Muⱪeddes Kalam (yǝngi yeziⱪ) Zǝbur 19

19-küy •••• Alǝm ⱨǝm Tǝwrat Hudaning xǝripidur!

1 Dawut yazƣan küy: —

Ərxlǝr Tǝngrining uluƣluⱪini jakarlaydu,

Asman gümbizi Uning ⱪoli yasiƣanlirini namayan ⱪilidu;

2 Ularning sɵzliri kün-künlǝr dǝryadǝk eⱪiwatidu;

Keqǝ-keqilǝp ular bilimni ayan ⱪiliwatidu.□

3 Tilsiz ⱨǝm awazsiz bolsimu, ularning sadasi alǝmgǝ anglanmaⱪta.□

4 Ularning ɵlqǝm tanisi yǝr yüzidǝ tartilmaⱪta;

Ularning sɵzliri alǝmning qetigiqǝ yǝtmǝktǝ.

Ularning iqidǝ Huda ⱪuyax üqün qedir tikkǝn,□ ■

5 Ⱪuyax ⱨujrisidin toyƣa qiⱪⱪan yigittǝk qiⱪidu,

Bǝygigǝ qüxidiƣan palwandǝk xadlinidu;■

6 Asmanlarning bir qetidin ɵrlǝydu,

Jaⱨanning u qetigiqǝ qɵrgilǝydu,

Uning ⱨararitidin ⱨeqⱪandaⱪ mǝhluⱪat yoxurunalmaydu.

7 Pǝrwǝrdigarning tǝwrat-ⱪanuni mukǝmmǝldur,

U insan wujudini yengilaydu;

Pǝrwǝrdigar bǝrgǝn ⱨɵküm-guwaⱨlar muⱪim-ixǝnqlik ,

U nadanlarni dana ⱪilidu.□ ■

8 Pǝrwǝrdigarning kɵrsǝtmiliri durus,

U ⱪǝlbni xadlanduridu;

Pǝrwǝrdigarning pǝrmanliri yoruⱪluⱪtur,

U kɵzlǝrni nurlanduridu.□

9 Pǝrwǝrdigardin ǝyminix pak ixtur, u mǝnggü dawamlixidu;

Pǝrwǝrdigarning ⱨɵkümliri ⱨǝⱪtur,

Ⱨǝrbiri tamamǝn ⱨǝⱪⱪaniyǝttur.

10 Ular altundin, bǝrⱨǝⱪ kɵp sap altundin ⱪimmǝtliktur;

Ⱨǝsǝldin, ⱨǝsǝl jǝwⱨiridin xerindur;■

11 Ular bilǝn ⱪulung oyƣitilidu;

Insan ularƣa riayǝ ⱪilixta qing tursa qong mukapat bardur.

12 Kim ɵz hataliⱪlirini bilip yetǝlisun?

Meni bilip-bilmǝy ⱪilƣan gunaⱨlirimdin saⱪit ⱪilƣaysǝn;

13 Ɵz ⱪul-qakaringni baxbaxtaⱪ gunaⱨlardin tartⱪaysǝn;

Bu gunaⱨlarni manga hojayin ⱪildurmiƣaysǝn;

Xuning bilǝn mǝn ⱪusursiz bolimǝn,

Eƣir gunaⱨtin haliy bolƣaymǝn.

