9
9-küy •••• Huda Ɵz xǝripi ⱨǝm adalitini kɵrsǝtkǝy!
1 Nǝƣmiqilǝrning bexiƣa tapxurulup, «Mut-Labbǝn» degǝn aⱨangda oⱪulsun dǝp, Dawut yazƣan küy: —
Mǝn Sǝn Pǝrwǝrdigarni pütün ⱪǝlbim bilǝn mǝdⱨiyǝlǝymǝn;
Mǝn Sening ⱪilƣan barliⱪ karamǝtliringni bayan ⱪilay;
2 Mǝn Sǝndin huxal bolup xadlinimǝn;
Sening namingni nahxa ⱪilip eytimǝn, i Ⱨǝmmidin Aliy!
3 Mening düxmǝnlirimning kǝynigǝ yenixliri bolsa,
Dǝl ularning sening didaring aldida yiⱪilip, yoⱪilixidin ibarǝt bolidu.
4 Qünki Sǝn mening ⱨǝⱪⱪim ⱨǝm dǝwayimni soriding;
Sǝn tǝhtkǝ olturup, ⱨǝⱪⱪaniylarqǝ sotliding.
5 Sǝn ǝllǝrgǝ tǝnbiⱨ berip, rǝzillǝrni ⱨalak ⱪilding;
Sǝn ularning namini mǝnggügǝ ɵqürüwǝtkǝnsǝn.
6 I düxminim! Ⱨalakǝtliring mǝnggülük boldi!
Sǝn xǝⱨǝrlirini yulup taxliwǝtting,
Ⱨǝtta ularning namlirimu yoⱪap kǝtti;
7 Biraⱪ Pǝrwǝrdigar mǝnggügǝ olturup ⱨɵküm süridu;
U Ɵz tǝhtini sot ⱪilixⱪa tǝyyarlap bekitkǝn;
8 Alǝmni ⱨǝⱪⱪaniyliⱪ bilǝn sot ⱪilƣuqi Udur;
Hǝlⱪlǝrning üstidin U adilliⱪ bilǝn ⱨɵküm qiⱪiridu;
9 Ⱨǝm U Pǝrwǝrdigar ezilgüqilǝrgǝ egiz panaⱨ,
Xundaⱪla azabliⱪ künlǝrdǝ egiz panaⱨdur.
10 Namingni bilgǝnlǝr bolsa Sanga tayinidu;
Qünki Sǝn, i Pǝrwǝrdigar, Ɵzüngni izdigǝnlǝrni ⱨǝrgiz taxliƣan ǝmǝssǝn.
11 Zionda turƣuqi Pǝrwǝrdigarƣa küylǝrni yangritinglar!
Uning ⱪilƣanlirini hǝlⱪlǝr arisida bayan ⱪilinglar;
12 Qünki tɵkülgǝn ⱪanning soriⱪini ⱪilƣuqi udur,
U dǝl xundaⱪ kixilǝrni ǝslǝydu,
Har ⱪilinƣanlarning nalǝ-pǝryadlirini U untuƣan ǝmǝs.
13 Manga xǝpⱪǝt kɵrsǝtkin, i Pǝrwǝrdigar,
Mening ɵqmǝnlǝrdin kɵrgǝn horluⱪlirimƣa nǝzǝr salƣinki,
Meni ɵlüm dǝrwaziliri aldidin kɵtürgǝysǝn;
14 Xundaⱪ ⱪilƣanda mǝn Zion ⱪizining dǝrwazilirida turup,
Sanga tǝǝlluⱪ barliⱪ mǝdⱨiyilǝrni jakarlaymǝn;
Mǝn nijatliⱪ-ⱪutⱪuzuxungda xadlinimǝn.
15 Əllǝr bolsa ɵzliri koliƣan oriƣa ɵzliri qüxüp kǝtti,
Ɵzliri yoxurup ⱪoyƣan torƣa puti ⱪapsilip ⱪaldi.
16 Pǝrwǝrdigar qiⱪarƣan ⱨɵkümi bilǝn tonular;
Rǝzil adǝmlǝr ɵz ⱪolida yasiƣini bilǝn ilinip ⱪaldi.
Higgaon — Selaⱨ.
17 Rǝzillǝr,
Yǝni Hudani untuƣan barliⱪ ǝllǝr,
Yandurulup, tǝⱨtisaraƣa taxlinidu.
18 Qünki namratlar mǝnggügǝ ǝstin qiⱪirilmaydu;
Mɵminlǝrning ümidi mǝnggü ɵqmǝy, turiweridu.
19 I Pǝrwǝrdigar, ornungdin turƣin;
Adǝm balilirining ƣǝlibǝ ⱪilixiƣa yol ⱪoymiƣin;
Ⱨuzurung aldida barliⱪ ǝllǝr sotlansun.
20 Ularni dǝkkǝ-dükkigǝ qüxür, i Pǝrwǝrdigar;
Əllǝr ɵzlirini biz pǝⱪǝt adǝm baliliri halas, dǝp bilsun!
Selaⱨ!