☰ Ayup 3
3
Ayupning sɵzlixi — uning ⱨayatⱪa lǝnǝt oⱪup, ɵlümgǝ intizar boluxi
1-2 Yǝttǝ kündin keyin, Ayup eƣiz eqip ǝⱨwaliƣa ⱪarita ɵzining kɵrüwatⱪan künigǝ lǝnǝt oⱪup mundaⱪ dedi: —■
3 «Mǝn tuƣulƣan axu kün bolmiƣan bolsa boptikǝn!
«Oƣul bala apiridǝ boldi!» deyilgǝn xu keqǝ bolmiƣan bolsa boptikǝn!□
4 Xu künni zulmǝt ⱪapliƣan bolsa boptikǝn!
Ərxtǝ turƣan Tǝngri kɵz aldidin xu künni yoⱪitiwǝtkǝn bolsa boptikǝn,
Ⱪuyax nuri uning üstigǝ qüxürülmisǝ boptikǝn!
5 Xu künni ⱪarangƣuluⱪ ⱨǝm ɵlümning kɵlǝnggisi ɵz ⱪoyniƣa alsa boptikǝn!
Bulutlar uni yutup kǝtsǝ boptikǝn,
Xu künni kün ⱪarangƣulatⱪuqilar ⱪorⱪitip kǝtküziwǝtkǝn bolsa boptikǝn!□
6 Xu kǝqni — Zulmǝt tutup kǝtsǝ boptikǝn;
Xu kün yil iqidiki baxⱪa künlǝr bilǝn billǝ xatlanmisa boptikǝn!
Xu kün ayning bir küni bolup sanalmisa boptikǝn!
7 Mana, xu keqidǝ tuƣut bolmisa boptikǝn!
U keqidǝ ⱨeqⱪandaⱪ xad-huramliⱪ awaz yangrimisa boptikǝn!
8 Künlǝrgǝ lǝnǝt ⱪilƣuqilar xu küngǝ lǝnǝt ⱪilsa boptikǝn!
Lewiatanni ⱪozƣaxⱪa petinalaydiƣanlar xu küngǝ lǝnǝt ⱪilsa boptikǝn!□
9  Xu kün tang sǝⱨǝrdiki yultuzlar ⱪarangƣulaxsa boptikǝn!
U kün ⱪuyax nurini biⱨudǝ kütsǝ boptikǝn!
Xu kün sübⱨining ⱪapaⱪlirining eqilixini biⱨudǝ kütsǝ boptikǝn!
10  Qünki xu kün meni kɵtürgǝn baliyatⱪuning ixiklirini ǝtmigǝn,
Mening kɵzlirimni dǝrd-ǝlǝmni kɵrǝlmǝs ⱪilmiƣan.
11  Aⱨ, nemixⱪa anamning ⱪorsiⱪidin qüxüpla ɵlüp kǝtmigǝndimǝn?!
Nemixⱪa ⱪorsaⱪtin qiⱪⱪandila nǝpǝstin ⱪalmiƣandimǝn?
12  Nemixⱪa meni ⱪobul ⱪilidiƣan etǝklǝr bolƣandu?
Nemixⱪa meni emitidiƣan ǝmqǝklǝr bolƣandu?
13  Muxular bolmiƣan bolsa, undaⱪta mǝn mǝnggü tinq yetip ⱪalattim,
Mǝnggülük uyⱪuƣa kǝtkǝn bolattim, xu qaƣda aram tapⱪan bolattim.
14  Xu qaƣda ɵzliri üqünla hilwǝt jaylarƣa mazar salƣan yǝr yüzidiki padixaⱨlar ⱨǝm mǝsliⱨǝtqilǝr bilǝn,□
15  Yaki altun yiƣⱪan,
Ɵyliri kümüxkǝ tolƣan bǝg-xaⱨzadilǝr bilǝn bolattim;
16  Ⱪorsaⱪtin mǝzgilsiz qüxüp kǝtkǝn yoxurun balidǝk,
Nurni kɵrmǝy qaqrap kǝtkǝn balidǝk ⱨayat kǝqürmigǝn bolattim.
17  Axu yǝrdǝ rǝzillǝr awariqiliktin haliy bolidu,
Axu yǝrdǝ ⱨalidin kǝtkǝnlǝr aram tapidu;□
18  Axu yǝrdǝ ǝsirlǝr raⱨǝttǝ jǝm bolidu,
Ular ǝzgüqilǝrning awazini anglimaydu;
19  Ƣeriblarmu ⱨǝm uluƣlarmu axu yǝrdǝ turidu,
Ⱪul bolsa hojayinidin azad bolidu.
