7
7-küy •••• Xuda Öz heqqaniyliqini körsetkey!
1-2 Dawutning «Shiggaon»i: — Kush isimlik bir Binyaminliqning sözliri toghruluq éytqan küyi: —
I Perwerdigar, méning Xudayim, men Sanga tayandim;
Ulardin biri shirdek méni titma-titma qiliwetmisun,
Qutquzghuchi yoqluqidin paydilinip méni éziwetmisun,
Méni barliq qoghlighuchilardin qutquzghin,
Ulardin xalas qilghin;
3 I Perwerdigar Xudayim, eger qolumda qebihlik qilghan bolsam,
Eger shundaq qilghan bolsam: —
4 Eger men bilen inaq ötküchige yamanliq qayturghan bolsam,
— (Eksiche men bilen bikardin-bikar düshmenleshkennimu qutquzdum) —
5 — Undaqta, düshmen méni qoghlap tutuwalsun,
U jénimni cheylep yer bilen yeksan qilsun,
Shöhritimni tupraqqa kömsun!
6 I Perwerdigar, gheziping bilen ornungdin turghin,
Méni ezgenlerning qehrige taqabil turushqa qeddingni ruslighin,
We méning üchün oyghan’ghin;
Sen sot we hökümni békitkenidingghu!
7 Xelqlerdin bolghan jamaet etirapinggha olishidu;
Sen ular üchün pelektiki ornunggha qaytip barghaysen.
8 Perwerdigar xelqlerning üstidin höküm chiqiridu;
I Perwerdigar, öz heqqaniyliqim boyiche,
We özümde bolghan durusliqim boyiche,
Manga höküm chiqarghaysen.
9 Ah, rezillerning yamanliqi axirlashsun!
Heqqaniy ademni ching turghuzghaysen;
I, adem qelblirini hem ichlirini sinighuchi heqqaniy Xuda!
10 Méning qalqinim bolsa,
Durus niyetliklerni qutquzghuchi Xudadidur;
11 Xuda adil sotchidur,
U kün boyi gunahtin renjiydighan Ilahtur;
12 Birsi yaman yolidin yanmisa,
U qilichini bileydu,
Ya oqini tartip betlep qoyidu.
13 Shundaq ademler üchün U ölüm qorallirini teyyarlidi;
U oqlirini köydürgüchi oq qildi.
14 Mana, mushundaq kishiler tolghaqta qebihlik tughmaqchi,
Uning boyida qalghini yamanliqtur;
Uning tughqini bolsa saxtiliqtur.
15 U bir orini kolap, uni chongqur qildi;
U özi kolighan origha yiqilip chüshti.
16 Özining yamanliqi béshigha qaytip kélidu,
Öz zorawanliqi bolsa öz üstige qaytip chüshidu.
17 Men Perwerdigarni heqqaniyliqi bilen medhiyeleymen,
Hemmidin yuqiri turghuchi Perwerdigarning namini yangritip, küy qilip éytimen.