5
5-munajat — Israilning rǝⱨim tilǝx duasi
1 Beximizƣa qüxkǝnlǝrni esinggǝ kǝltürgǝysǝn, i Pǝrwǝrdigar;
Ⱪara, bizning rǝswaqiliⱪta ⱪalƣinimizni nǝziringgǝ alƣaysǝn!
2 Mirasimiz yatlarƣa,
Ɵylirimiz yaⱪa yurtluⱪlarƣa tapxuruldi.
3 Biz yetim-yesirlǝr, atisizlar bolup ⱪalduⱪ;
Anilirimizmu tul ⱪaldi.
4 Iqidiƣan suni setiweliximiz kerǝk;
Otunni pǝⱪǝt pulƣa alƣili bolidu.
5 Bizni ⱪoƣliƣuqilar tap basturup keliwatidu;
Ⱨalsirap, ⱨeq aram tapalmaymiz.
6 Jan saⱪliƣudǝk bir qixlǝm nanni dǝp,
Misir ⱨǝm Asuriyǝgǝ ⱪol berip boysunƣanmiz.
7 Ata-bowilirimiz gunaⱨ sadir ⱪilip dunyadin kǝtti;
Biz bolsaⱪ, ularning ⱪǝbiⱨlikining jazasini kɵtürüxkǝ ⱪalduⱪ.
8 Üstimizdin ⱨɵküm sürgüqilǝr ⱪullardur;
Bizni ularning ⱪolidin azad ⱪilƣuqi yoⱪtur.
9 Dalada ⱪiliq tüpǝylidin,
Nenimizni tepixⱪa jenimizni tǝwǝkkul ⱪilmaⱪtimiz.
10 Terimiz tonurdǝk ⱪiziⱪ,
Aqliⱪ tüpǝylidin ⱪizitma bizni basmaⱪta.
11 Zionda ayallar,
Yǝⱨuda xǝⱨǝrliridǝ pak ⱪizlar ayaƣ asti ⱪilindi.
12 Əmirlǝr ⱪolidin darƣa esip ⱪoyuldi;
Aⱪsaⱪallarning ⱨɵrmiti ⱨeq ⱪilinmidi.
13 Yax yigitlǝr yarƣunqaⱪta japa tartmaⱪta,
Oƣul balilirimiz otun yüklǝrni yüdüp dǝldǝngxip mangmaⱪta.
14 Aⱪsaⱪallar xǝⱨǝr dǝrwazisida olturmas boldi;
Yigitlǝr nǝƣmǝ-nawadin ⱪaldi.
15 Xad-huramliⱪ kɵnglimizdin kǝtti,
Ussul oyniximiz matǝmgǝ aylandi.
16 Beximizdin taj yiⱪildi;
Ⱨalimizƣa way! Qünki biz gunaⱨ sadir ⱪilduⱪ!
17 Buning tüpǝylidin yürǝklirimiz mujuldi;
Bular tüpǝylidin kɵzlirimiz ⱪarangƣulaxti —
18 — Zion teƣiƣa ⱪarap kɵzlirimiz ⱪarangƣulaxti,
Qünki u qɵldǝrǝp kǝtti,
Qilbɵrǝ uningda paylap yürmǝktǝ.
19 Sǝn, i Pǝrwǝrdigar, mǝnggügǝ ⱨɵküm sürisǝn;
Tǝhting dǝwrdin-dǝwrgǝ dawamlixidu.
20 Sǝn nemixⱪa bizni daim untuysǝn?
Nemixⱪa xunqǝ uzunƣiqǝ bizdin waz keqisǝn?
21 Bizni yeningƣa ⱪayturƣaysǝn, i Pǝrwǝrdigar!
Xundaⱪ bolƣanda biz ⱪaytalaymiz!
Künlirimizni ⱪǝdimkidǝk ǝsligǝ kǝltürgǝysǝn,
22 — Əgǝr sǝn bizni mutlǝⱪ qǝtkǝ ⱪaⱪmiƣan bolsang,
Əgǝr bizdin qǝksiz ƣǝzǝplǝnmigǝn bolsang!