8
MIZMIZ 8 NOSIK 1-11
1 Wige gair bakiauda taba gedim, ege Iesu ge bakiamuda Oliwa Paserem.
2 Nedbi ipiter nerut gergerira ege takomeda a bakiamuda able utebge ge nade au zogometa ewereder, nade ge lera nikidetreider taba abi deirumareta. E ge akaida emrilu ga yabi nerwerlare.
3 Able Aotale a Parisayo legize netat koskir tigareda ge wi adud tonar kimiarei ikelei ge nole abra kimiar dawer. Wige abi ikaidarda gair le opem ekweidarda.
4 Wige eudi Iesui ikaidarda, “Erwerle, nerut lelut able koskir terdari wi kimiarei tadarali pe nole abra kimiar dali.
5 Muige kerbi Gelarge, Mosede kerbi kelarkelar detagerda ki koskir bakiru eudem natimedlare nade wi able lu waikelare. Nako mako detautli mokakalam ge Mosede detauter?”
6 Wi able miru abi ikelare laglag abi kesrem udimaridarda ya waiakai wi abi miru waikereda a abim tag waimarkeda. Ege Iesu no etkobeida taba tagpimu war sebge ditarer.
7 Nawerge wi mena abi itmerlare, ege etilu barkak emrilu yabi daratagerda, “Nete wabialam nole witkak dali ege kikem able koskir bakiru wairbor.”
8 Ege ko etkobeida a war sebge ditarer.
9 Nade ge wi able mir asorda wige netatnetat abialam adem bauser aulelam ditimeda mena bakedida wi gair puipikem adem bakiauda. No Iesu ga dawer tebteb a able koskir ga mena ikweireder abi opem.
10 E etilu barkak emrilu able koskir itmeri, “Wi nade uridli? Nako, le nole abkorep dali mari bakiru natimdi?”
11 Ege abi koskiride ikaida, “Nole lelut kari bakiru natimdi, ople.” Iesu ge akaida abi detagri, “Kako umerkak mari bakiru natimde. Ma no bakiamu mage nole ko wit ikerwa.”