☰ Ibraniylarƣa 8
8
Bax kaⱨinimiz Əysa Mǝsiⱨ — ǝwzǝl kaⱨin, ǝwzǝl ǝⱨdǝ
1 Eytⱪanlirimizning bax nuⱪtisi xuki: Ərxtiki uluƣ Bolƣuqining tǝhtining ong tǝripidǝ olturƣan xundaⱪ bir Bax Kaⱨinimiz bar.■ 2 U muⱪǝddǝs jaylarda, xundaⱪla insan ǝmǝs, bǝlki Pǝrwǝrdigar tikkǝn ⱨǝⱪiⱪiy ibadǝt qedirining ⱨǝmmisidǝ kaⱨinliⱪ hizmitini ⱪilƣuqidur.□
3 Ⱨǝrbir bax kaⱨin ⱨǝdiyǝ ⱨǝm ⱪurbanliⱪlar sunux üqün tǝyinlinidu. Xuning üqün, bizning bu bax kaⱨinimizningmu birǝr sunidiƣini bolux kerǝk idi.□  ■ 4 Dǝrwǝⱪǝ ǝgǝr U yǝr yüzidǝ bolsidi, ⱨǝrgiz kaⱨin bolmaytti; qünki bu yǝrdǝ Tǝwrat ⱪanun-tüzümi boyiqǝ ⱨǝdiyǝ sunidiƣan kaⱨinlar alliburunla bardur 5 (bu kaⱨinlar hizmǝt ⱪilidiƣan ibadǝt qediri pǝⱪǝtla ǝrxtiki ixlarning kɵqürülmisi wǝ kɵlǝnggisidur. Musa dǝl bu ibadǝt qedirini ⱪuruxⱪa baxliƣanda, Hudaning wǝⱨiysi uningƣa kelip: «Eⱨtiyat ⱪilƣinki, bularning ⱨǝmmisini sanga taƣda kɵrsitilgǝn ɵrnǝk boyiqǝ yasiƣin» dǝp agaⱨlandurƣan).■ 6 Lekin ⱨazir U (kona ǝⱨdigǝ ait wǝdilǝrdin ǝwzǝl wǝdilǝr üstigǝ bekitilgǝq) tehimu yahxi bir ǝⱨdining wasitiqisi bolƣaqⱪa, Uningƣa berilgǝn kaⱨinliⱪ hizmiti baxⱪa kaⱨinlarningkidin xunqǝ ǝwzǝl turidu.□  ■
7 Əgǝr xu dǝslǝpki ǝⱨdǝ kǝm-kütisiz bolsa idi, keyinkisi üqün orun izdǝxning ⱨeqⱪandaⱪ ⱨajiti bolmiƣan bolatti.□ 8 Lekin, Huda kona ǝⱨdini yetǝrsiz dǝp ⱪarap, Israillarƣa mundaⱪ degǝn: —
«Mana, xu künlǝr keliduki, — dǝydu Pǝrwǝrdigar, — Mǝn Israil jǝmǝti wǝ Yǝⱨuda jǝmǝti üqün yengi bir ǝⱨdini ǝmǝlgǝ axurimǝn.□  ■ 9 Bu ǝⱨdǝ ularning ata-bowiliri bilǝn tüzgǝn ǝⱨdigǝ ohximaydu; xu ǝⱨdini Mǝn ata-bowilirini ⱪolidin tutup Misirdin ⱪutⱪuzup yetǝkliginimdǝ ular bilǝn tüzgǝnidim; qünki ular Mǝn bilǝn tüzüxkǝn ǝⱨdǝmdǝ turmidi, mǝn ulardin nǝzirimni yɵtkidim, — dǝydu Pǝrwǝrdigar.
10 Qünki xu künlǝrdin keyin, Mening Israil jǝmǝti bilǝn tüzidiƣan ǝⱨdǝm mana xuki: —
«Mǝn Ɵz tǝwrat-ⱪanunlirimni ularning zeⱨin-ǝⱪligǝ salimǝn, ⱨǝmdǝ ularning ⱪǝlbigimu pütimǝn; Mǝn ularning Hudasi bolimǝn, ularmu Mening hǝlⱪim bolidu. □ 11 Xundin baxlap ⱨeqkim ɵz yurtdixiƣa, yaki ɵz ⱪerindixiƣa: — «Pǝrwǝrdigarni tonuƣin» dǝp ɵgitixining ⱨajiti ⱪalmaydu; qünki ularning ⱨǝmmisi, ǝng kiqikidin qongiƣiqǝ Meni bilip bolƣan bolidu; ■ 12 qünki mǝn ularning ⱪǝbiⱨliklirigǝ rǝⱨim ⱪilimǝn ⱨǝmdǝ ularning gunaⱨliri wǝ itaǝtsizlikirini mǝnggügǝ esimdin qiⱪiriwetimǝn».■
13 Əmdi Hudaning bu ǝⱨdini «yengi» deyixi burunⱪisini «kona» degǝnlikidur; ǝmdi waⱪti ɵtkǝn, koniriƣan ix bolsa uzun ɵtmǝy yoⱪilidu.
