☰ Korintliⱪlarƣa «2» 12
12
Pawlusⱪa kǝlgǝn wǝⱨiylǝr
1  Əpsus, mahtiniwerixning zɵrüriyiti bar. Gǝrqǝ uning paydisi bolmisimu, mǝn Rǝbdin kǝlgǝn alamǝt kɵrünüxlǝr wǝ wǝⱨiylǝr üstidǝ tohtilay. 2 Mǝsiⱨdǝ bolƣan bir adǝmni tonuymǝn; u on tɵt yil ilgiri (tǝndǝ bolƣan ⱨaldimu, yaki tǝndin taxⱪirimu bilmǝymǝn, Huda bilidu) üqinqi ⱪat asmanƣa kɵtürüldi.□  ■ 3 Mǝn xundaⱪ bir kixini bilimǝn (tǝndǝ bolƣan ⱨaldimu, yaki tǝndin taxⱪirimu bilmǝymǝn, Huda bilidu) — 4 u jǝnnǝtkǝ kɵtürülüp, xu yǝrdǝ til bilǝn ipadiligili bolmaydiƣan, insanlarning deyixi mǝn’i ⱪilinƣan ajayip ixlarni anglidi. 5 Xundaⱪ bir adǝm bilǝn mahtinimǝn, ɵzüm ⱨǝⱪⱪidǝ bolsa ajizliⱪmdin baxⱪa birǝr ix bilǝn mahtanmaymǝn. □ 6-7 Ⱨǝtta mahtinay desǝmmu ǝhmǝⱪ ⱨesablanmaymǝn; qünki mǝn ⱨǝⱪiⱪǝtni eytⱪan bolattim; ǝmma birsi mǝndǝ kɵrginidin yaki mǝn toƣruluⱪ angliƣinidin meni (manga axkarilanƣan wǝⱨiylǝrning ƣayǝt zor uluƣluⱪi tüpǝylidin) yuⱪiri oylap ⱪalmisun dǝp ɵzümni mahtinixtin yiƣdim. Muxu wǝⱨiylǝrning zor uluƣluⱪi tüpǝylidin kɵrǝnglǝp kǝtmǝslikim üqün ǝtlirimgǝ sanjilƣan bir tikǝn, yǝni meni urup tursun dǝp Xǝytanning bir ǝlqisi manga tǝⱪsim ⱪilinƣan; buning mǝⱪsiti, mening kɵrǝnglǝp kǝtmǝslikim üqündur.□ 8 Buning toƣrisida u mǝndin kǝtsun dǝp Rǝbgǝ üq ⱪetim yelindim; 9 lekin U manga: «Mening meⱨir-xǝpⱪitim sanga yetǝrlik; qünki Mening küq-Ⱪudritim insanning ajizliⱪida toluⱪ ǝmǝlgǝ axurulidu» — dedi. Xunga mǝn Mǝsiⱨning küq-ⱪudriti wujudumda tursun dǝp ajizliⱪlirimdin mahtinixni tehimu huxluⱪ bilǝn talliwalimǝn; 10 xunga mǝn Mǝsiⱨ üqün ajizliⱪlarni, ⱨaⱪarǝtlǝrni, ⱪiyinqiliⱪlarni, ziyankǝxliklǝrni wǝ azab-oⱪubǝtlǝrni hursǝnlik dǝp bilimǝn. Qünki ⱪaqan ajiz bolsam, xu qaƣda küqlük bolimǝn.□
 
Pawlusning Korinttiki jamaǝtkǝ kɵngül bɵlüxi
11 Mǝn mahtinip dǝrwǝⱪǝ ǝhmǝⱪ bolup ⱪaldim! Lekin ɵzünglar meni buningƣa mǝjbur ⱪildinglar. Əmǝliyǝttǝ ǝslidǝ mǝn silǝr tǝripinglardin tǝriplinixim kerǝk bolatti; qünki ⱨeq ǝrzimǝs bolsammu, mǝn ⱨeliⱪi «ⱪaltis uluƣ rosullar»din ⱨeq tǝrǝptǝ ⱨeq ixta kǝm ǝmǝsmǝn. ■ 12 Dǝrwǝⱪǝ mǝn aranglarda bolƣan qaƣda rosulning bexarǝtlik alamǝtliri, ⱨǝrtǝrǝplik qidam-sǝwrqanliⱪ iqidǝ mɵjizilik alamǝtlǝr, karamǝtlǝr ⱨǝm ⱪudrǝtlik mɵjizilǝr bilǝn ǝmǝldǝ kɵrsitilgǝn. ■ 13 Silǝrni baxⱪa jamaǝtlǝrdin ⱪaysi tǝrǝptǝ tɵwǝn orunƣa ⱪoydum? — pǝⱪǝtla ɵzümni silǝrning üstünglǝrgǝ yük ⱪilip artip ⱪoymiƣinim