20 Japa tartⱪuqiƣa nemǝ dǝp nur berilidu?
Nemixⱪa dǝrd-ǝlǝmgǝ qɵmgǝnlǝrgǝ ⱨayat berilidu?
21  Ular tǝxnaliⱪ bilǝn ɵlümni kütidu,
Biraⱪ u kǝlmǝydu;
Ular ɵlümni yoxurun gɵⱨǝrni kezip izdigǝndinmu ǝwzǝl bilidu,
22  Ular gɵrni tapⱪanda zor huxal bolup,
Xad-huramliⱪⱪa qɵmidu.
23 Ɵz yoli eniⱪsiz adǝmgǝ,
Yǝni Tǝngrining tosiⱪi selinƣan adǝmgǝ nemixⱪa nur wǝ ⱨayat berilidu?
24  Xunga tamiⱪimning orniƣa nalilirim kelidu;
Mening ⱪattiⱪ pǝryadlirim xarⱪiratmidǝk xarⱪiraydu.
25  Qünki mǝn dǝl ⱪorⱪⱪan wǝⱨxǝt ɵz beximƣa qüxti;
Mǝn dǝl ⱪorⱪidiƣan ix manga kǝldi.
26  Mǝndǝ ⱨeq aramliⱪ yoⱪtur!
Ⱨǝm ⱨeq hatirjǝm ǝmǝsmǝn!
Ⱨeq tinq-amanliⱪim yoⱪtur!
Biraⱪ parakǝndiqilik ⱨaman üstümgǝ qüxmǝktǝ!».
 
 
■ 3:1-2 Yǝr. 15:10; 20:14 □ 3:3 «Oƣul bala apiridǝ boldi!» — bu gǝpni pǝrixtilǝr ⱪilƣan boluxi mumkin. □ 3:5 «kün ⱪarangƣulatⱪuqilar» — buning nemǝ ikǝnlikigǝ ⱨazir birnemǝ deyix tǝs. Bǝlkim jadugǝrlǝrning bir hil jadugǝrlikni ixlitip künni ⱪarangƣulitixⱪa intilidiƣanliⱪini kɵrisitixi mumkin. □ 3:8 «Lewiatan» — qongⱪur dengiz astida yaxaydiƣan ⱪorⱪunqluⱪ ǝjdiⱨaƣa ohxap ketidiƣan ⱨaywan. «Lewiatanni ⱪozƣax» bolsa, bǝzi kona mǝdǝniyǝtlǝrdǝ: «bu yoƣan ⱨaywanni ⱪozƣap ornidin turƣuzup pütün ⱪuyaxni tosup yepip, ⱪarangƣuluⱪ qüxürǝlǝymiz» degǝn kɵzⱪaraxtur. Ayupning ɵzi mundaⱪ «ⱪarangƣulaxturux usuli»ƣa ixǝnmǝsliki mumkin, biraⱪ xeirlik tǝkitlǝx üqün bu selixturmini ixlitidu. Demǝk, Ayup muxu yǝrdǝ ɵzi tuƣulƣan künining muxu ǝjdiⱨaƣa ohxax ⱪorⱪunqluⱪliⱪini wǝ taⱪabil turuxning intayin tǝslikini bildürmǝkqi bolƣan boluxi mumkin. □ 3:14 «ɵzliri üqünla hilwǝt jaylarƣa mazar salƣan yǝr yüzidiki padixaⱨlar ⱨǝm mǝsliⱨǝtqilǝr» — bu ayǝttiki «mazar» bǝlkim Misirdiki qong eⱨramlarni kɵrsitixi mumkin. Mǝyli qong, ⱨǝywǝtlik bolsimu, bǝribir adǝmni ɵlümdin ⱪoƣdiyalmaydu. Bu jümlini yǝnǝ «ɵzi üqünla ⱨazir harablixip kǝtkǝn jaylarni ⱪurƣan padixaⱨlar...» dǝp tǝrjimǝ ⱪilƣili bolidu. □ 3:17 «Axu yǝrdǝ rǝzillǝr ⱨalidin kǝtkǝnlǝr aram tapidu» — muxu yǝrdǝ Ayupning sɵzi Hudaning adalitidin gumanlinixiƣa yeⱪin kelidu. U, rǝzillǝr baxⱪa adǝmlǝrgǝ ohxax gɵrdǝ tǝng bolup ohxax dǝm alalaydu, dǝwatⱪandǝk mǝnidǝ sɵzlǝydu.
☰