10
Padishah Sulaymanning hékmetlik sözliri
1 Padishah Sulaymanning pend-nesihetliri: —
Dana oghul atisini shad qilar;
Eqilsiz oghul anisini qayghu-hesretke salar.
2 Haram bayliqlarning héch paydisi bolmas;
Heqqaniyet insanni ölümdin qutuldurar.
3 Perwerdigar heqqaniy ademning jénini ach qoymas;
Lékin u qebihlerning nepsini boghup qoyar.
4 Hurunluq kishini gaday qilar;
Ishchanliq bolsa bayashat qilar.
5 Yazda hosulni yighiwalghuchi — dana oghuldur;
Lékin orma waqtida uxlap yatquchi — xijaletke qalduridighan oghuldur.
6 Beriket heqqaniy ademning béshigha chüsher;
Emma zorawanliq yamanlarning aghzigha urar.
7 Heqqaniy ademning yadikari mubarektur;
Yamanlarning nami bolsa, sésiq qalar.
8 Dana adem yolyoruq-nesihetlerni qobul qilar;
Kot-kot, nadan kishi öz ayighi bilen putlishar.
9 Ghubarsiz yürgen kishining yürüsh-turushi turaqliqtur,
Yollirini egri qilghanning kiri axiri ashkarilinidu.
10 Köz isharitini qilip yüridighanlar ademni daghda qaldurar;
Kot-kot, nadan kishi öz ayighi bilen putlishar.
11 Heqqaniy ademning aghzi hayatliq buliqidur,
Emma zorawanliq yamanning aghzigha urar.
12 Öchmenlik jédel qozghar;
Méhir-muhebbet hemme gunahlarni yapar.
13 Eqil-idraqlik ademning aghzidin danaliq tépilar;
Eqilsizning dümbisige palaq téger.
14 Dana ademler bilimlerni ziyade toplar;
Lékin exmeqning aghzi uni halaketke yéqinlashturar.
15 Mal-dunyaliri goya mezmut sheherdek bayning kapalitidur;
Miskinni halak qilidighan ish del uning namratliqidur.
16 Heqqaniylarning ejirliri jan’gha jan qoshar,
Qebihlerning hosuli gunahnila köpeytishtur.
17 Nesihetni anglap uni saqlighuchi hayatliq yoligha mangar;
Tenbihlerni ret qilghan kishi yoldin azghanlardur.
18 Adawet saqlighan kishi yalghan sözlimey qalmas;
Töhmet chaplighanlar exmeqtur.
19 Gep köp bolup ketse, gunahtin xaliy bolmas,
Lékin aghzigha ige bolghan eqilliqtur.
20 Heqqaniy ademning sözi xuddi sap kümüsh;
Yamanning oyliri tolimu erzimestur.
21 Heqqaniy ademning sözliri nurghun kishini quwwetler;
Exmeqler eqli kemlikidin öler.
22 Perwerdigarning ata qilghan berikiti ademni döletmen qilar;
U berikitige héchbir japa-musheqqet qoshmas.
23 Exmeq qebihlikni tamasha dep biler;
Emma danaliq yorutulghan kishining xursenlikidur.
24 Yaman kishi némidin qorqsa shuninggha uchrar;
Heqqaniy ademning arzusi emelge ashurular.
25 Yaman adem quyundek ötüp yoqar;
Lékin heqqaniy adem menggülük uldektur.
26 Adem achchiq su yutuwalghandek,
Közige is-tütek kirip ketkendek,
Hurun ademni ishqa ewetkenmu shundaq bolar.
27 Perwerdigardin eyminish ömürni uzun qilar,
Yamanning ömri qisqartilar.
28 Heqqaniy ademning ümidi xursenlik élip kéler;
Lékin rezilning kütkini yoqqa chiqar.
29 Perwerdigarning yoli durus yashawatqanlargha bashpanahdur;
Qebihlik qilghuchilargha bolsa halakettur.
30 Heqqaniylarning orni mustehkemdur;
Yamanlar zéminda uzun turmas.
31 Heqqaniy ademning aghzidin danaliq chiqar;
Lékin shumluq til késip tashlinar.
32 Heqqaniy ademning sözi kishige mok xushyaqar;
Yaman ademning aghzidin shumluq chiqar.