73
Üqinqi bɵlüm •••• 73-küy •••• Hatalaxⱪinini tonup yetix
1 Asaf yazƣan küy: —
Dǝrwǝⱪǝ Huda Israilƣa,
Ⱪǝlbi sap bolƣanlarƣa meⱨribandur;
2 Lekin ɵzüm bolsam, putlixip yiⱪilip qüxüxkǝ tasla ⱪaldim;
Ayaƣlirim teyilip kǝtkili ⱪil ⱪaldi;
3 Qünki rǝzillǝrning ronaⱪ tapⱪanliⱪini kɵrüp,
Ⱨakawurlarƣa ⱨǝsǝt ⱪildim;
4 Qünki ular ɵlümidǝ azablar tartmaydu,
Əksiqǝ teni mǝzmut wǝ saƣlam turidu.
5 Ular insanƣa has japani kɵrmǝydu,
Yaki hǝⱪlǝrdǝk balayi’apǝtkǝ uqrimaydu.
6 Xunga mǝƣrurluⱪ marjandǝk ularƣa esilidu,
Zorluⱪ-zomigǝrlik tondǝk ularƣa qaplixidu.
7 Ular sǝmrip kǝtkǝnlikidin kɵzliri tompiyip qiⱪti;
Ularning ⱪǝlbidiki hiyalǝtlǝr ⱨǝddidin exip ketidu.
8 Baxⱪilarni mǝshirǝ ⱪilip zǝⱨǝrlik sɵzlǝydu;
Ⱨalini üstün ⱪilip diwinip, doⱪ ⱪilidu.
9 Ular aƣzini pǝlǝkkǝ ⱪoyidu,
Ularning tilliri yǝr yüzini kezip yüridu.
10 Xunga Hudaning hǝlⱪi muxularƣa mayil bolup,
Ularning degǝnlirini su iqkǝndǝk ahiriƣiqǝ iqip: —
11 «Tǝngri ⱪandaⱪ bilǝlǝytti?»,
«Ⱨǝmmidin Aliy Bolƣuqida bilim barmu?» — dǝydu.
12 Mana bular rǝzillǝrdur;
Ular bu dunyada raⱨǝt-paraƣǝtni kɵridu,
Bayliⱪlarni toplaydu.
13 «Aⱨ, ⱨǝⱪiⱪǝtǝn bikardin-bikar kɵnglümni paklanduruptimǝn,
Gunaⱨsiz turup ⱪolumni artuⱪqǝ yuyup kǝptimǝn;
14 Bikarƣa kün boyi japa qekiptimǝn;
Xundimu ⱨǝr sǝⱨǝrdǝ wijdanning ǝyibigǝ uqrap kǝldim!».
15 Biraⱪ mǝn: — «Bundaⱪ desǝm,
Bu dǝwrdiki pǝrzǝntliringgǝ asiyliⱪ ⱪilƣan bolmamdimǝn?» — dedim.
16 Ularni kallamdin ɵtküzǝy desǝm,
Kɵzümgǝ xundaⱪ eƣir kɵründi.
17 Tǝngrining muⱪǝddǝs jayliriƣa kirgüqǝ xundaⱪ oylidim;
Kirgǝndila yamanlarning aⱪiwitini qüxǝndim.
18 Dǝrwǝⱪǝ Sǝn ularni teyilƣaⱪ yǝrlǝrgǝ orunlaxturisǝn,
Ularni yiⱪitip parǝ-parǝ ⱪiliwetisǝn.
19 Ular kɵzni yumup aqⱪuqila xunqǝ parakǝndǝ bolidu,
Dǝⱨxǝtlǝr ularni besip yoⱪitidu!
20 Sǝn i Rǝb, qüxtin oyƣanƣandǝk oyƣinip,
Ornungdin turup ularning siyaⱪini kɵzgǝ ilmaysǝn.
21 Yürǝklirim ⱪaynap,
Iqlirim sanjilƣandǝk bolƣan qaƣda,
22 Ɵzümni ⱨeqnemǝ bilmǝydiƣan bir ⱨamaⱪǝt,
Aldingda bir ⱨaywan ikǝnlikimni bilip yǝttim.
23 Ⱨalbuki, mǝn ⱨǝmixǝ Sǝn bilǝn billǝ;
Sǝn meni ong ⱪolumdin tutup yɵliding;
24 Ɵz nǝsiⱨǝting bilǝn meni yetǝklǝysǝn,
Xan-xǝripngni namayan ⱪilƣandin keyin,
Ahirida Sǝn meni ɵzünggǝ ⱪobul ⱪilisǝn.
25 Ərxtǝ Sǝndin baxⱪa mening kimim bar?
Yǝr yüzidǝ bolsa Sǝndin baxⱪa ⱨeqkimgǝ intizar ǝmǝsmǝn.
26 Ətlirim ⱨǝm ⱪǝlbim zǝiplixidu,
Lekin Huda ⱪǝlbimdiki ⱪoram tax ⱨǝm mǝnggülük nesiwǝmdur!
27 Qünki mana, Sǝndin yiraⱪ turƣanlar ⱨalak bolidu;
Wapasizliⱪ ⱪilƣan paⱨixǝ ayaldǝk Sǝndin waz kǝqkǝnlǝrning ⱨǝrbirini yoⱪitisǝn.
28 Biraⱪ mǝn üqün, Hudaƣa yeⱪinlixix ǝwzǝldur!
Uning barliⱪ ⱪilƣan ixlirini jakarlax üqün,
Rǝb Pǝrwǝrdigarni tayanqim ⱪildim.