14 I Pǝrwǝrdigar, mening Ⱪoram Texim wǝ Ⱨǝmjǝmǝt-Nijatkarim,

Aƣzimdiki sɵzlǝr, ⱪǝlbimdiki oylinixlar nǝziringdǝ mǝⱪbul bolƣay!□

□ 19:2 «Ularning sɵzliri kün-künlǝr dǝryadǝk eⱪiwatidu» — «ular» ǝrxlǝr wǝ asman gümbizini kɵrsitidu. «Ularning sɵzliri kün-künlǝr dǝryadǝk eⱪiwatidu; keqǝ-keqilǝp ular bilimni ayan ⱪiliwatidu» — ayǝtning baxⱪa birhil tǝrjimisi «Kün baxⱪa bir küngǝ gǝplirini tɵkidu, keqǝ baxⱪa bir keqigǝ sɵz ⱪilmaⱪta». □ 19:3 «Tilsiz ⱨǝm awazsiz bolsimu, ularning sadasi alǝmgǝ anglanmaⱪta» — baxⱪa birhil tǝrjimisi «Alǝmdǝ ⱨǝrⱪandaⱪ bir til ularning sadasini anglap qüxinǝlǝydu». □ 19:4 «Ularning ɵlqǝm tanisi yǝr yüzidǝ tartilmaⱪta» — bu «ɵlqǝm tanisi» bǝlkim insanning tǝsǝwwur-oylirini ɵlqigüqi boluxi mumkin. ■ 19:4 Rim. 10:18 ■ 19:5 Top. 1:5 □ 19:7 «Pǝrwǝrdigarning tǝwrat-ⱪanuni mukǝmmǝldur» — «Tǝwrat-ⱪanun» tooƣruluⱪ: «Tǝwrat» (toraⱨ) ibraniy tili bolup, muxu yǝrdǝ «ⱪanun, tǝlim, yolyoruⱪ» degǝn mǝnidǝ ixlitilidu. «Tǝwrat ⱪanuni» degǝn ibarǝ adǝttǝ Musa pǝyƣǝmbǝr arⱪiliⱪ kǝltürülgǝn Tǝwrattiki «Yaritilix», «Misirdin qiⱪix», «Lawiylar» «Qɵl-Bayawandiki sǝpǝr» ⱨǝm «Ⱪanun xǝrⱨi» degǝn aldinⱪi bǝx ⱪisimning ⱪanun-pǝrmanliⱪ mǝzmunini kɵrsitidu. ■ 19:7 2Sam. 22:31; Zǝb. 18:30 □ 19:8 «Pǝrwǝrdigarning pǝrmanliri yoruⱪluⱪtur» — yaki «Pǝrwǝrdigarning pǝrmanliri roxǝndur» yaki «Pǝrwǝrdigarning pǝrmanliri paktur». ■ 19:10 Zǝb. 119:72,103,127; Pǝnd. 8:11 □ 19:14 «I Pǝrwǝrdigar, mening Ⱪoram Texim wǝ Ⱨǝmjǝmǝt-Nijatkarim» — «Ⱨǝmjǝmǝt-Nijatkar» yaki «ⱨǝmjǝmǝt-ⱪutⱪuzƣuqi» toƣruluⱪ: — Ibraniy tilida «goel» degǝn bu sɵzning alaⱨidǝ mǝnisi bar. Birsi kǝmbǝƣǝl bolup, ɵzini ⱪulluⱪⱪa setiwǝtkǝn bolsa yaki baxⱪa ⱪiyin ǝⱨwalƣa uqrap mal-mülükini satⱪan bolsa, Musa pǝyƣǝmbǝr tapxuruwalƣan ⱪanunƣa asasǝn, muxu kixining ɵzining yeⱪin uruⱪ-tuƣⱪanliri, ⱨǝmjǝmǝtliri bu kixini ⱨɵrlükkǝ qiⱪirip ⱪutⱪuzux ⱨoⱪuⱪi bar idi. Demǝk, «ⱨǝmjǝmǝt-ⱪutⱪuzƣuqi» ɵz ⱪerindixini ⱨɵr ⱪilmaⱪqi bolsa, uni ⱪutⱪuzalaytti. Ⱨoⱪuⱪni ixlitix «ⱨǝmjǝmǝt-ⱪutⱪuzƣuqi»ning ɵz ihtiyarliⱪi bilǝn bolatti, ǝlwǝttǝ. Birsi ɵz uruⱪ-tuƣⱪiniƣa «ⱨǝmjǝmǝt-ⱪutⱪuzƣuqi» bolup uni ⱪutⱪuzmaⱪqi bolsa, ⱨeqkim uni tosalmaytti. Xunga pǝyƣǝmbǝrlǝr Hudaning ⱪutⱪuzƣuqi ikǝnlikini bayan ⱪilix üqün pat-pat dǝl muxu sɵzni ixlitidu. Demǝk, Huda Ɵz bǝndisigǝ yaki hǝlⱪigǝ «ⱨǝmjǝmǝt»lik ⱪilip, ularning «goel»i, yǝni «ⱨǝmjǝmǝt-ⱪutⱪuzƣuqi»si bolidu. Uning Ɵz hǝlⱪini ⱪutⱪuzuxi Ɵz ihtiyariliⱪi bilǝn, ǝlwǝttǝ!