 
 
■ 8:1 Əf. 1:20; Kol. 3:1; Ibr. 3:1; 4:14; 6:20; 9:11; 12:2. □ 8:2 «U (Mǝsiⱨ) muⱪǝddǝs jaylarda, xundaⱪla insan ǝmǝs, bǝlki Pǝrwǝrdigar tikkǝn ⱨǝⱪiⱪiy ibadǝt qedirining ⱨǝmmisidǝ kaⱨinliⱪ hizmitini ⱪilƣuqidur» — «muⱪǝddǝs jaylar» bolsa «muⱪǝddǝs jay» wǝ «ǝng muⱪǝddǝs jay» demǝkqi. □ 8:3 «bizning bu bax kaⱨinimizningmu» — grek tilida «Uningmu...». ■ 8:3 Əf. 5:2. ■ 8:5 Mis. 25:40; Ros. 7:44; Kol. 2:17; Ibr. 10:1. □ 8:6 «lekin ⱨazir U ... tehimu yahxi bir ǝⱨdining wasitiqisi bolƣaqⱪa, Uningƣa berilgǝn kaⱨinliⱪ hizmiti baxⱪa kaⱨinlarningkidin xunqǝ ǝwzǝl turidu» — bu ayǝttǝ kɵrsitilgǝn ǝⱨdǝ «yengi ǝⱨdǝ», 8-12-ayǝtlǝrni kɵrüng. ■ 8:6 2Kor. 3:6. □ 8:7 «Əgǝr xu dǝslǝpki ǝⱨdǝ kǝm-kütisiz bolsa idi, keyinkisi üqün orun izdǝxning ⱨeqⱪandaⱪ ⱨajiti bolmiƣan bolatti» — nemixⱪa rosul muxu yǝrdǝ: «keyinkisi üqün orun izdǝxkǝ ⱨajiti bolmiƣan bolatti» dǝydu, pǝⱪǝtla «keyinkisining ⱨeqⱪandaⱪ ⱨajiti bolmiƣan bolatti» demǝydu? Bǝlkim u «yengi ǝⱨdǝ» bexarǝt ⱪilƣan pǝyƣǝmbǝrlǝr (Yǝrǝmiya, Əzakiyal, Yǝxaya ⱪatarliⱪlar)ni kɵzdǝ tutidu; ular ɵzi «yengi ⱪǝlb, yengi roⱨ»ⱪa igǝ boluxⱪa tǝxna bolup izdigǝn, «yengi ǝⱨdǝ» dǝl muxularƣa ayan ⱪilinƣan. □ 8:8 «Lekin, Huda kona ǝⱨdini yetǝrsiz dǝp ⱪarap, Israillarƣa mundaⱪ degǝn: — «Mana, xu künlǝr keliduki, — dǝydu Pǝrwǝrdigar, — Mǝn Israil jǝmǝti wǝ Yǝⱨuda jǝmǝti üqün yengi bir ǝⱨdini ǝmǝlgǝ axurimǝn» — Huda Ɵzi bekitkǝn kona ǝⱨdini «yetǝrsiz kɵrgǝn»liki ⱨǝyran ⱪalarliⱪ kɵrünidu, ǝlwǝttǝ. Yetǝrsizliki bolsa dǝl 7:19dǝ kɵrsitilgǝndǝk «Tǝwrat ⱪanuni ⱨeq ixni kamalǝtkǝ yǝtküzǝlmidi». «Yengi ǝⱨdǝ» pǝⱪǝtla Hudaning mukǝmmǝl ⱨǝⱪⱪaniyliⱪini kɵrsǝtkǝn bolupla ⱪalmay, bǝlki bu ⱨǝⱪⱪaniyliⱪning insanlarning ⱪǝlbigǝ ⱪandaⱪ ornitilidiƣanliⱪini kɵrsitidu. ■ 8:8 Yǝr. 31:31-34. □ 8:10 «Qünki xu künlǝrdin keyin, Mening Israil jǝmǝti bilǝn tüzidiƣan ǝⱨdǝm mana xuki...» — Yǝrǝmiya pǝyƣǝmbǝrning bu bexaritidǝ, «xu künlǝrdin keyin» degǝn ibarǝ Huda hǝlⱪini ɵz yurtiƣa Babilondin ⱪayturƣandin keyinki künlǝrni kɵrsitidu. ■ 8:11 Yⱨ. 6:45,65; 1Yuⱨa. 2:27. ■ 8:12 Yǝr. 31:31-34.
☰