☰ Ayup 7
7
Insanlarning turmush azabliri
1 Insan’gha zéminda jewre-japa chékidighan turmush békitilgen emesmu?
Uning künliri bir medikarningkige oxshash emesmu?
2 Qul kechqurunning sayisige teshna bolghandek,
Medikar öz emgikining heqqini kütkendek,
3 Mana bihude aylar manga békitilgen,
Gheshlikke tolghan kéchiler manga nésip qilin’ghan.□
4 Men yatqinimda: «Qachan qoparmen?» dep oylaymen,
Biraq kech uzundin uzun bolidu,
Tang atquche pütün bir kéche men tolghinip yatimen.
5 Etlirim qurtlar hem topa-changlar bilen qaplandi,
Térilirim yérilip, yiringlap ketti.□
6 Künlirim bapkarning mokisidinmu ittik ötidu,
Ular ümidsizlik bilen ayaghlishay dep qaldi.□
7 Ah Xuda, méning jénim bir nepesla xalas.
Közüm yaxshiliqni qaytidin körmeydighanliqi ésingde bolsun;■
8 Méni Körgüchining közi ikkinchi qétim manga qarimaydu,
Sen neziringni üstümge chüshürginingde, men yoqalghan bolimen.□
9 Bulut ghayib bolup, qayta körünmigendek,
Oxshashla tehtisaragha chüshken adem qaytidin chiqmaydu.□
10  U yene öz öyige qaytmaydu,
Öz yurti uni qayta tonumaydu.
11  Shunga men aghzimni yummay,
Rohimning derd-elimi bilen söz qilay,
Jénimning azabidin zarlaymen.
12  Némishqa Sen üstümdin közet qilisen?
Men xeterlik bir déngizmu-ya?
Yaki déngizdiki bir ejdihamumen?□
13  Men: «Ah, yatqan ornum manga rahet béridu,
Körpem nale-peryadimgha derman bolidu» — désem,
14  Emdi Sen chüshler bilen méni qorqutiwatisen,
Ghayibane alametler bilen manga wehime salisen.
15  Shuning üchün boghulushumni, ölümni,
Bu söngeklirimge qarap olturushtin artuq bilimen.□
16  Men öz jénimdin toydum;
Méning menggüge yashighum yoq,
Méni meylimge qoyiwetkin,
Méning künlirim bihudidur.□  ■
17 Insan balisi némidi?
Sen némishqa uni chong bilisen,
Néme dep uninggha köngül bérisen?■
18 Her etigende uni sürüshtürüp kélisen,
Her nepes uni sinaysen!
19  Qachan’ghiche méningdin neziringni almaysen,
Manga qachan’ghiche aghzimdiki sériq suni yutuwalghudek aram bermeysen?
20  Men gunah qilghan bolsammu,
i insaniyetni Közetküchi, Sanga néme qiliptimen?!
Men Sanga yük bolup qaldimmu?
Buning bilen méni Özüngge zerbe nishani qilghansenmu?
21 Sen némishqa méning itaetsizlikimni kechürüm qilip,
Gunahimni saqit qilmaysen?
Chünki men pat arida topining ichide uxlaymen;
Sen méni izdep kélisen, lékin men mewjut bolmaymen».□
 
 
□ 7:3 «Mana bihude aylar manga békitilgen,...» — bu jümle Ayupning azabi ashu kün’giche belkim birnechche ay uzartilghanliqini körsitidu. Uning dostlirining Ayupning qéshigha kelgüche qilghan sepiri uzun bolghan bolsa kérek. □ 7:5 «Etlirim qurtlar hem topa-changlar bilen...» — yaki «Etlirim qurtlar hem qaqach-chaqalar bilen...». □ 7:6 «Künlirim bapkarning mokisidinmu ittik ötidu» — bapkarning mokisi intayin téz, toxtimay heriket qilidu. «Ular ümidsizlik bilen...» — ibraniy tilida «ümidsizlik» we «yip» ahangdash söz. Ayup mushu ayette öz hayatini toqulidighan gilemge oxshitip, «yip toxtap qalghudek» démekchi. ■ 7:7 Ayup 8:9; 10:9; 14:1, 2, 3; 16:22; Zeb. 90:5, 6, 9; 102:11; 103:15; 144:4; Yesh. 40:6; Yaq. 4:14; 1Pét. 1:24 □ 7:8 «Sen neziringni üstümge chüshürginingde, men yoqalghan bolimen» — bu 7-8-ayette, 21-ayetke oxshash, Ayup «I Xuda, Sen baldur manga rehim qilmisang, kéchikip qalisen!» dégendek qilatti. □ 7:9 «Tehtisara» — mushu yerde «tehtisara» (ibraniy tilida «shéol») dégen yer «yer astidiki saray» (yeni, «tekt saray»), ölgenlerning rohliri barghan jayni körsitidu. Éniq turuptiki, Ayupning bu sözlerni éytqanda gördin tirildürülüsh toghrisida xewiri köp emes idi. □ 7:12 «Némishqa Sen üstümdin közet qilisen?» — Ayup: «Men alemning amanliqigha birxil xewp yetküzemdim-ya?» dep Xudadin sorimaqchi oxshaydu. □ 7:15 «... boghulushumni, ölümni, bu söngeklirimge qarap olturushtin artuq bilimen» — Ayupning késili, belkim, boghnuqush késili (dem siqilish késili) bolushi mumkin. Bu ayet yene mundaqmu terjime qilinidu, yeni: «Gélimni siqquchi bolsa boynumni, ölüm bolsa söngeklirimni tallidi». □ 7:16 «Méning künlirim bihudidur» — yaki «Méning künlirim bir nepes, xalas!». ■ 7:16 Zeb. 62:9; 144:4 ■ 7:17 Zeb. 8:4; 144:3; Ibr. 2:6 □ 7:21 «...sen méni izdep kélisen, lékin men mewjut bolmaymen» — 7-bab, 7-8-ayet üchün bérilgen izahatnimu körüng. Mushu yerde, Ayupning ichidiki étiqad hem gumanning bir-birige bolghan kürishi körünidu. Ayup bir tereptin Xudani düshminimdek ish qildi, lékin yene bir tereptin U kelgüside Öz dostini izdigendek méni izdep kélidu, biraq tapalmaydu, deydu.
☰