☰ Misirdin qiⱪix 17
17
Ⱪoram taxtin qiⱪⱪan su
1 Andin pütkül Israil jamaiti ⱪopup, Sin qɵlidin qiⱪip, Pǝrwǝrdigarning ǝmri boyiqǝ sǝpǝr ⱪilip, Rǝfidim degǝn yǝrgǝ kelip qedirlirini tikti. Əmma u yǝrdǝ hǝlⱪⱪǝ iqkili su yoⱪ idi. 2 Xuning bilǝn hǝlⱪ Musa bilǝn jedǝllixip: — Bizgǝ iqkili su bǝrgin! — dedi. Lekin Musa ularƣa: — Nemixⱪa mening bilǝn jedǝllixisilǝr? Nemixⱪa Pǝrwǝrdigarni sinaysilǝr? — dedi.■
3 Lekin hǝlⱪ qangⱪap, su tǝlǝp ⱪilip, Musadin aƣrinip ƣotuldixip: — Sǝn nemixⱪa bizni, balilirimizni wǝ melimizni ussuzluⱪ bilǝn ɵltürüxkǝ Misirdin elip kǝlding? — dedi. 4 Xuning bilǝn Musa Pǝrwǝrdigarƣa pǝryad kɵtürüp: — Bu hǝlⱪni ⱪandaⱪ ⱪilsam bolar?! Ular ⱨelila meni qalma-kesǝk ⱪilixi mumkin! — dedi.
5 Pǝrwǝrdigar Musaƣa jawabǝn: — Sǝn Israilning aⱪsaⱪalliridin birnǝqqisini ɵzüng bilǝn billǝ elip qiⱪip, Nil dǝryasining süyini urƣiningda ixlǝtkǝn ⱨasangni ⱪolungƣa elip hǝlⱪning aldiƣa barƣin; ■ 6 Mana, Mǝn xu yǝrdǝ, Ⱨorǝb teƣidiki ⱪoram taxning üstidǝ sening aldingda turimǝn; sǝn ⱪoram taxni urƣin. Buning bilǝn uningdin hǝlⱪⱪǝ iqkili su qiⱪidu, — dedi.
Musa Israilning aⱪsaⱪallirining kɵz aldida xundaⱪ ⱪildi. □  ■ 7 Musa Israillarning jedǝllǝxkini wǝ ularning «Pǝrwǝrdigar arimizda zadi barmu-yoⱪmu?» deyixip Pǝrwǝrdigarni siniƣini üqün, u yǝrni «Massaⱨ» wǝ «Mǝribaⱨ» dǝp atidi.□
 
Amalǝklǝr bilǝn jǝng ⱪilix
8 Xu qaƣda Amalǝklǝr kelip Rǝfidimdǝ Israilƣa ⱨujum ⱪildi. ■ 9 Musa Yǝxuaƣa: Sǝn ɵzimizdin Amalǝk bilǝn jǝng ⱪilixⱪa adǝm talliƣin. Mǝn ǝtǝ Hudaning ⱨasisini ⱪolumƣa elip dɵngning qoⱪⱪisida turup turimǝn, dedi.□ 10 Yǝxua Musa buyruƣinidǝk ⱪilip, Amalǝklǝr bilǝn jǝng ⱪildi. Musa, Ⱨarun wǝ Hur dɵngning qoⱪⱪisiƣa qiⱪti. 11 Xundaⱪ boldiki, Musa ⱪolini kɵtürüp tursa, Israil ƣalib kelǝtti, lekin u ⱪollirini pǝskǝ qüxürüp tursa, Amalǝk ƣalib kelǝtti. 12 Musaning ⱪolliri eƣirlixip kǝtti; ular bir taxni elip kelip uning astiƣa ⱪoydi; u uning üstidǝ olturdi; andin Ⱨarun bilǝn Hur biri bir tǝripidǝ, biri yǝnǝ bir tǝripidǝ uning ⱪollirini yɵlǝp turdi; bu tǝriⱪidǝ uning ⱪolliri taki kün patⱪuqǝ mǝzmut turdi. 13 Xundaⱪ ⱪilip, Yǝxua Amalǝk wǝ uning hǝlⱪini ⱪiliqlap nabut ⱪildi.□
14 Pǝrwǝrdigar Musaƣa: — Bir ǝslimǝ bolsun dǝp bu ixlarni bir kitabⱪa yezip ⱪaldurƣin, xundaⱪla xularni Yǝxuaning ⱪulaⱪliriƣa oⱪup bǝr; qünki Mǝn Amalǝkning namini asmanlarning astidin, ⱨǝtta adǝmlǝrning esidinmu mutlǝⱪ ɵqürüwetimǝn, dedi.■
15 Andin Musa bir ⱪurbangaⱨni yasap, namini «Pǝrwǝrdigar tuƣumdur» dǝp atidi □ 16 wǝ Musa: — Yaⱨning tǝhti aldida bir ⱪol kɵtürülüp: — «Pǝrwǝrdigar ǝwladtin ǝwladⱪiqǝ Amalǝkkǝ ⱪarxi jǝng ⱪilidu» deyilgǝnidi, — dedi.□  ■
 
 
■ 17:2 Qɵl. 20:3, 4 ■ 17:5 Mis. 7:20 □ 17:6 «Ⱨorǝb teƣi» — Sinay teƣining baxⱪa bir ismi. ■ 17:6 Qɵl. 20:9; Zǝb. 78:15-16; 114:8; 1Kor. 10:4 □ 17:7 «Massaⱨ» — «sinax» degǝn mǝnidǝ, «Mǝribaⱨ» — «jedǝl-majra» degǝn mǝnidǝ. ■ 17:8 Ⱪan. 25:17,18 □ 17:9 «Sǝn ɵzimizdin Amalǝk bilǝn jǝng ⱪilixⱪa adǝm talliƣin» — yaki «Sǝn ɵzimizgǝ adǝmlǝrni tallap, Amalǝk bilǝn soⱪuxⱪili qiⱪⱪin». □ 17:13 «ⱪiliqlap,...» — ibraniy tilida «ⱪiliq bisi bilǝn urup,...». ■ 17:14 Qɵl. 24:20; Ⱪan. 25:17, 18, 19; 1Sam. 15:2, 3 □ 17:15 «Pǝrwǝrdigar tuƣumdur» — ibraniy tilida «Yaⱨwǝⱨ-nissi». □ 17:16 «Yaⱨ» — «Yaⱨwǝⱨ» (Pǝrwǝrdigar)ning ⱪisⱪartilma xǝklidur. «Yaⱨning tǝhti aldida bir ⱪol kɵtürülüp: ....» — kimning ⱪolining Hudaning tǝhti aldida kɵtürülgǝnliki eniⱪ eytilmaydu; bizningqǝ bu sirliⱪ ix ǝrxtǝ Hudaning aldida yüz bǝrgǝn bolup, ⱪǝsǝm ⱪilip «kɵtürülgǝn ⱪol» bolsa «Pǝrwǝrdigarning ⱪoli» («Yǝx.» 25:10, 41:20, 53:1, 66:14, «Yuⱨ.» 12:38), yǝni «Pǝrwǝrdigarning Ⱪuli» bolƣan Mǝsiⱨ («Yǝx.» 42:1, 19, 49:6, 52:13)ni kɵrsǝtsǝ kerǝk. ■ 17:16 1Sam. 15:2
☰