bilǝnmu?! Mening bu adalǝtsizlikimni ǝpu ⱪilƣaysilǝr! □  ■ 14 Mana, ⱨazir yeninglarƣa üqinqi ⱪetim berixⱪa tǝyyarmǝn, xuning bilǝn silǝrgǝ ⱨeq yük eƣirimni salƣum yoⱪ. Qünki izdiginim igilikinglar ǝmǝs, bǝlki ɵzünglardur; pǝrzǝntliri ata-anilar üqün ǝmǝs, bǝlki ata-anilar pǝrzǝntliri üqün mal-mülük yiƣixi kerǝk. □  ■ 15 Əmdi jeninglar üqün igilikimdin huxluⱪ bilǝn sǝrp ⱪilimǝn ⱨǝmdǝ ɵzümni sǝrp ⱪilimǝn — gǝrqǝ mǝn silǝrni ⱪanqǝ sɵygǝnseri mǝn xunqǝ az sɵyülsǝmmu. ■ 16 Əmdi xundaⱪ bolƣini bilǝn, mǝn silǝrgǝ ⱨeq yük bolƣan ǝmǝsmǝn; biraⱪ ⱨeligǝrlik ⱪilip, mǝn silǝrni bablap ⱪoydum! □
 17 Əjǝba, mǝn silǝrgǝ ǝwǝtkǝn adǝmlǝrning birǝrsi arⱪiliⱪ silǝrdin nǝp aldimmu?! 18 Mǝn Titusni silǝrning yeninglarƣa berixⱪa ündidim wǝ yǝnǝ ⱨeliⱪi ⱪerindaxnimu uning bilǝn billǝ ǝwǝttim. Titusning silǝrdin nǝp elip baⱪⱪan yeri barmu? Biz ikkiylǝn ohxax bir roⱨta yüriwatmamduⱪ? Bizning basⱪan izimiz ohxax ǝmǝsmikǝn?
19 Yaki silǝr ǝzǝldin bizni «Ular aldimizda ɵzlirini aⱪlap keliwatidu» dǝp oylawatamsilǝr? Ix undaⱪ ǝmǝs. Biz pǝⱪǝt Mǝsiⱨdǝ bolup Huda aldida sɵzlǝwatimiz; ⱪiliwatⱪan ⱨǝmmǝ ixlar, i sɵyümlüklirim, silǝrning etiⱪadinglarni ⱪurux üqündur. □ 20 Qünki mǝn yeninglarƣa barƣinimda, silǝrning ümid ⱪilƣan yerimdin qiⱪmay ⱪelixinglardin, ɵzümningmu silǝrning ümid ⱪilƣan yeringlardin qiⱪmay ⱪeliximdin, yǝni aranglarda ƣowƣa-jedǝl, ⱨǝsǝthorluⱪ, ƣǝzǝp-nǝprǝt, mǝnmǝnqilik, tɵⱨmǝthorluⱪ, ƣǝywǝthorluⱪ, tǝkǝbburluⱪ wǝ parakǝndiqiliklǝr bolarmikin dǝp ǝnsirǝymǝn; 21 — bu ⱪetim silǝrning yeninglarƣa barƣinimda, aranglardiki gunaⱨ sadir ⱪilip, taki bügüngǝ ⱪǝdǝr ɵtküzgǝn napakliⱪ, buzuⱪluⱪ wǝ xǝⱨwaniy ixlardin tehi towa ⱪilmiƣan nurƣun adǝmlǝrning sǝwǝbidin Hudayim meni aldinglarda tɵwǝn ⱪilip ⱪoyarmikin, xularning ⱪilmixliri tüpǝylidin matǝm tutmay turalmaymǝnmikin, dǝp ǝnsirǝymǝn.□
 
 
□ 12:2 «Mǝsiⱨdǝ bolƣan bir adǝmni tonuymǝn» — bu adǝm dǝl Pawlusning ɵzi bolup, u Huda uningƣa bǝrgǝn wǝⱨiy wǝ ƣayibanǝ alamǝtlǝr bilǝn mahtinixni ⱪilqǝ halimiƣan bolup, ɵzini tɵwǝn tutuxⱪa tirixip, ɵzi toƣruluⱪ «mǝn» demǝy, «üqinqi xǝhstǝ» sɵzlǝydu. «u on tɵt yil ilgiri ... üqinqi ⱪat asmanƣa kɵtürüldi» — Tǝwrat-injil boyiqǝ, pǝⱪǝt üq asman bar. Birinqi «ⱨawa», ikkinqi «alǝm boxluⱪi», üqinqisi Hudaning ⱨuzurining ɵzidur. ■ 12:2 Ros. 9:3; 22:17; 1Kor. 15:8. □ 12:5 «ɵzüm ⱨǝⱪⱪidǝ bolsa ajizliⱪmdin baxⱪa birǝr