwaliqtin hem kishining bixestelikidin paydilinip yoshurun zerbe qilip bulap-talaydu. ■ 24:14 Zeb. 10:8, 9 ■ 24:15 Zeb. 10:10-11; Pend. 7:8, 9 ■ 24:16 Ayup 38:15; Yuh. 3:20 □ 24:17 «Ular üchün tang seher ölüm sayisidek tuyulidu» — yaki «Tang seher ular üchün qap-qarangghuluq bolidu». □ 24:18 «Ular sularning yüzidiki köpüklerdek yoqap ketsun!» — 18-20-ayetlerdiki péillarni buyruq sheklide yaki kelgüsi zaman sheklide terjime qilishqa bolidu. Shunga -18-20-ayetlerning bashqa birxil terjimisi: «Ular sularning yüzidiki köpüklerdek yoqap kétidu; ularning yer-zémindiki nésiwisi lenet qilin’ghan, shuning bilen ulardin héchkim üzümzarliqqa yene mangmaydu... qatarliq» bolidu. Biraq biz terjimimizni aldi-keynidiki ayetlerge maslashturup alduq. □ 24:20 «Qurt shölgeylirini éqitip uni yésun!» — yaki: «Qurt uning jorisi bolsun!». □ 24:22 «...Ular hetta hayatidin ümidsizlensimu qaytidin ornidin turidu» — bu ayettiki esli tékistni chüshinish sel tes. Bashqa xil terjimiliri uchrishi mumkin. □ 24:23 «U ularning yollirini közde tutqan emesmu?» — Ayup mushu yerde Xudaning yamanlarning yollirini közde tutqini bilen ularni alahide jazalimaydighanliqini, belki ularni adettikidek ölüm künige saqlaydighanliqini körsetmekchi bolushi mumkin. □ 24:24 «Ular , yeni yamanlar peqetla pishqan serxil bughday bashaqliridek késilip kétidu» — Ayup yenila, yamanlarning héch jazalanmay hayatning peyzini sürüp andin pishqan serxil bughdaydek héch azablanmay bu dunyadin kétidighanliqini körsetse kérek.