ix bilǝn mahtanmaymǝn» — «ajizliⱪmdin» grek tilida «ajizliⱪlirimdin». □ 12:6-7 «muxu wǝⱨiylǝrning zor uluƣluⱪi tüpǝylidin kɵrǝnglǝp kǝtmǝslikim üqün ǝtlirimgǝ sanjilƣan bir tikǝn ... manga tǝⱪsim ⱪilinƣan» — «tikǝn»ning kɵqmǝ mǝnisi bar, ǝlwǝttǝ. «... meni urup tursun dǝp Xǝytanning bir ǝlqisi manga tǝⱪsim ⱪilinƣan» — grek tilida «Xǝytanning bir pǝrixtisi». «ǝlqi» wǝ «pǝrixtǝ» degǝnlǝr ǝmǝliyǝttǝ bir gǝp. □ 12:10 «Qünki ⱪaqan ajiz bolsam, xu qaƣda küqlük bolimǝn» — Pawlus ajiz bolƣinida Mǝsiⱨkǝ tehimu tayinidu, xuning bilǝn küqlük bolidu; ⱨǝmmimizmu xundaⱪ boluximiz kerǝk. ■ 12:11 1Kor. 15:10. ■ 12:12 1Kor. 9:2. □ 12:13 «Mening bu adalǝtsizlikimni ǝpu ⱪilƣaysilǝr!» — «adalǝtsizlik» intayin kinayilik, ⱨǝjwiy gǝp, ǝlwǝttǝ — bu sɵz Pawlusning ulardin ⱨeq eⱪtisadiy yardǝm tǝlǝp ⱪilmay, ularƣa hux hǝwǝrni ⱨǝⱪsiz yǝtküzgǝnlikini kɵrsitidu. Uning yuⱪirida ǝslǝtkinidǝk, u Korintta hux hǝwǝrning hizmitidǝ bolƣinida, baxⱪa jamaǝtlǝr uningƣa yardǝm pulini ǝwitip bǝrdi. ■ 12:13 1Kor. 9:12; 2Kor. 11:9. □ 12:14 «Qünki izdiginim igilikinglar ǝmǝs, bǝlki ɵzünglardur» — «izdiginim» — Injil, «Luⱪa» 19:10ni kɵrüng. ■ 12:14 Ros. 20:33. ■ 12:15 2Kor. 6:12. □ 12:16 «mǝn silǝrgǝ ⱨeq yük bolƣan ǝmǝsmǝn; biraⱪ ⱨeligǝrlik ⱪilip, mǝn silǝrni bablap ⱪoydum!» — bizningqǝ bu yǝnǝ tapa-tǝnǝ, intayin kinayilik gǝp. Pawlus Korintliⱪlarni roⱨiy jǝⱨǝttin ⱪuwwǝtlimǝkqi bolup, ɵzi ularning eyniƣa barmay (Korintliⱪlar bǝlkim uning yardǝm-hizmitini rǝt ⱪilƣan bolatti), bǝlki ɵzigǝ ohxax baxⱪa kɵyümqan ⱪerindaxlarni ɵz orniƣa ǝwǝtti (17-ayǝtni kɵrüng). Lekin baxⱪilar muxu ayǝt: «bǝzilǝr meni ⱨiyligǝrlik ⱪilip, yalƣan sɵzlǝp, silǝrdin nǝp ündürüwalidu, deyixip yüridu» dǝp tǝrjimǝ ⱪilidu. □ 12:19 «...silǝrning etiⱪadinglarni ⱪurux üqündur» — grek tilida: «...silǝrni ⱪurux üqündur». «Adǝmni ⱪurux» toƣruluⱪ «Rimliⱪlarƣa»diki kirix sɵznimu kɵrüng. □ 12:21 «Hudayim meni aldinglarda tɵwǝn ⱪilip ⱪoyarmikin...» — «aldinglarda», baxⱪa birhil tǝrjimisi «silǝr tüpǝylidin». Bǝlkim ikkila hil tǝrjimisi toƣridur. «... tehi towa ⱪilmiƣan nurƣun adǝmlǝrning sǝwǝbidin Hudayim meni aldinglarda tɵwǝn ⱪilip ⱪoyarmikin, xularning ⱪilmixliri tüpǝylidin matǝm tutmay turalmaymǝnmikin, dǝp ǝnsirǝymǝn» — Pawlus, Korintliⱪlarning tehi ⱪǝt’iylik bilǝn towa ⱪilip baⱪmiƣan gunaⱨliri tüpǝylidin yǝnǝ hijil bolup ⱪalimǝn, dǝp ǝnsirǝydu.
☰